اتحاف اولونور آشیق حاج مسلم عسگری جنابلارینا / تایماز میانالی

ائشیتدیم خسته‌لیک سنی اینجیدیر
ائلیمین آشیغی آی دده موسلوم
سازدان اوزاق دوشمک کؤنلونو دیدیر
ائلیمین آشیغی آی دده موسلوم

سازلا ایللر بویو یاناشی قالدین
قوپوز نعره‌سیله دوشمانی سالدین
ائلیمین دردیندن گونده قوجالدین
ائلیمین آشیغی آی دده موسلوم

دور گؤتور سازینی دیللندیر بیرده
کئچن دورنالاردان تئل أندیر بیرده
کَدَرلی ائلیمی سئویندیر بیرده
ائلیمین آشیغی آی دده موسلوم

نه قَدر حؤرمتیندن یازسالار آزدی
گله‌جک طالئعین صافدی بایازدی
تایمازین عشقیده بو قارا سازدی
ائلیمین آشیغی آی دده موسلوم

شعر : تایماز مییانالی

ارسال دیدگاه