اوزان آی تگین

بوگونکو آشیقلار، اسکی زامانلاردا اوزان آدلانیرمیش. اوزانلار آذربایجاندا اوزون بیر تاریخه مالیک دیرلر. اونلار اسلامدان، حتا میلاددان اؤنجه تاریخه مالیک اولان شام، قام، باکسی آدلاناراق، تورک ملت لر آراسیندا ایلک شاعیرلر، ساحیرلر و نبی لر اولموشلار. اونلار خاقانلارین، سلطانلارین یانیندا ائلچی کیمی خاقانلارین و ائللرین سؤزونو باشقا خاقانلارا و ائللره آپارارمیش و ائل ایچینده بؤیوک حؤرمت صاحیبی اولموشلار. عئینی حالدا خالق آراسیندا داستانلار سؤیله ین، ساز چالیب نغمه لر اوخویان ائل صنتکاری اولموشلار. بوگون اوزانلارین تاریخینی تورک، چین و فارس قایناقلاریندا اوخوماق اولار. فارس تاریخی قایناقلاردا اوزانلارین غزنوی لر و سلجوقلار زامانیندا یاشاییب – یاراتدیقلارینا چوخلو سندلر وار. ملک نامه، تاریخ جهانگشای جوینی، تاریخ فخرالدین مبارکشاه و باشقا قایناقلاردا اوزانلار حققینده ده یرلی معلوماتلار موجوددور. اونلار گؤسته ریر سلطان محمود غزنوی ساراییندا نئچه – نئچه تورک سؤیله ین شاعیرلرله برابر اوزانلار دا یاشاییرمیش. بونلاردان آی تگین و کاتبی سارایدا درین سایغیلی اولاراق فردوسی کیمی فارس شاعیرینی ده آیدین آی تگین سلطان محمودا تانیتدیرمیشدیر. تاریخ جوینی، غزنویلر دؤرونده اذاندان سونرا اوزانلارین سسلنمه سیندن یازیر و تاریخ فخرالدین، آی تگین شعرلریندن نمونه لر گتیریر. بو نمونه لردن بیری بیر روباعی دیر کی آشاغیدا اوخویورسونوز:

وعده وئروسن نوجوان گلمزسن            سؤز یالانی منیم بیلا قویمزسن

یوزون گون و ساچون قارا گؤرمزسن   عشقینده قرارسیز ای محب بیلمزسن.

غزنوی دؤروندن سونرا سلجوقلار ایش اوسته گلیر و اونلارین زامانیندا اوزانلار داها آرتیق چوخالیرلار و حؤرمت قازانیرلار. بو زامانین شاعیر، بیلگین و اوزانلاری دا چوخدور. نئچه سینی آد آپاریرساق بونلاری دئمک اولار: شیخ اینانج، توتماج، عمیدالملک و باشقالاری. آنجاق آی تگین ائله شهرت قازانمیشدیر کی ساحیر کیمی ده تانینیرمیش. اونون ساحیرلیگی بلکی ده شامانیزمدن قالان عنعنه لره باغلانیر.

ارسال دیدگاه