«حقیقت نامه» / اکبر ستاری (قیزیل قلم)

 
هرکیم حق دانیشدی فانی دنیادا
اونون اورةگینه یاره چکیلدی
ایستةدی کی حقّین لذّتین دادا
هربیرایشی آه و زاره چکیلدی
ــــــــــــــــــــــــ
هابیل حق اوستونده بویاندی قانا
یحیانین باشینی کسدی بیگانا
نوحِ نبی نییه دوشدو طوفانا؟
زَکریا تک مُشاره چکیلدی
ـــــــــــــــــــــــ
حق نورو یاییلدی،چرخِ اطلسه
ایستةدیگی قَدَر یئتدی هرکَسه
یوسف حق اوستونده دوشدو مَحبَسه
قول آدیلان گاه بازاره چکیلدی
ــــــــــــــــــــــ
هرزمان حقیقت ائیلةدی فریاد
سس وئردی سسینه حق دیین افراد
حقّه دشمن چیخدی نمرود و شدّاد
ابراهیم حق اوسته ناره چکیلدی
ــــــــــــــــــــــ
ذِکرحق دیلینده حضرت موسیٰ
حقّه اقرار ائتدی الینده عصا
گؤرسندی گؤزلره بیر یَدِبَیضا
حقّین نورو آشکاره چکیلدی
ــــــــــــــــــــــــ
سامِری قارونلا وئردی اَل اَله
موسانین قومینه قوردولار تَله
فرعون اؤز ائوینده سالدی ولوله
آسیه حق اوسته داره چکیلدی
ـــــــــــــــــــــــــــ
حضرت روح الله عیسی ابن مریم
اِذنِ حقدن وئردی اؤلنلره دَم
بویوردو هئچ کیمه ائتمةیین ستم
حق کلمةسی هردیاره چکیلدی
ـــــــــــــــــــــــــ
خاتم رسالت احمد مختار
حقدن ظهور ائتدی سیّد و سالار
آدی اَذانلاردا اولدو پایدار
یاحق سسی هردیاره چکیلدی
ـــــــــــــــــــــ
حقدن پیغمبره اولوندو نظر
بیرگئجه گؤیلره ائیلةدی سفر
شبِ معراجینده قیلیبدیر گذر
ساحتِ اقدسِ یاره چکیلدی
ــــــــــــــــــــــ
حقّی تانیمیشدیر اُوِیسِ قَرَن
تنگ اولدو عشقینه بِلادِ یمن
معرفت اوزیله ترک ائدیب وطن
یوللاردا آیاقی خاره چکیلدی
ـــــــــــــــــــــــ
شریعت کؤینگین سؤیدوطریقت
طریقت اجرینی وئردی معرفت
معرفته یئتن تاپدی حقیقت
جبری یوخدور اختیاره چکیلدی
ــــــــــــــــــــــــ
حقدن عطیرگلدی قیزیل گوللره
منصورآدی ازبر اولدو دیللره
اَناالحق سسلدی،دوشدو چؤللره
آخر حق اوستونده داره چکیلدی
ــــــــــــــــــــــــ
سلطان و خلیفه سیّد و ارباب
مُرشد و مُرید و پیریلن اَقطاب
حقّه دوغرو گئدیر ائیلةییرشتاب
بلکه بیرگون ساج ناره چکیلدی
ـــــــــــــــــــــــــ
«قیزیل قلم»ایچیب جام وحدتی
یٰامَنْ هو سسلنیرسوموگو اَتی
حقّین کرمیندن تاپدی حکمتی
حقیقتله پایداره چکیلدی

ارسال دیدگاه