پريسا / عليرضا عطاران ( علي آرام )/ تورکجه یه چئویره ن : علیرضا ذیحق

 

حیکایه

” نه جور دئييم واللاه ، بئش گون دي ائوه گلمي ييب . بولموره م نئيني يه م .اوره ييم آز قالير آغزيما گله . نه يوخوم وار نه خوره ييم . ايشيم اولوب صوب دن آخشاما پئنجَره داليندا اوتوروب گؤزياشي اودماخ .”

“موفته يئره قوصصه لن مه . حتمن او سفركي كيمي گينه يولداشلاري نين يانندا دي. ياديندادي دا بير هفته يوخا چيخميشدي و سورا بولوندو كي دوسلارينان گئديب قوزه يه  !”

” بونه سؤز دي باجي ، ايلين بو واختيندا ، بوسويوخ دا دا بَيه موسافيرت اولار .”

” نئچه يول دئديم كي اَلين قوي بير قيزين اَلينه و ايشي بيتير گئت سين . آمما قولاغ آسمادين . ياني نئجه دئييم ” پريسا ” ني قابيل بولمه دين . “

“بو سؤزلر نه دي دئيي سن ، هره نين سر نيويشتي قا باخ دان بللي دي . شايد پريسا نين قيسمه تي او ايدي كي  ائله بير آيري سي نا ن خوشبخت اولا .”

سونرا سوسدي و اَليني هيچقيرتي ايله آپاردي قات كسميش اوزونه .  سسي چيخمادي آمما آريق چي يين لري  اؤرتدويوقالين شال آلتيندان باشلادي تيتره مه يه . پريسا نين آناسي  قويمادي كي  او آرتيق آغلاسين ودئدي :

” اوشاغين يانيندا آغلاما ، اوره يي سيخيلا ر . “

سگگيز دوققوز ياشيندا بير قيز اوشاغي ايدي آمما بؤيوك لر كيمي داورانيردي . بونا گؤره رنگي آزجا قيزاردي . اَته ييني صافلادي و باشيني آشاغي سالدي.

سور ادا دئدي :

” هاردا اولسا تاپيلاجاق . ائله بير اوره ييمه قويوبلار . بيرده بَيه عم قيزي سي اؤلوب دي، پريسا هاردا اولسا ايندي گَلر…  فيكر ائليره م گينه ائلي يه بيله ر جناب سَرقوردونان دانيشا كي بيله سينه بير ايش گؤره …”

قادين اَليني اوزون د ن چكه رك گؤزلري ايشيلدادي :

” دئه پريسا نين جانينا !”

پريسانين آناسي قيريشي ني پوزمادان دئدي :

” سييا وَش كي تاپيلدي گلدي ، گَرَح اؤزوم اونا بير اَل آياغ ائلي يه م . “

سونرا آرتيردي :

” دوروم هله بير چاي گتيريم . “

آياغي ميتباغا تازا چاتميشدي كي زنگ چاليندي . قيز سئوينجه ك باغيردي : ” پريسا عم قيزيم گلدي .”

سونرا اؤز باشينا قاچدي . اوزون و اوجا بير دالان دان گئچدي و قاپيني آچدي .  پريسا قيزي قوجاقلادي و اؤپدي.  سورا تَله سيك گيردي ايچه ري .  آريق ايدي و اوجا بوي . ايري قارا گؤزلري نيگه ران و قورخان كيمين ايدي . عم آروادي سينا ن اؤپوشه رك  تئزراق سوروشدي :

” نولوب دي ؟ “

عم آروادي سي اونون بو تَهر سوروشما سيندان اؤزونوايتره ن كيمي اولوب ، چَنه سي باشلادي تيتره مه يه . سونرا هؤنگورتو له دئدي :

” قورخورام بو دَفه سييا وَشين باشينا بير بلا گتيره لر . سن هاميدان ياخچي بيليرسن كي منيم جانيم اونون جانينا باغلي دي. اوشاخ لاريمين هاميسي بير طرفه او بير طرفه .”

پريسا آغزي نين سويون چتين ليك له اوداراق دايانمادان سوروشدي :

” به يه بيري بير سؤز دئييب دي ؟”

” يو خ، آمما يوخا چيخماميشدان ، قورخودان آز قاليردي باغري چاتدي يا كي گلدي و وَر وساييليني  ييغيب ييغيشديردي . فيكري چوخ كيتابلاري نين يانيدا يدي و نئچه سيني آپاريب حَيَط ده اوددادي.  قالان قولانين دا آپاردي يولداش لاري گيله .

پريسانين آناسي مَژمه يي يه دوزدويو  چاي لاري نان گلدي و گلمه ك همي دئدي :

” بوتون تقصير لر دوسلارين نان سو ايچير كي فيكير لر ي خَرابكار ليخ دي. “

بو سؤزلر آغزي نين ازبري ايدي . هئي اوتوروب دوروب دئييردي كي بير عيد ده خرابكار و مَملَكةتين خا عيني . بو سؤزلري ده پريسا نين اَرين نن اؤرگش ميشدي.

” كلانتري يه  هئش دئييب سن ؟”

“هر هارا دئسه ن گئتمي شه م …”

پريسانين آناسي دا اونون سؤزونون دالين توتدي و دئدي :

” يو لداشلارينا دا هئش باش ووروب سان .”

” هانسي يولداش لار آخي ؟ او واخ دان كي رحمت دي يين ايلي چيخدي ، بالام دا عوض اولدي. نه بيري نن گئت گل ائليردي و نه ده آياغين قاپي دان ائشي يه قويوردي .”

پريسا بو سؤزو ائشيد جك آز قالدي اوره يي گئده و بير آن اؤزون ده اولمادي .  قلبين دن كئچدي كي اولمايا مرز دن قاچاندا توتولوب ائلي ييب دي .

ياسا گلن لر قبير اوستون دن قاييداندا  ائده بيلميشدي كي بير تَهَر لي يين له سييا وَشي كنارا چكيب چاديراسيني دوزه لتمك با هاناسي نان باشيني يوخاري توتا :

” پس اؤز تصميمين توتوب سان ؟”

سييا وَش ده باشيني دَبه درك  اوزونوآتاسي نين  قبرينه ساري توتوب دئميشدي :

” ايندي يه جان دا دؤزموشدوم كي بابا مين ايلين توتاخ .”

پريسانين گؤزو دوشموشدي بير قَلمه آغاجينا كي يارپاق لاريني تؤكموشدي.

” من قورخورام … اؤزوم نن چوخ سن نن نيگه رانام . “

سييا وش اونون باخيشي نين ايزين توتاراق اِهمالجا دئميشدي :

“اَيه سن ده من نن گلسه ن گئده ريح بير يئره كي هئش كس بوله مه زي تاپانمي يا .”

” يوخ …ائلي يه بولن مه ره م . دا ايش بو سؤزلردن گئچيب .”

ديلنچي بير كيشي اون لا را ياخين لاشيب پول ايسته دي . پريسا كيفين دن بير ايسكيناس چيخاريب اونا وئردي . سيياو َش ده جيب لريني آختاريب خيردا پولو كي  چوخ آز ايدي اوتا نجاق اونا وئردي.  اودا يئيين – يئيين دوعا ائلي ييب اوردان اوزاقلاشدي.

سييا وَش بير چئشيد له كي سئوگي و نيفرت سؤزلريند ن ياغيردي دئدي : “

” باش چيخاتمي رام كي او سوپانين نه يين نن خوشون گلدي كي اؤزون آتدين قوجاغينا . سن كي پولَه كي بيري دَيي دين . اصلن بولورسن اونون اصلي ايشي نَدي و او پوللاري نَدَن اونا وئريللَر!”

پريسا درين دن بير نَفَس آليب و گؤزلري ياشاردي .  ايسته دي دييه اَري فَغَط بير دؤولت مأ مورو دي. آمما دينمه دي . شايد ده اوره يي نين دردي دويونو بوغازي نين يولون كسميشدي. دؤره بره باخاركن گؤردو كي جماعت ده قبر اوستونده ن يولا دوشه رك با لا – با لا مينيرلر ماشين لارا . سونرا اوره ييندن گلر گلمز دئدي : ” دا گَرَح گئده م . مومكون بيري بيزي گؤره . “

آمما  سيياوَش اوندان آيريلماميش كيفين دن بير دوسي يه چيخاريب پريسا يا طرف توتدي :

” دوغرودا ن بونوبيله مه ساخلي يا بيلرسن ؟ قورخورام كي من اولمويام و ايتيب با تا . “

پريسا اَل قولونو ايتيره رك گؤزلري نين ياشين سيلدي و دئدي :

” قوي ائوه اؤزوم گليب مامان نان آللام . “

 ايندي كي بيلدي سيياوَش قاچيب دي ، او جوزوه دن سؤز اچاراق عم آرواديسي دئدي منه بير زاد وئر مي ييب . اوّل ده بير آز شوبهه لندي آمما سونرا فيكرينه گلدي كي حَتمن اؤزو ايدي كيسييا وَشي پئشما نلاديب دي. ايندي بو ايش  له شوبهه سي لاپ چوخالميشدي و  اولمايان نيگه ران چيليق لار فيكرينه گليردي . بير دويغو كي بالا- بالا يئريني قورخو و ايضطيراب توتوردي .

اونا گؤره كي بو قورخولي دويغودان جانيني قورتارميش اولا ، باشيني قاغزاركن باخدي عم آرواديسينا . اونوگؤردو كي ديل دوداغي دربه شيري و اؤز اؤزونه بير سؤزلر دئيير. سونرا داگؤزلرين دن بير نئچه ياش داملاسي آخدي.بو دفعه حيسّ ائتدي كي اوره ييندن بير زاد قالخاراق بوغازي تيخيلان كيمي اولدي و باشيني  دايا دي موبلا .

پريسا دوردي گئتدي ميتباغا و بير مئژمه يي چاي ايله قاييتدي.  بير ايستيكان چاي قويدي اونون قاباغينا و باشلادي دانيشما غا كي بلكه بير جور اونون قوصصه لريني داغيدا .  تَزه د م چكميش چايين ايستي بوغو غَم لي هاواني آزجا يوموشاتسادا آمما پريسا نين اوره ك سيخيني لاريني هئچ آزالتمادي .گئتديكجه ايضطيرابي داها آرتيردي. بيلميردي نييه بو حالا دوشوردي. عم آرواديسي چاديراسيني آريق ديزلري نين اوزه رينه چكر كن اَل اوزالتدي قددان دان قند گؤتوردي و چايي داغ – داغ  ايچدي.  پريسا نين آناسي دا دئدي :

” اينشاللاه تاپيلار.”

سونرا بيرگه حا لدا گؤزلريني تيكديلر هاوايا . گؤي اوزه رينده توتقون لوق و قا رالتي دان باشقا بير زاديوخ ايدي. سونرا ديل اوجو دئدي :

” نه ده هاوا سويوب دي. “

پريسا ، عم آرواديسي نين اوزونه باخاركن اونون رنگيني  آغارميش و قاچميش گؤردو .

” دا پاييزين آخير لاري دي. “

بو سؤزي پريسا نين آناسي دئدي .

پريسا ائله بير دويغو يا شاييردي كي سانكي نَفَسي دوشموشدي شوماره يه .  قورقوشوم لي بير باتلاقا دوشه ن كيمي گئتديكجه درين ليك لره باتيردي.  عم آرواديسي  سونكي چاييني ياريمچيق ايچيب و آياغا دوردي. يون شاليني بوينونا و چييني نه دولاييب چاديراسيني چكدي باشينا و يولا دوشدي.  تازا ايستيردي چيخا ديشاري كي سويوقدان ديش لري بير بيرينه دَييب باشلادي تيتره مه يه .

پريسا اونو كوچه قاپي سينا جان يولا سالدي.

عم آرواديسي سون لحظه دؤنوب وتيكرارحالدا دئدي :

” سن اول عمين روحو اگر ائلي يه بيلسه ن سيياوَشي منه قئيته ر .”

پريسا چا ليشدي كي بير سؤزدييه آمما ديل دوداغي قورودي و گؤيرميش دواقلاري آراسيندان بير سؤز چيخمادي. سونرا باخدي اونون اوزونه كي اؤلولر كيمي اوزونده هئچ رنگ يوخ ايدي.

عم آرواديسي ائو دن چيخان كيمي اَرينه تيلفون آچدي و چون ائشيتدي كي بو گئجه تئز گله جك دي سئويندي. ائوه كي تئز گلردي دئييب دانيشماغا  آزجا دا اواساحؤوصه له سي اولاردي.  لازيم ايدي كي بير داها اَرين دن ايسته يه كي اونا يارديم ائده . سيياوشين باشينا بير ايش گلسه ايدي ياماشاق بيله سينه  معناسيز اولاجاق ايدي.  ايسته دي اؤزونو قانع ائده كي اَري گينه سؤزونه باخاجاق دي.  بوندان بئله گينه ايضطيرابي اؤزون دن اوزاقلاشديرانميردي.  بو نيگران چي ليق لا قاريشان دويغو گئتديك جه بَتَرله شير دي.

آزجا كئچميشدي كي ائو لرينه گئتمك قرارينا گلدي. آناسي نين ائوي سويوق ايدي .آمما اؤز ائوينده راحاتجا ائده بيله ردي شومينه نين ايستي سينده گؤيلو ايسته ين كيمي جانيني قيزديرا . آناسي نه قَدَر دئدي هله بير آز اوتور سونرا گئده ر سن قولاق وئرمه دي وچيخدي كوچه يه .

ديشاري دا بَرك يئل اَسيردي. آغاج لارين يارپاق سيز بوداق لاري قامچي كيمي بير بيرلرينه دَييب و تك توك قالان يارپاق لاري  اوچوردوردي. تاكسي داليجا گزه رك گؤزو ساتاشدي بير قَلَمه يه كي بيرقارقا اونون لوت  بوداقيندا اوتورموشدي. غم قوصصه سي داها آرتيق جانلاندي.

ائوه نه جور گئديب چيخماسيني هئچ بيلمه دي. آچاري كيفين خيريم خيردا سي ايچيند ن  آختاريب تاپماسي دا  چوخ چكدي. قاپيني آچاراق يئل بوران پالتارلاريني جانينا ياپيشديردي. سونر ادا دام يولونون پَنجَره سي شيد دَت له چيرپيلدي بير بيرينه .اورا ني هم مه شه آچيق قوياردي كي ائوين هاواسي عوض اولسون . اَليني سورته رك برقين كيليدين تاپدي  و پيل له لري چيخاراق گئتدي پَنجَره ني باغلاسين.هله ايشي بيت مه ميشدي كي دولو  باشلادي ودَنه لري توخوندي پنجره نين شوشه سينه .

گئتدي هالا . اورانين دا چيراغين يانديردي. يئل اووولدوردي و ايستيردي كي نه جور اولمالي دي اؤزونو با سا ايچه ري. سئويندي و گؤردو كي اگرآزجا يوبانسايدي  بو بوران دا و ياغيش دا چتين ائله يه بيله ردي ماسين تاپا.

ائو سويوق ايدي. هاميدان اوّل پالتوووني چيخارتدي و آسدي كومودون آيناسيندان . سونرا گئتدي شوفاژا ساري و د رجه سيني چوخالتدي. اؤزونو سالدي قارا رنگ لي موبلون اوستونه و قالدي بو فيكره كي نئجه ائده بيله ر اَرينين گؤيلون اَله گتيره كي لَجه دوشمه يه . بيليردي كي چوخ لجبازدي و سيياوَدن ده نيفره تي واردي. آمما  اَري بيله سيني او قَدَرايستيردي كي بو سؤزون ده يئره سالمايا.

فيكري جومدي كئچميشه و اونا ائلچي دورا ن گون لر يادينا دوشدي. او واخت لاردا ائله بوگونلر كيمي پاييزين آخيري ايدي. عجيب ايدي كي اونون يئني ياشامي پاييز لا باشلا نميشدي . او اوزون لو و سويوق گئجه لرده . نئچه هفته ايدي سيياوَشي توتموشدولار و كيمسه بيلميردي هاردادي و باشينا نه گليب .  هئچ كسين اَليندن بير ايش گلميردي.  شايد اگر عمي سي ديري اولسا يدي  ايش بورالارا چكمز دي. ائله او واخت لار ايدي كي اَري بيله سينه ائلچي دورموشدي و اوزدن گئده ن دئييل دي. سؤز وئرميشدي كي اگر اونلا ائولن سه سيياوَ شي زيندان دان قورتارا .آمما بير شَرط ايله كي اونو داها هم مه شه لي يه ياددان چيخاردا .

 نييه اونون ايسته ك لرينه بويون اَي دي اؤزوده لاپ ياخشي بيلميردي. شوبهه سيز كي سيياوَشه خاطير ايدي و تو تولماسي چوخ  اؤنملي ايدي و مومكون ايدي كي باشينا بير بلا گله . اوقَدَر اونو سئويردي كي اونا خاطير اؤزون دن كئچمه سي نه راضي اولموشدي.

شايد اگر عمي سي اؤلمه سه يدي بو زور ائولي لي يي هئچ واخت قبول ائتمز دي.آمما او اؤز قرارينا گلميشدي و ايلك دفعه  فيكريني عم آرواديسنا دئدي. سونرا دا اوندان ايسته دي هامي يا دييه  كي اونون هئچ واخت سيياوَش له پريسانين ائولن مه لرينه راضي ليقي يوخ ايدي.

هر زاد چوخ تئز اوز وئردي و سييا وَش ده زيندان  دان قورتولدي.  سونكي هفته نين جومعه آخشامي سي دا شيرني ايچيله رك كبين كسيلدي و هرايش بيتدي. سانكي هرزاد بير اويون ايدي. توي گئجه سي گلين دونو گئيمه يه كؤنول سوز ايدي.  هله ده بيلميردي نه جور اولدي كي گلين دونو گئيدي. شايد اؤز خايال دونياسيندا اؤزونو عم اوغلوسو لا ائولي سانيردي. ايسته دي ده گئيمه يه آمما قايناناسي اوزونو بوزدي و قابان ديشيني قيجاراق  مسخره حالدا گولدي و سس كوي سالاراق دئدي :

” اونون سؤزونه قولاغ آسما . تويون گؤزل لي يي و شوقونو ائله آغ گلين ليك ده دي. “

آمما اَري اؤز سئوگي سيني اونا گؤسترمك اوچون ايختيياري وئردي اونا . بيله سيني آزاد قويدي كي نه جور ايستيرسه گئيين سين . اَرينين بو تَرپه نيشي اونوسئوينديردي و گؤردو اوجور ده كي گرك بو سئچيمين ده ايشتيباح ائتمه ييب و اونلا ياشاماق دا چوخ اوزوجي دئييل . اَري  ايذين وئردي كه درسيني تاما م لايا و اونيورسيته يولداشلاري نان هردن گزيب دولاشا .  اوره يي بوايش لره خوش ايدي وانون لا ياشاماغي  چوخ چتين  و آغير گؤرموردي. اونيورسيته دن چيخماق هَمي اؤزونو ائوه يئتيريب باشليردي سيليب سوپورمه يه ، خوره ك پيشير مه يه و نفت سوبا ني يانديريب  اَريني گؤزله مه يه .

تا كي او حاديثه اوز وئردي. اونيورسيته لرده اعتيصاب باشلاندي و اوندان سونرا اعتراض لار چكيلدي خييابانلارا و سبب اولدي كي هر ياندا توت هاتوت باشلانا .  بوايشين ته تيم مه سي  ده بير تَهَر چكيلدي  ائولرينه . اوّل قويمادي كي اونيورسيته يه گئده و سونرا مجبور ائتدي كي ايليشگي سيني يار يولداشينا ن كسه وبيرده عمي سي گيله  گئتمه سيني بير يوللوق ياساقلادي. حتتا بو ويلايي ائوه چكيله ن كيمي بوتون قوهوم لاريندان  فقط آناسي نين حاققي وارايدي كي  بوائوه گليب گئده . باهاناسي دا اوايدي كي اَمني يَت لري تهلوكه يه دوشه ر و ياخشي اودي كي كيمسه بيلمه يه هاردا ياشايير لار .

بو آخيرلاردا اخلاقي  دا لاپ دَييشيلدي. چوخ واخت لار حؤوصله سيز ايدي و تئزعصب له شيردي. داها اونون لا دا باش باشا قويوب ساواشماق دان چكي نه جه يي يوخ ايدي.

دفعه لرجه چاليشميشدي كي بلكه هر زاد قاييدا اوّل كي كيمي اولا. اونا گؤره او ائوه يئتير جك قا با غا گئديب سلام وئريردي و و اُوِر كوتون آليب اوزونه گولو مسوردي آمما يئنه به فايدا اولوردي.  آغير جواب وئريردي و قاش قاباغينان پالتار لاريني دَييشيب و دينمه ز سؤيله مز اؤزون ساليردي قارا موبلون اوستونه .  اونون  بو تَهَر داورانيشي و هئچ هئچينه باهانا توتما لاري  گونونو قارالتميشدي. بير جوره روحسال خسته ليك ده اوندا گؤرسه نيردي اودا او بوكي گؤزو هئچ دونيا ماليندان  دويموردي. اَله گتيردييي مال دؤولت نظرينه چوخ آز گليردي.

داها ائولن ديك لري نين او باشلانيش گونلرينده اولان ديلخوش لوق  لاريندان خبر يوخ ايدي. شيرين ليك لر بوخار اولوب يئريني آجي ليق لار و معناسيز ليق لاردولدورموشدي.  آمما هله آزجا اومودو وار ايدي. بيلميردي اومودو نه يه دي و نييه هله بو اومودو ياشاييري.  شايد ايسته ميردي كي ياشاميني بوندان دا آرتيق داغيلميش گؤره. بونا گؤره ده هئچ واخت سييا وَشين سؤزلرينه كؤنول دن علاقه گؤسترميردي. هر سفر كي او ايستيردي بيرليك ده ايران دان  قاچيب گئده لر بير جوره بوروق وئريردي. تا كي فبير اوستون ده اونون اَلينه پاك سو تؤكوب و ايسته دي كي اونو بير يوللوق اونود موش اولسون .

ايلديريمين شاخماسي و گؤز قاماشديران بير ايشيق ائوه جالانماق لا، او بير لحظه اؤزونه گلدي.  سونرا ايلديريم لارين دال بادال شاققيلداماسي اونو قورخويا سالدي. هؤله سَك ديشاري باخدي. ايلديريم برق ويرديقجا گؤي اوزو ايشيقلانيردي و ياغيشين يارماچالارين گؤروردو كي پنجره نين حامينا چيرپيليردي . اوندان بَتَر يئلين و بورانين كوفولتوسو ايدي كي ايندي لاپ آيدينجا سينا ائشيديليردي.

چوخلي گئجه لري يالنيز قالسا د ا  ايندي يه جان هئچ زاد دان قورخماميشدي. بيليردي كي ائوين قاپ باجاسيندان كيمسه ايچه ري گيره نمزدي. آمما بونلا بئله بو گئجه ني قرارسيز ايدي. همده جانيندا بير اوشوتمه دويغوسو وارايدي. شوفاژ ائوين جانيني هله ياخشي قيزدير ماميشدي. دوردو آياغا و بير نئچه تيكه اودون كي اوجاغين يانيندا ايدي قويدو شومينه نين ايچينه وچاخماق لا آليشديردي.  سونرا فيكرينه دوشدي كي اَي نيني قالين لادا . اؤزونو يئتيردي كومودا كي  بوينوخزلي گؤن پالتوووني گييه. پالتووي گؤتورمه دن گؤزو ساتاشدي اَري نين نيظا مي اُوِر كوتونا . قورخدو كي  اوباهالي پالتووي اَزيشيب چيح له نه واُوِركوتي چي يين لرينه آتاراق گئتدي ميتباغا . ميتبا غا گئتمه ميش آينادا اؤزونه باخيب و گؤردو رنگي اوكي وار قاچيب دي.  آمما او قَدَر فيكري پيرتلاشيق ايدي كي نيگه ران قييافه سي و قورخويا دولموش گؤزلري  نظريني اؤزونه چكمه دي.

گئتدي چاي دَ مله يه كي شايد بئله ليك له باشي دوموك اولوب قورخوسو تؤكوله . هله اوشويوردي. حتتا ديش لري ده اِهمالجا بير بيرينه دَييردي.

ميتباغا يئتيرنده گؤردو كي چوخ سئوديگي و اوزون سوره اونا باخديقي گولدان دوشوب سينيب دي.  يئل ميتباغين آچيق پنجره سينه توخوناراق اونو سالميشدي يئره و موزاييك له ره دَيه رَك قيريلميشدي.  تزه بيلدي كي ائو نييه بو قَدَر سويوقدي و چكيب پنجره ني باغلادي.  سونرا نايلون بير سطيل گتيريب تورپاق لاري تؤكدي ايچينه وسينميش گولو اَكدي اونا . دوعا ائتدي قورومويا . چايداني دا دولدوردا سويا كي قويا قازين اوستون ده قاينايا.

ميتباغ دَيميشدي بير بيرينه و قاپ قاشيقي يوماغا حؤوصله سي يوخ ايدي.  باخدي ساعاتا . هله سگگيز اولماميشدي. دوزدور كي اَري تيلفون دا دئميشدي تئز گله جك آمما بيليردي كي دوققوز- دوققوز ياريم دان تئز گرك اونون گلمه سيني گؤزله مه يه .

داها اوشوموردي. شومينه نين جانا ياتان ايستي سي بيله سينه خوش گليردي.  ائو قيز سادا گونده كي آراميش  دن داها خبر يوخ ايدي.  داريخيردي آمما بيلميردي نئيله سين . ائوده ائله بير كيتاب درگي ده يوخ ايدي كي باشيني  اونلا دوموك ائله يه . اَري نين كيتاب درگي ايله آراسي يوخ ايدي. دئييردي آدامي يول دان چيخاردار و كيتاب اوخوماغا هئچ علاقه سي اولمازدي.  هردن ده كي مزاح لا سوروشاردي افسر ليك دؤوره سينده  هانسي كيناب لاري اوخويا رديلار جاواب وئر مه دن  گوله ردي.

او معمولي بير عائيله دن اولسا دا عمل لري چوخ چتين كئچه ردي.  دوز اوصوللي درس ده اوخويانماميشدي. آمما هوشلي ، لجباز، حيرصلي و سؤزونو يئري دن بيري ايدي. باشاري سي نين سيرري دا ائله اوندا ايدي. اَلين ده اولان ايمكانات دان  سون درجه فايدا لانماغا چاليشاردي.  حتتا تئز ليك له او قَدَر ترقي ائتدي كي اولدي سر قورد. اؤزوده هئچ واخت اَي نينه يونيفورم گئيمه دي. آمما عَوَضينه نئچه اؤنَملي ايشي واريدي كي گاهدان هفته لر له ائوده تاپيلمازدي.دئميردي نئيله يير و ايشي ندير. اودا چوخ اوستون ويرميردي. سونرا دا اوپول لار ايله كي دئييردي او ايش لر دن و مأموريّت لر دن آلديقي معاش لارين گليري دي گلدي بو ائوي آلدي. ويلايي بير ائو كي هر جوره ريفا ه اوردا وارايدي.

بيرگون كي اونو ماشينا مينديريب گتيردي بورا ، غورور لا ائوين هر يئريني اونا گؤستردي و دئدي:

” بوردان خوشون گلير ؟”

آمما اونا بو شئي لرين چوخ اؤنمي يوخ ايدي. بونلارين عوضي اوره يي ايستيردي ايستي و صميمي ايليشگي لري اولا .حتتا نئچه يول بونا خاطير سؤزلري اولدي. آمما فايداسي يوخ ايدي.  هر واخت دا بيله سينه دئييردي كي” اولماز گئجه لري تئز ائوه گَله سن “اواَليني چيرپيردي قارا گؤن موبلون اوزه رينه و دئييردي :

” اوشاغ اويونو چيخارتما ، سانكي بو ياشا مي ميزين چرخي ائله موفته فيرلانير .”

” منيم بئله نكي بير حيات دان خوشوم گلمير .”

” بَيه منيم اؤز اَليم ده دي ؟”

سونرا دلي لر كيمي آياغا قالخيب چاخ ويرا – ويرا سسله نيردي :

” ايندي وضعيم ياخچي دي و گئتدي ييم مأ موريت لر ترقّي يوللا رين اوزومه آچيري. اَيه بيرآز كاهيل ليغ ائلي يه م يوزلر نفر وارديلار كي بو ايش لري گؤي ده قاپالار . اوزامان گَرَح اؤله نه جان يازيق آداملار كيمي گئچي نَح .”

و او ديلخورلوق ايله دئييردي :

“بو يول كي دوز بير يول دَيي!”

و سونرا باشيني آشاغي ساليب سؤزون داليسيني بئله گتيريردي:

” كي بير پارا گوناه سيز آدام لارين  جاني نان اوينا ماقلا آدام ترقي ائلي يه …”

بونو كي دئييردي اَري ايت اولوب چيغيريردي :

” فيكر ائليرسن ايشكنجه ائلي يه نه م ياكي رواني بير نوخوش ؟ يوخ جانيم ، بو ايش لر كي گؤروره م هاميسي وظيه دي.  … بيرده او آدام لار كي او ايش لري گؤرور لر بَيه كيم لر ديلر ؟”

” كيم لري دئيير سن ؟”

“همين بو ترورچو خرابكار لاري دئييره م و او جوانلار كي  قوشولوبلار اونلارا .”

بورا چاتديقدا داها سؤز يئري قالميردي.  بيليردي كي  داها اونون بئينينه سؤز باتما ياجاق دي.  بو پَت لش مه يي بيتيرمك اوچون سؤزون كسيردي و اَل لريني اُووت لارينا قويوب باشلاييردي آغلا ما غا :

” قوي سن دييه ن اولسون قال ياتسين . من بو ايش لردن هئش باش آچانميرام .”

شومينه نين آلاو لانميش اودون لارينا گؤز تيكدي. ايندي قانيردي كي نييه هر واخت اونيورسيته دوسلاري نين آديني چكه رك او نون عصب لري پوزولاراق دئييردي :

” اوننارين دوسلوغا لياقت لري يوخ دي. “

فيكريندن كئچيردي كي كاش سيياوش اؤزونو تئزليك له بو درد سر دن قورتاراردي و باشينا ايش آچمايايدي. بو دوشونجه لرله نيگه رانچي ليقي آرتاركن پيس يومني اولماسين دييه ايسته دي ديليني ديش له يه كي بَتَر دن بير ايلديريم آتدي و او ديكسه ندي.  ائله او آندا نئچه بير باشقا ايلديريم داها ويردي و آغ بير ايشيق هر ياني پاريلداتدي . سونرا قولاغينا بير سس گلدي كي سانكي  قوجامان بير آغاج سيناراق دوشدي كلّه سينه . ظني ده دوز ايدي چونكي او آغاجين قيريلميش بوداق لاري دوشدولر پنجره نين اوستونه .

قورخموش قارا گؤزلريني تيكدي پنجره يه .هله بيرآز كئچمه ميشدي كي چيراغ لارين ايشيقي آزالدي. سونرا  ائوين هرياني اؤلومجيل بير قارانليقا باتدي. تكجه شومينه نين جان سيز ايشيقي ايدي كي اؤز دؤوره بريني ايشيلداديردي. نظرينه گلدي آغاجين سينماسي ايدي كي الكتريك سيم لر ين قيريلماسينا سبب اولدي.

شوفاژخا نانين دا سسي باتميشدي و سوكوت اونو قورخودوردي. يئلين كوفولتوسو داها آيدين قولاغا چاتيردي. اوندان پيس شيديرقي ياغان ياغيشين سسي ايدي كي ايينه كيمي بئنينه باتيردي و اونو لاپ زارا گتيرميش دي. نه واختاجان قورخودان قورويوب بير يئرده  قالديغيني  اونوتموشدي.اؤزونه گلدي و گؤردو اوتوروب باخمادان بير ايش چيخماياجاق .شومينه نين آلاوي گئتديكجه آزاليردي و گئجه اؤزونو ائوه ساري چكيردي.  اودون سؤنمه سيله سويوقون ائوه كؤچمه سي چوخ اوزون سورمه يه جه ي ايدي.چتين ليك له دوردي آياغا كي گئديب زئر زمي دن اودون گتيره .

چاخماقي آليشديردي و اِهمالجا ائندي زئر زمي يه . چاخماقين ايشيقي آياق لاري نين آلتيني آنجاق ايشيقلانديرسادا عوضينه تيتره ك كؤلگه سي بئتون لارا دوشوب بؤيويوب كيچيليردي. چَنه سي باشلادي اَسمه يه و بو اَسمه يين سببين سويوق دان بيلدي قورخودان يوخ .  آدديم لاريني ياواش – ياواش پيل له لَره قويورديكي  قارانليق دا قيچي زوو مه يه .

زئر زمي يه كي گيردي گؤردو يئر ياش دي. قورخدو كي اودون لار ايسلانا . بيليردي كي اودون لار سردايبن يانيندا يئره دوزولوب لر . گؤزتله يه – گؤزه تله ي باشماق لاري ايسلانما سين دييه ايره لي گئتدي. چاخماقي قاباق ليق توتدو كي ياخشي گؤره .آمما بير دن بيره گؤزو ساتاشدي سردابين قاپيسينا كي آچيق ايدي.  بو دوروم اوچون حئيره ته داليب فيكرينه گلدي كي حتمن اَري نين ياديندان چيخيب  دي اورانين قاپي سيني باغلايا . آمما بو داچتين ايش ايدي كي او اوراني باغلامايا .  كيمسه نين اورا ياخين لاشماسين ايسته مزدي هاردا قالسين كي قاپيسيني آچيق قويا كي بيري ده گيره اورا . اوراني گؤرمه يه نئچه يول جان آتسادا  اَري باهانا گتيرميشدي اوردا اسلحه  و نيظامي مدرك زاد واردي كي مومكون دي  بيله سينه خطري اولا . اودا چوخ باش قوشما ميشدي و هئچ واخت اورا ياخين گئتمه ميشديدي.

آزجا اؤزونو تا پان كيمي اولوب بيرنئچه  پارچااودون گؤتوروب قاييداندا ، ندنسه ايسته دي  سردابا دا گؤز آتا.  كؤهولون قاپي سيني آزجا آرتيق آچاراق   اوره ك دؤيونتوسو آرتدي آمما يئنه باشيني  اوقيركيمي قارانليقا اوزالتدي. چاخماقين ايشيقيندا بير نئچه ميز صندل گؤر سه ده ميزين اوستون ده بير شئي گؤزونه دَيدي. فيكريني اورا وئره رك قورخوسو دا قاچميشدي. ديق قَت ائتديك ده بير نئچه كيتا ب گؤردو كي قالانميش دي اوست اوسته .  چاخماغين ايشيقيني دولانديرديقدا گؤزو دَيدي بير دوسي يه كي قبير اوسته سيياوَش ايستيردي اونا وئره . جيلدي آزراق جيريلميشدي و اوستو لكه لي ايدي. قان لكه سي كيمي.  تانيلماز بير آغري اوره ييني جايناغينا آلدي.  حَداغا دان چيخميش گؤزلري له دوسي يه باخدي. ايسته دي اونا ديق قَت ايله باخا كي قولاغينا بير سس گلدي . قولاقلاريني شوشله دي آمما فقط يئلين كوفولتوسي له ياغيشين سسين  ائشيتدي . بيرده ايسته دي  اودوسي يه يه با خا  كي باياقكي سسي بيرده دينله دي .  بو سفر سس آيدين راق ايدي . بيري نين آياق سسي ايدي و پيل له لردن اوسته چيخيردي . اؤزو ايدي . اَري ايدي. آدديملارين سسي قولاغينا تانيش ايدي . تئز اؤزونو ييغيشديراراق تله سيك اوردان چيخدي . اَري گرگ اونو اوردا گؤرمه يه يدي. قورخاراق نئچه يول اَريني چاغيردي.   اونون سسي گلمه دي و عوضينه زئرزمي نين بالا پنجره سي بَتَر دن سس لند ي. جانينا قورخو دوشدي و قاچدي پيل له كانا ساري. آمما پيل له لره چاتماميش هؤله سك آياغي زوووب ييخيلدي يئره . سونرا دا چاخماق اَليندن دوشوب آغري دان آزقالدي چيغيرا .نئچه يول يارديم ايسته سه ده اؤز سسيني  آز قالااؤزوده ائشيتميردي.  يئره ياپيشان كيمي اولوب آغلاماغا باشلادي.  بوتون بَدَني سو اولموشدي و سويوق بيله سيني لاپ كيريديردي.

اوولانميش بير قوش ايدي اووچو اَلينده و اَلين دن هئچ بير زاد گلميردي.   سانكي قافاسي هئچ چاليشميردي و اوجا سس له فقط آغليردي. بيردن بيره گوردو قاماشديريجي بير ايشيق گؤزونه دوشدي. سونرا دا گوجلو بير اَل او نو يئردن اوزوب ديك قاغزادي. اوره يي سينه ده ائله چيرپينيردي كي آز قا ليردي آتيلسين ائشيي يه . آمما اري نين سسيني دويان كيمي آزجا جان تاپدي.  اؤزونو بير قولاي آياق اوسته ساخلاييب حيرصيني اوداراق گؤز ياش لاريني اوزون دن سيلدي.

اَري قولتوقلاريندان ياپيشيب پيل له لردن اوسته چيخارداراق چيراغ قوووه ني يانديردي. ايشيقيني اونون اوزونه سالاراق  ” زئر زمي ده سنين نه ايشين واريدي ” دييه   قاش قاباغي نان سوآل ائتدي.

هيچقيرتي ايله دئدي :

” اوشويوردوم گئتديم اودو ن گتيره م .”

” سردابا كي گئتمه دين ؟ “

بير سؤز دئمه دي. بئيني چا لخالاناركن اومود سوزلوق بيله سيني اوزوردي. . اَري گينه باشلادي چيغير ماغا و  ايضطيراب لا سوروشدو :

” سوروشدوم كي  سردابا گئتدين يا يوخ ؟  “

ايسته دي دييه سيياوَ شين جوزوه سي اوردا نئيله يير كي  دانيشماغا گوجو اولمادي. حيس ائتدي كي اَري نين سيياوَش دن خبري واردي و بوغولموش بير سس ايله اَل لريني اوزونه قويوب دئدي :

” دئه گينه كي باشينا بير اويون گتيرمي ييب سن ؟ “

اَري بير زاد دئمه دي.  آزجا سسيني ائنديردي و داياندي قاپي يا .  باخدي اونا و گؤزلري ، پريساني  قورخوتدي. اَل لريني جيبينه قويدي. باش بارماغيني اويناداراق قاباغا گليب اونو قوجاقلاركن اِهمالجا قولاغينا پيچيلدادي:

” اينان كي هئش كيم ايسته ميردي با شينا بير ايش گله .  موقَص صير اؤزو ايدي. لژباز و كلَه شا خين بيري ايدي.”

اریِ نين آغزيندان چيخان  بير پيس قوخو  او كلمه لرله قاريشاركن ، باشيني گيجه لتميشدي.  حيسّ ائتدي كي او اَري نين سسي د ئييل . همان كي بيرگون عشقيني اونا سالميشدي.  سسي چوخ  ايتي و كسيجي ايدي . جاني نين لاپ درين ليك لرينه جان، اوسس ايش ليردي. نه ائده جه يينه قالميشدي. نه جوره عم آرواديسيا دييه جك ايدي اَري يارديم ائتمه دي  كي هئچ اونون قاتيل لرين دن بيري دي. دوشوندي كي بوندان سونرا ياشامين اونا هئچ اؤنه مي يوخ دي.  ايچينده بير نيفرت دويغوسو اوياندي. ايسته ر ايسته مز باشيني قاغزادي كي سون بير دَفه اولورسادا  ارينين اوزونه باخا . آمما چيراغ قووه نين قاماشديريجي نوري ، قويمادي بير زاد گؤره . بير جسارت له كي اؤزونه ده عجيب ايدي باغيردي :

“او لعنت اولموش ايشيقي چؤنده ر اويانا .”  اَري بير زاد دئمه دي آمما چيراغي سؤندوردي.  شومينه نين يانار آلاوي نين ايشيقي دوشدو اَري نين اوزونه . ايندي يه جان اونو او جور قورخونج گؤرمه ميشدي. يئرين دن قالخدي و اَرين دن فاصيله آچدي.  سونرا اؤزونو كومودا يئتيره ركن گؤن پالتوووني  گؤتوروب چيخدي ديشاري. كوچه ده گئده ركن اَري نين سسيني ائشيتدي :” بو شاختادا هارا گئديسن ؟ “

جاوابيني وئرمه دي و اؤزونو يئتيردي خييابانا . ياغيش و كولك اوز گؤزونه توخونسادا هئچ سايمادي.  اریِ نن بير ائوده اولماق اونو داها آرتيق قورخودوردي . هدف سيز گئديردي.  چارراها يئتيرمه ميش  ايسته دي كئچه خييابانين او اَلينه  كي بيرماشين اوزاق گؤروملو يوخاري چيراغ لاريني سالدي اونون  اوزونه . گليب اؤزون تاپانا چوخ گئژ اولدي.   هاوايا آتيلماميش دان تورموز سسلري قو لاغينا دوشدي واؤلدوروجو بير آغريني، تكجه، بير نئچه آن حيس ائده بيلدي.

۱۳۸۶ آلمان

عطاران

ارسال دیدگاه