“دیل بیلگیسی” کتابی نین دوواق آچما تؤره نی زنگاندا

   آنادیلی آنا سودو ایله هر انسانین جانینا گیریب، اونو بئجردیر، اونا کیملیک وئریر؛ بو مقدس وارلیق، تکجه تورپاق آلتیندا انسانین جانیندان چیخیر. بئله­ لیکله دیل مقدس­دیر؛ آنا کیمی، انسانین وارلیغی و کیملیگی کیمی. آنادیلی انسانین انسانلیغی، اونون وارلیغی و بوتون مقدس لیگینی تمثیل ائدیر. آنجاق بو دیلی قوروماق لازیمدیر. آنا دیلینده دانیشمایانلارین روحو دوستاق، وارلیغی بیلینمز، کیملیگی تانیماز قالیر. بو سؤز دوزگون، عئینی حالدا دوشوندوروجودور. مدرن انسانین جسارتی، بیلیم قامچیسی ایله بوتون بشریت تاریخینی آیاغا قالدیریر، دیل آچدیریر، دانیشماغا مجبور ائدیر.  بو سؤز گله ­جه ­ییمیزین ایشیقلی یولونو داها ایشیقلاندیریر. دیل، عظمتلی بیر بینا، تاریخسل بیر اولقودور. شعورلو انسانین دیله اولان باخیشی، شعورسوز انسانین اورکک و هراسان باخیشی ایله فرقله‌نیر، چونکو دیلینی قورومایان، دونیاسینی ایتیرر. آنادیلی، انسانین شخصیت و هویتینی ساخلاماقدا ان اؤنملی مؤلفه ­لردن ساییلیر. آنادیلینی بیلمه ­ین­لر، دوشونمه ­یی ده بیلمزلر. دیل، تکجه ساده ایلگی­دن اؤترو یوخ، بلکه دوشونمک، دویماق و بشریتی یایماق اوچون ده گره ­کیر. دونیامیزی ایتیرمه ­مک اوچون دیلیمیزی قورومالی و اؤز وارلیغیمیزی ساخلامالی­ییق.

   دیلی دوزگون و علمی صورتده اؤیره ­نیب، علمی یول ایله ده اوندان یارارلانمالی­ییق. تاسوفله مدرسه­میز، باشقا میدیالاریمیز اولمادیغی بیر چاغدا، سئویندیریجی حال بوراسیدیر کی درین دوشونجه­ لی معلیم­لر و دیل بیلگیسینی یایانلاریمیز وار. حسن رفیعی بو دوشونجه صاحیبلریندن بیریسی­دیر. او، ایللر بویو آنا دیلی­نین قایغیسیندا اولموش، فرصت اله گتیردیکده، انجمنلرده، مدنیت اوجاقلاریندا و هاردا اولورسا اؤیره ­نجی­لری باشینا توپلاییب و آنادیلیمیزی علمی باخیش و سویه ایله اؤیرتمه ­یه چالیشمیشدیر. الینیزده اولان بو بالاجا کتاب، خالقیمیزا و دیلیمیزه درین عشقین و علمی یولون گئدیشی ایله یارانان نتیجه ­سی­دیر. بورادا اوخوجولار، دیلیمیزین ساده، اولقون، دوزگون درسلریله اوز – اوزه گلیرلر. کتاب ابتدایی و یئنی اؤیرنمک ایسته ­ین اوخوجولارین الیندن توتوب، اونلارا دوزگون و علمی یول ایله آنادیلین اؤیرتمه­ یینی مقصد توتموشدور.

   هر بیر یئنی اؤیرنمک ایسته­ ین و علمی یول ایله دیلیمیزی تانیماق ایسته ­ین اوخوجولارا بو گؤزَل کتابین اوخوماسینی فایدالی و لازیم بیلیر و توصیه ائدیرم. ده ­یرلی یازاریمیز حسن رفیعی بی اوچون بو مقدس یولدا چالیشماغی اوچون اؤز تشکورومو بیلدیریب، یئنی – یئنی باشاریلار دیله­ ییرم.