ییرمی / سوسن شیرکوبی

اوشاقلارا درس دئییردی
اوزاق یاخین اؤلکه لردن
اوگون قوجا بیر اؤیرتمن
دوواردا کی نقشه اوسته
بارماق ایله گؤستریردی
بو انگلیس،،،،،،،،،،ایتالیا
بوآمریکا،،،،،بورا آلمان
بوفلسطین ،،بورا لبنان
بو تورکیه،بورا یونان
بورا باکی ،بونوح چیخان
بودا ایران تورپاغیندا
قوزئیی ،گونئیی آذربایجان
گؤزل گؤیچک واردیر
ملتی نین تورکو دیلی
دئسه منه هر کیم آنجاق
نه یه بنزیر بوگول تورپاق
وئره جه یم اونا ییرمی

قالخیب اللر گؤیه بیردن
یوخسا کیلاس دولدو سسدن
آراز دئدی : آقا غیرت
جعفر دئدی : آقا جنت
صمد دئدی :ایران باشی
معجز دئدى: چوخدور یاشی
باقر دئجک ،خانلار یوردو
ستار قالخیب ،یئردن دوردو
دئدی آقا ،یولداش دئییل؟؟
آنا باجی ،قارداش دئییل؟؟؟
اؤیرتمه نین دولوب گؤزو
قوی دینله یک قالان سؤزو
خانلار خانا اوتور دئدی
گؤرک نبی سؤزو نه دیر؟
نبی دئدی: آقا بیرلیک
کرم دئدی : یوخ سئوگیلیک
صابیردئدی: چوخ اصیل دیر
عماد دئدی:: قورخماز دیلدیر
بابک دئدی: شرف آبیر
هریئریندن بوردا یاغیر
روشن دئدى: ظالم قیران
ایگید قوچلار اکیب دوغان
بهچت دئدی : ادب کانی
گؤروم اولسون کور دوشمانی
حکیم دئدی : نظامی وار
شاعیرشاهی ختایی وار
آرش دئدی : اسکی دوران
هیدجی ده دئدى:ایمان
آیدین دئدی : انتظاردیر
شرفینی سئون یاردیر
آیواز دئدی: قیلینج قالخان
یئرده قویماز بوردا اوغلان
عسگر دئدی : قوجا آهیل
کؤکسو دولو شیرین ناغیل
دومرول دئدی : گوجلو بیلک
مظلوملارا اولان کؤمک
واحد دئدی: قوشما غزل
مین بایاتی ،شیرین مثل
ساحر دئجک ایشیق صاباح
عین القضات ملا پناه
سؤیله دیلر : بوردا دائم
گلیب گئدیب قانان عالیم
هابیل دئدی : کامان تئلی
نصرت دئدی : سئوگی دیلی
صائب دئدی : سؤزصرافی
سهند دئدی :سومروق قافی
اوغلانلارین سیراسیندان
سیرا چاتدی قیزلار ایچین
تومروس دئدی:قانا قان دیر
نگار دئدی: جانا جاندیر
هجر دئدی: چاپار آتدیر
اصلی دئدی؛یانار اود دور
سارا دئدی : محبتدیر
پروین دئدی: سؤز صحبتدیر
اولدوز دئدی:یاشا یاشا
یاددان چیخماز زینب پاشا
بورلا خاتین دئدی یاشماق
عاردی بیزه اوزدن آچماق
حیران دئدی: قریب گلین
حکیمه آه چکدی درین
آناهیتا دئدی :هنر
کؤنول دئدی : اورک داغى
زری دئدی :ائل دایاغی
مهستی ده دئییب نه لر
اذن ایسته ییب اگلشدیلر
درسی سونا یئتیردیلر
بوسورغودان اؤیره تمه نین
فیکری نه دیر بیلمه دیلر؟
سانکی نفس کسیلمیشدی
هامی گؤز لر ائله بیل کی
اؤیرتمه نین آغزیسینا
سون دیقه لر تیکیلمیشدیر
آقا یاریب سوکوت باغرین
سؤزلرینین دوتدو آردین
دئدی بوتون سیز دئینلر
دوزدور آمما آزدی گوللر
گؤزلریندن سئوینج یاشین
سیلیب گؤیه دوتوب باشین
نقشه اوسته اولان آدا
حسرت ایله باخیب دئدی

بورا اودلار ماحالی دیر
قادینلارى حیالی دیر
نئچه طایفا نئچه قوهوم
نئچه ائللی اوبالی دیر
تورکمنلر قاشقایی لار
افشار بایات قاراپاپاق
آنا دوغما اوچوز قارداش
بیربیرینه وفالی دیر
بیریسی نین کؤکسو داغلی
بیری جاندان یارالی دیر
تاریخ بویو اونو آلماق
دوشمانلارین خیالی دیر
تورپاغینین بیراوووجو
قیزیلدان دا باهالی دیر
آمما حاییف گؤزللیکدن
اونون باشی بلالی دیر
آنجاق گؤروب بوسیناق دان
یاخشی چیخیب اؤیرنجیلر
گؤزل یوردوم آذربایجان
اونودماییب اونودمازدا
آیلار ایللر سوووشسادا
بسله دیگین بواولادلار
آزاد یاشا دئیه دئیه
آد. دفترده وئردی ییرمی
اوشاقلارین هامیسینا
ائل قوجاسی دده قورقود ،،،،

ارسال دیدگاه