گلین یازاق دردیمیزی / آراز زنگانلی

منیم دردین سنین دردین
سنین دردین منیم کیدی
منیم دردیم ائلین دردی
ائلین دردی بیزیم کیدی
گلین یازاق دردیمیزی

قارشیمیزا آلو یاغیر
بیز یانیریق فاغیر فاغیر
قم یوکوموز آغیر آغیر
درد بورودو سئوگیمیزی
گلین یازاق دردیمیزی

پارچالانیب توپراغیمیز
یوز داغ اولوب بیر داغیمیز
اولماسادا دایاغیمیز
بوراخمایین بیر بیریزی
گلین یازاق دردیمیزی

مورگوله مه دور آیاغا
قلم گوتور گل دایاغا
کلمه کلمه یاز واراغا
نزمه چکین ایندیمیزی
گلین یازاق دردیمیزی

یاز دیلیمی سطیر سطیر
اورک دولو سئوینج گتیر
سون سوزونو ائلده بیتیر
ایتیرمییه ک ایزیمیزی
گلین یازاق دردیمیزی

تولکو اولوبدور شاهیمیز
قلبه دولوب مین آهیمیز
آللاه ندیر گوناهیمیز
قارقیش ائدن کیمدی بیزی
گلین یازاق دردیمیزی

بو قانونو بیز پوزماساق
شرری کوکوندن قازماساق
قلم دوتوب بیز یازماساق
کیم بیله چک سیرریمیزی
گلین یازاق دردیمیزی

باشدان باشا حاقدی یازیم
قان یایتارین خان آرازیم
بودور آللاه سون نیازیم
اوخشا بیزیم قلبیمیزی
بیزده یازاق دردیمیزی

آراز زنگانلی رضا دژبان

ارسال دیدگاه