نئچه شئعر / لیلا کحالی

بیلدییم گوندن

بیلدییم گوندن قاپی چالیر…
او تاپمیش قاپینی
اوره‌ییم سس سس چالینیر…
بیلدییم گوندن آختاریرام
دونیانین قاپیسی هاردان آچیلیر؟
یا ! یورولوب گئتسه
قاپیدان آدام؟
کیم بیلیر او کیمدیر
کیم اونو تانیر؟؟؟

سن گئده نده

سن گئده نده من قالیرام سنسیز!
سونرا من گئدیرم
بیری قالیر منسیز!
سونرا بیری گئدیر
بیری قالیر بیری‌سیز!
بو گئت گل‌دن
یاریمچیق آداملاریق هامیمیز
گولنده دوداغلاریمیزی تاپا بیلمیریک
آغلایاندا گؤزلریمیزی…

سسین هانسی آدامدیر

سسین هانسی آدامدیر ؟
آداملار ایچینده گل اویات منی
یارات دوداغیمدا آغرییان سؤزو…
سسین هانسی زینداندیر؟
دئه‌!! !گئدیم ایچینه سالیم اؤزومو!
باغلاییم اؤلومه
یاشادیم سنی…
اوزاغدان گلنمی؟
یئردنمی؟ گؤیدن؟
من‌می اوزاغلارا آتدیم یئرگؤیو؟
نئجه اویادیرسان یوخودان آخی
اویاغام گل دانیش!
تانییم سنی…

 

ارسال دیدگاه