آرازی آییردیلار

آرازی آییردیلار

قومونان دویوردولار

من سندن آیریلمازدیم

ظولمونن آییردیلار

     آی لاچین، جان لاچین

     من سنه قوربان لاچین

بو شعر قاراباغا عاییددیر. باخین دقیقا اردوغان جنابلاری بئله اوخوموشلار بو ماهنی اولان بابتی، لاچینا عاییددیر و لاچین ده قاراباغا. قاراباغی دا اوتوز ایل آذربایجان جمهوروسوندا آییرمیشدیلار. بو شعرین باشقا بندلری ده وار و سون مصرعلر یعنی (آی لاچین، جان لاچین / من سنه قوربان لاچین) تکرار اولور. آقای اردوغان دا عینا بئله اوخودو. پس بو ماهنی قاراباغا عایید اولور و ایرانا هئچ مربوط اولان دئییل دیر. البتده بونو هر بیر تاریخی اولای اوچون ده اوخوموشلار. آنجاق بورادا اردوغان دئییلدیر کی اشتباه ائتمیش، بلکه بیزیم خارجه وزیریمیز قانماییبدیر؛ چونکی اونون دؤر – برینده تورکو بیلن یوخدور و تاریخینی ده بیلن یوخدور. ایران تانییان بیری اولسایدی وزیری دوشوندورردی و فتنه یاراتمازدی. آنجاق فتنه اورادان یارانیر کی وزیرین دؤر – برینی “ایرانشهری” آدلاندیردیغیمیز همان اسکی پان ایرانیست لر و یا پانفارسلار توتموشلار. بونلار هر حیله یه ال ووروب، ایرانی پارچالاماغا چالیشیرلار. بو سؤزومه ۴۲ ایللیک فاکت لار واردیر. تاسوفله بو نفوذی عامیللر گونو – گوندن دولت دستگاهیندا چوخالمادادیر. اونلارین هدفی ایراندا تفرقه سالیب حکومت ائتمکدیر؛

سایین اردوغان جنابلاری اگر تکجه بایاتینی اوخویوب و لاچیندن آد آپارماسئیدی اوندا سیز دئین ایدی. آما اردوغان حؤرمتلی و دوشونر بیر رهبردیر. سیزین دور – برینیزده اولان و سیز خط وئره آداملار آنلاقسیز آداملاردیر. مین ایل ایرانی دولاندیرانلار تورکلر اولموشلار و مین ایلده بیر ایرانلی هر قوم دان اولور اولسون توهین گؤرمه میش، آما رضاشاه ایش اوسته گلن گونده بو انگلیس سیاستی پانفارسلار الیله یولا دوشوب و بوگونلر داها گوجلنمیشلر و دولتی ده اوینادا بیلیرلر.

   تاسوفله آذربایجان ۴۲ ایلدیر هئی پارچالانیر، بوگون آذربایجان ۷ اوستانا بؤلونوب، آذربایجان شرقی، آذربایجان غربی، اردبیل، زنگان، قزوین، همدان و . . . آما بوگون تورکلر ایرانین ۳۱ اوستانیندان ۲۸ اوستاندا حضورلاری وار و ایران جمعیتی­نین یاری تورکدور. بونونلا بئله تامام حقوقلاری ازیلمکده دیر. قویون بیر دفعه صراحتله دانیشاق. بو فتنه لر قره باغ ساواشیندان باشلاندی. ایران تاسوفلر اولسون  30 ایلدیر ائرمنی لردن دفاع ائتمیش و اونلارین طرفینی توتموشدور. بونو هر آذربایجانلی بیلیر، اما سیز باشینیزی قارا سوخوب اؤزونوزو عالم دهر بیلیرسینیز. ایران دولتی ائرمنی لرین اشغال ائتدیگی توپراقلاردا ائرمنی لرله برابر قرارداد باغلامیشلار. خداآفرین ده ائرمنی لرله مشترک پروژه لره امضا آتمیشلار. ایندی اشغالچی ائشیگه اؤتورولوب، ایران نه ائده جک؟ اگر بئله ایشلره خیانت دئمه ییم نه دئییم؟ سیزین بو ایشلرینیز بین الخالق قانونلارینا ضد اولان ایشلردیر. بئله ایشلرین ساییسی چوخدور، و آقای وزیر! سیزین دوشونجه نیز آذربایجانلی بیر داغ دالیندا یاشایان کندلیجه ده یوخدور. آذربایجان خالقی ایرانی سئویر و ایرانین بوتوولوگونه قانلار وئریب، خوزستاندا آذربایجان شهیدلری نین ساییسی تامام اوستانلاردان چوخدور. سیز آذربایجانی تیکه له ییب و آدلاری دا ده ییشمیشسینیز. آخی بونلارا خیانت دئمه ییم نه دئییم؟ ۴۲ ایلدیر آنایاسادا – مینلر شهیدلریمیزین قانی بهاسینه یازیلان اصللری اجرا ائتمه میشسینیز. بونونلا بئله حؤرمتلی و نجیب خالقیمیز سسی چیخمامیش، اینانیرسینیز کی بو سکوت قورخودان دئییل، بلکه ائله ایرانین مصلحتینی بورادا گؤرموشوک. آنجاق سیز ده داها جانا گتیرمه یین. فتنه دن ال چکین. دوننه قدر آذ شرقی و آذ غربی یازیب آذربایجان آدینی چکمکدن چکینیردیز، اما بوگون، سیزین یازینیزدا، آذربایجان عزیز (!) اولموشوق!؟

صراحتله دئییرم: آقای خارجه وزیریمیز! ۴۲ ایلدیر ۴۰ میلیون تورک دیللی ایران خالقی ایلک انسانی حقلریندن محروم دور. ۴۲ ایلدیر اؤز دیلینده مدرسه ایسته ییر. ۴۲ ایلدیر مینلر شهیدین قان بهاسیله یازیلان آنایاسانین ۱۵ و ۱۹جو اصللرینی اجرا ائتمه میشسینیز، حتا بیر آددیم دا گؤتورمه میشسینیز. آما قاراباغدان ائرمنی لری ائشیگه اؤتوره ن گون ایران دولتی طرفیندن تئز اورتایا آتیلیب ائرمنی لرین حقوقلاری نین حفظ ائتمه گیندن نیگرانلیغینیزی بیلدیردیز. بس عجب ۴۰ میلیون تورک خالقی اؤز وطنینده مدنی حقلری یوخدور؟ اوتانماییرسینیز؟ اما اینانین آذربایجان اویاقدیر / حقیقته دایاقدیر. آذربایجانی بوندان آرتیق اینجیتمه یین! ائله بیر گون گلر کی داها قاییدیش یوللاری دا باغلانار.

مجلیس نماینده سی محمود احدی بیغش مجلیسده چیغیریر و دئییر: بیز گرک قاراباغ ساواشیندا ائرمنستاندان حیمایه ائدئیدیک!! پس رهبرین سؤزونو توتان کیمدیر؟ اولما اونا دا غنیم چیخمیشسینیز؟ یا بونلارین آغزینی یومون یا رهبره ده دئیین کی سؤزونوزه باخماییرسینیز. اوتانماز نماینده دئییر آمریکا و اروپا تورکیه نی تحریم ائده رک بیزده حیمایت ائده جه ییز. بونا نه دئییرسینیز. آمریکایا اؤلوم شعارینی وئریب آما اته گیندن یاپیشمیشسینیز.

هله، سیز آذربایجان ماهنی لاری نین هئچ بیرینی دوشونمه میشسینیز. یار بیزه قوناق گله جک ماهنی سینی دا دوشونمه میشسینیز، یوزلرجه آیریلیق ماهنی سی، حسرت ادبیاتینی و باشقا باشقا سؤزلری دوشونمورسونوز. چون اساسدا آذربایجانی دوشونمورسونوز.

آقای وزیر! سیز دوشونمه سه نیز، آذربایجان خالقی دوشونور. بیلین کی آذربایجات اویاقدیر، حقیقته دایاقدیر.

ارسال دیدگاه