گؤزل قادين / عليرضا ذيحق

لاپ او اوشاقليق دان گؤزل لي يي سئورديم. آينايا باخاركن، دولغون ساچلاريم و گؤي گؤزلريم منه گؤزل اولدوغومو آنلادارديلار. يئني يئتمه ياشلارين دا ايسه بو دويغو ائله من ايله وار ايدي . باشقالاري دا گؤزلليييم دن دانيشاركن، غرور لانيرديم و اؤزوم باشقا كيمسه ني سئوميرديم .مفتون لو باخيش لار دا كي كوچه بازاردا منه گؤزتيكيرديلر، مني داها چوخ غرور لانديريرديلار.

راحات بير زيندگانليغيم وار ايدي. خوشبخت ايديم. كئفي ساز بير عائيله ده كي آتا آنام تحصيل آلميش اينسانلار ايديلار گونوم كئچيردي.  بوتون آرزولاريما ايسه راحاتليقلا چاتيرديم. تاكي گنج ليك چاتدي وچوخلي آداملار بيله مه ائلچي دوردي. آمما هاميسيني او ماهانا ايله كي درس اوخويورام باشيم دان رد ائله ديم . دوزون سوروش سانيز من دئييل ديم كي اونلارا يوخ جاوابي وئرير ديم بلكه غروروم ايدي. آزدئييل ديلر جوان اوغلانلار ي كي دوزگون ايش لري وارايدي و تانينميش عائيله لردن ايدلر . رويالاريم دا بير كيشي يه فيكير له شيرديم كي گرك مني سيتاييش ائده و ائله بيله مه عاشيق اولا كي اوننان چوخ مومكون اولمايا. هابئله بير كيشي كي پول ايچينده اوينايا و اؤز حيات طرزي ايله، ديللرين ازبري اولا.

آتا آنام بعضن مني زورا قويوب و ائلچي لرده اولان نجابت واصالته گؤره ايستيرديلر كي اونلارين بيري نن ائوله نم. آمما من لج ائديب كوسوردوم و اونلارداقاش قاباغيمي گؤرن كيمي من دن ا َل چكيرديلر.گرك كي رويالاريمين كيشي سيني تاپارديم .بيركيشي كي مني آرزولاريما يئتيره بيلردي . او آرزولار كي تكجه بول پول ايله اونلارا چاتماق اولاردي .

تاكي اوگون گليب چيخدي و قوهوم لارين بيري نين تويوندا، آختارديغيم كيشي ني تاپديم . گؤزلري نين اسيري اولدوم. او گؤزلر كي پرستيش قَدَر منه باخيب توموردولار. ائله يوموشاق و شيرين ديلي وارايدي كي مني تعريف تمجيد ائدن كيمي، مغرور لاشيرديم .ييرمي بئش ياشيندا بير جوان كي فرانسه ده ياشاييردي و مهنديس ايدي.

بو تانيش ليق عشقه ختم اولدي و من سئوينيرديم كي آخيردا آرزوما چاتيب و يئني بير حيات باشلايا جاغام. بيزيم تانيش اولوب ائولنمه ميز بير آي دان چوخ چكمه دي وتا اؤزومو تاپام گؤردوم اوچاق دا يام و اوزاق بير يوردا اوچورام .

ايكي ايله قَدَر بيزيم حياتيميز دوغرودان دا شيرين ايدي و اؤزومو بختيار سانيرديم .خارجي ديل لر كيلاسينا گئديرديم و يئني دوسلار تاپميشديم .بير نئچه سفر ده ايتاليا، آلمان، سويس و اسكاتلنده گئتديك . دونيا بوتون گؤزلليك لري ايله اوزومه گولوردي و اؤزومو لاپ خوشبخت حيس ائديرديم. اريمين ده هم بوللو گليري وارايدي هم بوش واختي كي ائده بيليرديك باشارديق جا گزيب دولاشاق .

آمما بير زاد دا يارا كيمي دوشموشدو جانيما و مني ايچري دن يئييردي. حيات يولداشيم هئچ ايسته ميردي اوشاغيميز اولا .اوّل لر اؤزومه آلميرديم و دئييرديم شايد ايستير بير ايكي ايل كئچه. آمما بيرگون ايسته مه دن حاميله اولدوم و اريمه آچيقلاركن، قفسدن قاچميش دلي لر كيمي، سيلله تپيك ايه دوشدو جانيما . اوزگؤزوم گؤيه ريب قانيياركن، تازا آنلاديم نه جور بير آدام لا ياشاييرام .

 بو مسئله دن سونرا ايصرار ائله دي كي اوشاغي سقط ائديب سالام ودئدي :” هله تئز دي كي اوشاغيميز اولا و بوتون ديلخوش لوق لاريميز ي الدن وئره ك. آدتم گرك مسؤوليتدن قاچا .”

شيرين حياتيميز گئتديك جه آجي يا چاليردي و من ده لج ائديرديم. اوشاغيمي ايستيرديم ساخلايام و بو آرادا مجبور قالديم پليسه باش وورام . قانون منه حق وئردي كي اوشاغيمي سقط ائتمه يم آمما منله حيات يولداشيمين رابيطه سي گئتديكجه كورلاندي. پاريس بوتون گؤزلليك لريله منيم گؤزوم ده چيركين له شيردي و هر آن قاچماق فيكرينده يديم. تاكي بيرگون يوك ياپيمي باغلاديم و قاييتديم ايرانا.

ايكي آي سونرا اوشاغيمي دوغوراجاغام و دوغماق همي، شايد بوشانام. گله جه ييم نه ساياق اولاجاق بيلميرم. آمما چوخ بَتَر پئشمانام. غروروم مني بوغوب محو اولماغا سوروتده ميشدي. اريم تيلفون آچيب باريشماق ايستيردي وادا اوصول لارين نان پئشمان ايدي . آمما كئچميشه قاييديب اونون ويريب سينديرمالاريني نظردن كئچيردن كيمي ، گؤيلوم ايسته ميردي بيله سي نن باريشام. او تيلفون لارين دا دئييري:

” كئچه نه گوذشت دييه رلر و چاليشاجاغام سنه و اوشاغيما مهربان اولام .”

ايندي هئچ بير تصميم توتمادان گؤزله ييرم كي حاميله ليك گونلرينم بيته و اوشاغيمي دونيايا گتيرم . سونرادي كي گرك فيكيرله شم و گؤرم نئيله ييرم .

۱۳۸۲

ارسال دیدگاه