قارانلیق اله نیر شهر باشینا
خیاوان اوزونو یاغیر گؤزلریم
نیسگیلیم جالانیر یالنیزلیغیما
شهری گیجه لیر فاغیر ایزله ریم
یوخو کوچه لری باغرینا باسیر
خاطیره ن یوخودان اویانیر منده
سؤزلرین کؤنلومو تومارلاییردی
یاغمورون آلتیندا ایتمشدیم سنده
دامجیدان آسلانیب مونجوقلار کیمی
بولود لارا ایچینده ال اله اؤزدوک
سئوگیمیز شهرده ن اوجالاردایدی
داملالار کسیلدی بیز یئره سوزدوک
یاکاموز یاغمیشدی گؤلمه جیک لره
باخیشین سولاردان آیی دریردی
سئوینجیم دؤشنیب آیاقلارینا
هر آددیم اؤنونده اوره ک سریردی
کاش اوزون اولاردی بو گئجه دئدین
قارا یاخاجاقلار آچیلسا ایشیق
گونش اویانمادان یاتدی بختیمیز
ائله بیل بو عشقی یاشامامیشیق
.
شاختا قوجاقلادی طالعیمیزی
هوپمادی دوداغیم دوداقلارینا
اینجه بارماقلارین زویدو الیمده ن
قیش قوندو سئوگینین یاناقلارینا
یئدینجی یوخونو ایچیردی شهر
یادیندا اویودو یوخویا دالدی
سازاق آنیمسادی یالنیزلیغیمی
اوزومده قیرمیزی اؤپوشو قالدی
محمد اسکندرزاده «سئیحون» سولدوز ۱۳۹۶، ۰۸، ۲۴