نئچه شئعر / روزبه صمدی (نیراوغلو)

پان کیمدی

 

پان اودور دایم  منم من  سؤیلیه

اؤزگه‌نین بئینینده وار چن سؤیلیه

 

یاد بیله اؤز قونشوسون، ائو صاحیبن

باغلیا هر بیر ائله  باغریندا  کین

 

اوینویا  دوشمنلره  دلقک  کیمی

جوْک قوشا، تفریح ائده، ملجک کیمی

 

ظاهیراً  قرآنی  ابزار ائیلیه

باطیناٌ اسلامی  انکار ائیلیه

 

اؤزون دیلیندن، لهجه‌سیندن، دویمویا

باشقا دیلده درس اوخونسون  قویمویا

 

تک دییه ایران منیمدیر، من باشام

ریشه‌ده من هیتلر ایلن  قارداشام

 

باشقا دیللر بوردا محو اولسون  گرک

تک بیزیم فرهنگیمیز قالسین  گرک

 

بیز کوروش اولادیوک، احمد(ص) ندی

حضرت مولا(ع)، ابالفضل(ع) اؤزگه‌دی

 

بیزحسین(ع)ی نئیلروک، زرتشتی‌یوک

ییغ گیلن قرآنی سن دریایه تؤک

 

بعلی قارداش پان بودور، من من دئین

پان دَییل ایراندا حقین ایستیَن

 

بیز هاممی ایرانلیلار قارداشلاروق

باشقا دیللرده اولان  دینداشلاروق

 

تورک هاچان ایرانی ویران ایستییب؟

دایمن یوردون گولستان ایستییب

 

بیز عدالت ایستین انسانلاروق

حقیمیز ایراندا باتسین، قویماروق

 

پان گرک ایراندا محو اولسون داداش

یوخسا قالماز بوردا  بیر داش اوسته  داش

 

پان گؤزیله  کیمسه  تورکه  باخماسین

تولکولر آسلانلارا  شر  یاخماسین

 

بیزعلی(ع)نین شیعه‌سی آسلانلاروق

بیز عدالت   باده‌سیندن دویماروق

 

تا کی عالم وار حسین(ع)ه  عاشقوک

پان ندیر؟ بیز نانجیبدن  فارقوک

 

بیر شهیددیر اؤلسه  حقّین  ایستیین

قورخماسین  دونیاده هئچ  حقّیم دئین

 

حق «نیراوغلو»ن قورخولاردان  قورتاریب

دایمن عالمده  حقّین آختاریب

………………

ایضاحات

 

پان = نژادپرست

ملجک یا ملیجک = لووغا و تفریحچی آدام.جوکر.

دینداش= هم مذهب. هم دین.

فارق= آیری.باشقا.فرقلی.

 

۱۱/آذر/۹۷

 

آوچو پیریم

 

گؤزلر گؤزیوین گؤلچه‌سینه  باتدی قوتاردی

کؤنلومده  اؤزون  ساچلاریوا  قاتدی قوتاردی

 

شام تک اریدیم صوبحه قدر بیلمه‌دین آنجاق

شیرین  یئنه‌ده  فرهادی آغلاتدی قوتاردی

 

آلله او زولیخالیقیوی رحمه گتیرسین

یوسیفلییمی گؤر نئجه  آلچاتدی قوتاردی

 

من سئوله‌دیییم، درسین آلیب آوچو پیریمدن 

هر بیر اوره‌یه کیپریک اوخون آتدی قوتاردی

 

جان سالیم آپارماز ایلیشنلر تله‌سیندن

هر شخصه گؤزون بیر کره اویناتدی قوتاردی

 

گل لوطف ائله بیردفعه سویوش قول بازاریندان

تئز گل کی منی آیریلیقین ساتدی قوتاردی

 

میخانه‌ده خوم سیندی خومارلاندی «نیراوغلو»

اغیار سئوینیب، مطلبینه چاتدی قوتاردی     

….

آیین هؤروکلری کیتابیندان     

 

 

ستارخان تبریزده

 

گینه‌ده باغرینا اودلار قالانیب وجدانیمین

گینه‌ده شوبهه دوشوبدور جانینا ایمانیمین

گینه غیرت جالانیب گؤلچه‌سینه پاک قانیمین

 

چوخ یامان دوران اولوبدور بو قودوز  دورانیمیز

آیاق آلتیندا قالیبدیر اولو  ستارخانیمیز

….

 

فارس‌دا اولسایدی بوجور تحقیر اولاردی گؤره سن؟

یاخاسین تبعیض الیندن، آلاجاقدیر بو وطن؟

وطن اوستونده شهید اولدو بو سردار دییه‌سن

 

نه جهتدن بئله داش تک سویوق اولموش جانیمیز؟

آیاق آلتیندا قالیبدیر اولو ستارخانیمیز

….

 

قبری چوخ ساده‌دی، اوستوندن آیاقلار سوووشور

گؤزلریمدن ائله بیل قانلی بولاقلار سووشور

بوغدالیقدان گؤزو شیطانلی اوراقلار سووشور 

 

دردیمیز باشدان آشیر، اؤزگه‌ده یوخ درمانیمیز

آیاق آلتیندا قالیبدیر اولو ستارخانیمیز

….

 

چیرمایاق قوللاری قبرین کؤچورک تبریزه بیز

ساخلایار اؤز بالاسین سینه‌ده گول  تک  تبریز

بیزه بیزدن سورا جان یاندیران اولماز هرگیز

 

شونیزمین  تورونا  برک  ایلیشیب ایرانیمیز

آیاق آلتیندا قالیبدیر اولو ستارخانیمیز

 

یا علی(ع) سؤیلیه‌غون، آلله  اؤزو  یاردی بیزه

بو ایشه بی خیال اولساق بو زامان عاردی بیزه

اولو «بابک» کیمی غیرت لیباسی داردی  بیزه

 

ظولمی گؤردوکجه  کؤکوندن داریخیر وجدانیمیز

آیاق آلتیندا قالیبدیر اولو ستارخانیمیز

 

بیزه چوخ ظولمی کئچیبدیر، او کئچل ایرضا شاهین

کینه‌سی حقی بیچیبدیر، او کئچل ایرضا شاهین

اوغلو سئل تک قان ایچیبدیر، او کئچل ایرضا شاهین

 

اؤیله ساتقین دان اولوب  بؤیله وئران هر  یانیمز

آیاق آلتیندا قالیبدیر اولو ستارخانیمیز

….

 

ایندیده بیر سورو آزقین  داراشیب ایرانیما

خور  باخیر پهلوی‌لر تک، جان آذاربایجانیما

آند اولا «باکری»‌لردن سؤزولن پاک قانیما

 

ییخاجاق فتنه‌لرین عرشه چیخان طوفانیمیز

آیاق آلتیندا قالیبدیر اولو ستارخانیمیز

گرک حؤرمت قویولا اؤلکه‌ده «حیدرخانادا» 

«شیخ محمد»  له باغیرخان کیمی بیر آسلانادا

«ثقه الاسلامادا» باشقا بؤیوک هر جانادا

 

آی «نیراوغلو« گوله‌جک یازدا گینه  بوستانیمیز

آیاق آلتیندا قالیبدیر اولو ستارخانیمیز

۲۱/ دی/ ۹۷

…..

ایضاحات:

وزن شعر = فاعلاتن فاعلاتن فاعلن

 قودوز = هار.

  اولو= بؤیوک

 شونیزم = نژادپرست

 ساتقین = خائن. وطن فروش

آزقین = گمراه.

 خور = پیس. کج.أیری.

 حیدرخان= حیدر خان عمواوغلی.

 شیخ محمد= شیخ محمد خیابانی.

…………….

ارسال دیدگاه