قورد اَلی / علیرضا ذیحق

حیکایه

سیروس، قوشو گؤیده ووراردی . اورتا بوی، آریق و آز دانیشان بیری ایدی. عشقی فقط او ایدی کی معلیم چی لیک ائتدی یی کندین درس ساعات لاری بیته، و او، دینجین آلاندان سونرا، شیکارا چیخا. بیر توفنگی وار ایدی کی اونو بیر ائولاد کیمی گؤزَتلردی. واخت تاپدیقجا توفنگینی سیلیب تمیزله ییب یاغلاردی.

گونلرین بیری شیکارا چیخیب بیر نئچه اؤردک وورونجا ائوینه قاییدیردی. تک یاشاییردی. هله ائولن مه میشدی. کندده ائولرین بیرینده بیر اوتاق توتوب اوردا گئچینیردی. او کتده اوندان باشقا نئچه شیکارچی دا وارایدی. آما اونون نیشان توتماسی آیری بیر شئی ایدی. آیدین داغ تپه دن آشاراق قانلی گؤل آدلانان یئردن بیر نئچه اؤردک وورموشدو . قاییداراق آز قالا گون باتیردی . اؤز عالمینده سئیر ائدیب سئوینجک ایدی. آز گؤرونموشدو کی او اَلی بوش شیکاردان قاییدا. بیر شیکارچی نین اَلی بوش دؤنمه سی، بیر ای ییدین گولش ده ییخیلماسی کیمی عار ایدی . اونون اَلی بوش قاییدان گونلری اولسادا چوخ آز اولموشدو. صاباح دوستلارین قوناق چاغیریب اونلارا اؤردک اَتی یئدیده جک ایدی . دوستلار هامیسی اؤزلرینی صاباحا حاضیرلامیشدیلار. گون باتا بات دایدی کی اوزاقدا بیر سورو گؤردو . اینانیلماز ایدی. قیش فصلینده بو ایش گؤرونسه ایدی، باهار فصلی چوخ آز ایمکانی وارایدی. قورد سوروسو ایدی. جانینی قورخو بورودو و بیر قایانین دالینا سینه رکن ، اونلارین گلیب گئچدی یینی گؤردو . قورد لاردان بیری آخسیردی. سورودن دالی یا قالمیشدی . او بیری قوردلار اوزاقلاشدیلار آما او آیاق ساخلادی. سیروس آزجادا اولسا، بیر راحات نفس چکدی. قوردلار گؤزدن ایته رکن او یولونا دوام وئرمک ایسته دی . آنجاق آخساق قورد، هله اورتا لاردایدی. توفنگی نن اونو نیشانه توتاراق، او قوردو وورماق ایسته میردی. نییه کی باروت و گورولتو سسی، او بیری قوردلاری دا بورا قایتاراجاق ایدی. هم ده بللی دئییلدی اطرافدا آیری قورد دا اولا یا اولمایا. گون باتماق اوزره ایدی و آی گؤی ده گؤرونوردو. گؤردو کی قورد یولا دوشوب گئری یه دؤنورو . نییه او قورد ، او بیری قوردلاری بوراخیب تک و یالنیزجاسینا یولونا دوام ائدیردی دوغروسو شاشمیشدی. او آخساق آیاقی لا دا ائله اونلار لا آیاق لاشا بیلردی . سیروس بونو اؤزونه بیر شانس بیلیب قایادان قایا یا سینه رک، قوردو تعقیب ائتدی . بیری اوندان قورد اَلی ایسته میشدی و بو یاخشی بیر فورصت ایدی. قورد اَلی ایسته ین قادین ، باخیجی ایدی. فالا باخاردی و دوعا یازاردی . قورد اَلینی قرار ایدی قورخان آداملارین اوزونه چیرپا تا قورخودان چیخالار . هم ده دوعالیق اولانلارین دوعاسینی اونون دیرناقلارینان یازا. سیروس اونا سؤز وئرمیشدی کی بیر گون بیله سینه حتمن بیر قورد وورا و ال آیاق لارینی اونا آپارا . او کی ایندی یه قورد لارین قورخوسوندان اونلارا یاخین دوشمه میشدی و هئچ واخت بیر قوردو تک جانینا گؤرمه میشدی، بو ایشی باشارا بیلمه میشدی. آرزوسو ایدی کی کاش بو قوردو وورا بیله. آی ایشیقیندا سیروس او قوردو ایزله ییب اویغون بیر واخت دا اونو وورمالی ایدی. توفنگینی آماده ائدیب پوسکوده یاتدی. زامان چوخ اؤتموشدو. گؤزلرینی قییدی و آیاقلارینی یئرده برکیده رکن قوردو نیشان آلیب وورماق ایسترکن، قولاغینا سس لر گلدی. دیکسَندی. دالی یا دؤنوب باخارکن قوردلاری گؤردو. اَل آیاقی اَسدی و توفنگ الیندن اؤتورلندی . یئریندن ترپه نیب قاچماق ایسته رکن اؤردک لر کی قیچلاری ایپی نن باغلی ایدی چیی نین دن دوشدولر. قورد لار اونو دؤوره له میشدیلر. یوگوروب اونو دیده رکن اؤلوم گؤزونده یووا سالدی.

سیروس بیلمه میشدی کی قوردلار هئچ واخت بیر – بیرلرینی تک قویمازلار.

اوْلماز، اوْلماز، اوْلماز! / حمید آرش آزاد

عقلين كتابا آزماسا، عؤمرون هَدَر اوْلماز
هركيم‌كي باشين علمه قوْشوب، بخته‌ور اوْلماز

مين دوكتوران الده اوْلا، ميليون‌جا ليسانسين
بير اسكناسين قويروغوجا معتبر اوْلماز

آتسان قيراغا فلسفه‌ني، تاريخي، علمي
عؤمرون بوْيو كلّه‌ن‌ده قاليب، دردسر اوْلماز

استخدام اوْلور پوللويا، مين‌لرله سوادلي
علم اهلينه، هئچ پوللو جهان‌دا نؤكر اوْلماز

دلّال‌ليغي اؤيره‌نمه‌دي هركيم، ايشي ياش‌دير
سرو اوْلسا، صنوبرده، الينده ثمر اوْلماز

بؤركون گؤتور انسان‌لارين، هم باشلارا بؤرك قوْي
اوْندا گليرين آز، معاشين مختصر اوْلماز

دوزلوك نه‌دير، اوْغلان؟ نه صداقت؟ نه عدالت؟
اوْنلاركي گليب انسان اوچون سيم و زر اوْلماز

شعري، ادبي آت چؤله، فرهنگه قلم چك
چوْخ بوْش بئيين اوْلما، بئله زادلار هُنر اوْلماز

دستمال اله آل، ياغ‌دا گؤتور، بيغ‌لاري ياغلا
اوْندا تالاسان دونياني‌دا، هئچ خطر اوْلماز

خوْش داورانيشين اوْلسا، بگه‌نسه مقام اهلي
آرتار مقامين، هم اوره‌گينده كده‌ر اوْلماز

دوكتورده، مهندس‌ده اوْلارسان پولون اوْلسا
قوْرخما، باس- ها باس دونيادير، هئچ‌ كيم خبر اولماز

آنجاق بئله ايش‌لر توتاجاق سان‌كي جهان‌دا
عالم دئسين: «اوْغلان! بئله سورتوك بشر اوْلماز»!

«آرش»‌ده دوروب، تنقيد ائديرسه، اوْنو سايما
بير آزجا گؤنون اوْلسا قالين، كارگر اوْلماز

ارسال دیدگاه