دؤنگه / الهام عزیز / کؤچورن: ائلیار پولاد

    بلکه ده، او گون، او دؤنگه‎ده، او ایشیق دیره‎یی‎نین يانیندا ایشیقچی احمدله راستلاشماسايدیم، هر شئي بیر باشقا جور اولاجاقدی، بلکه ده، ایشیقچی احمد اؤلمه‎يه‎جکدی…

    بیلمیرم، بلکه ده، ایشیقچی احمد قیزمار ياي گونونده، آرانین ایلغیمینداجا اؤزو منیم قاباغیما چیخمیشدی کی، اؤلسون. اؤلدو ده.

    او دا بیر غریبه آدام ایدی. الینده پورتفئلی(چرمی کیف)، باشیندا «آئرادروم»کئپکاسی، داماغیندا «تو-۱۳۴»، بیر ده گئتدیی يئرده قفیل دايانماغی واردی -دئيردین، بو آدام بیر ایشیق دیره‌یی‌دیر و من او گون کی ایشیقچی احمدین آوازیمیش صیفتینی گؤردوم، او گون کی احمد کیشی کوچه‌نین باشینداکی دؤنگه‌ده بؤيوک «A» حرفینه اوخشايان ایشیق دیره‎یی کیمی سس‌سیزجه دايانمیشدی، -نیيسه منه ائله گلدی کی، ایشیقچی احمد بو گون اؤله‎جک، اؤلوب بیر ایشیق دیره‎یینه چئوریله‎جک…

    اؤزو ده بو سیرلی-سئحرلی گؤروش، من بیر باشقا دنيادا اولاندا باش توتموشدو. هله ده ایشیقچی احمدی خاطیرلاياندا، او گون باشیما کئچیردییم میس قازانین ایچریسینه دوشورم، محله‎میزه دییرله‌نیرم و او میس قازان دؤنگه‎دکی ایشیق دیره‌یینه ديَیب آغزی اوستده چئوریلنه‎جن قافامین اورتاسیندا دینقیلدايیر.

    بلکه ده، ننه‌م منی الی‎بوش يوللاماسايدی، بلکه ده، ننه‌م او میس قازانا آيران تؤکسه‌يدی، ایشیقچی احمد اؤلمزدی…

    من او گوندن بورا قیرخدان چوخ ياي گؤرموشم، ائله ایستی گؤرمه‎میشم. ائله بیل، هر شئي اؤلچولوب-حسابلانمیشدی، ائله بیل، هر شئي ایشیقچی احمدین قصدینه دورموشدو.

    من کی میس قازانی باشیما کئچیریب دینقیلدادا-دینقیلدادا اؤز قاپیمیزدان اؤتدوم، گئدیب کوچه‎نین باشینداکی دؤنگه‎ده ایشیقچی احمده ديَیب داياندیم، منه ائله گلدی کی، بیردنجه بیر آيری دنيايا دوشدوم، منه ائله گلدی کی، بو گئن دونيادا بیر احمد کیشی قالیب، بیر ده من. و منیم باشیمداکی میس سرینلیک بیردنجه چکیلیب گئتدی.

    تکجه اونا گؤره يوخ کی، قاپیمیزدان اؤتموشدوم و ایشیقچی احمدین طالعیندن آگاه اولموشدوم، هم ده اونا گؤره کی، ایشیقچی احمد بیردنجه بیر ایشیق دیره‌یینه چئوریلمیشدی…

    هله بو چئوریلمه‌نین واهیمه‎سی جانیمدان چیخمامیش، خبر چیخدی کی، ایشیقچی احمد اؤلوب.

                                                                                             ****

   اوچ اوغلو اوچو ده هؤنکورور، آروادلار آغی دئيیر، گلینلر کونجده-بوجاقدا هیچقیریر -من ده بو غریبه‌لیین اووسونونا دوشموشدوم. بیر سئحرلی سس منی بو اووسوندان آيیردی:

    – هله هاراسیدیر… هله هاراسیدی… قوي اوچ گون کئچسین، قوي کندین آياغی کسیلسین بو قاپیدان… -احمدین ده اتی سوموکدن آيریلسین… بیر آخشام‎اوستو، گونش يئردن چکیلنده…

    بو سئحرلی سسی مین سسین ایچریسیندن آيدینجا سئچردیم… پروانه آرواد… دلی پروانه… هر گون سحردن آخشاماجان دمیريول استانسیياسیندا ایشیقچی احمدی گؤزله‌میش، گؤزلرینه تور دوشموش… احمد ده محاربه‌‌دن قايیداندان سونرا بیر باشقا قیزا کؤنول وئرمیش، او گوندن پروانه هاوالانمیش، يوللارا دوشموش…

    بیردنجه پروانه‌نین دوداقلاری تیتره‌مه‌يه باشلادی، بیردنجه بو سئحرلی سس بیر باشقا جور ائشیدیلدی و من هله ده بیلمیرم کی، پروانه آرواد او قدر آدامین ایچینده نیيه منیم قولاغیما پیچیلدادی… پیچیلدادی و ائله بیل، اؤز سئحرلی سسی‌نین دالینجا دا چکیلیب گئتدی…

    او گئجه کوچه‌نین ساغ-سولوندا، چپرلرین، داروازالارین آرخاسیندا تالا-تالا قارالان باغچالار قاتی قارانلیقدا باتدی، کیره‎میدلی-کیره‎میدسیز ائولرین ایشیغی آرتدی، سونرا ائله بیل يئرین آلتیندان گوجلو بیر ایشیق زولاغی چیخیب کندین ایچینده‌جه اوزاندی. آدام سسی ماشین سسینه، ماشین سسی آدام سسینه قاریشدی. غریبه بیر اولارتی بورودو کندی.

    پروانه آرواد کوچه‌نین باشینداکی دؤنگه‌ده -ایشیق دیره‎یی‌نین آلتینداجا اؤلموشدو…

ارسال دیدگاه