بولود قره چورلو (سهند) / م. کریمی

   سهند اتكلرينده بويا- باشا چاتديغي سهند داغي­نين وقارلي آديني اؤزونه شعر آدي گؤتوره­ ن «بولود» عمرونون يئني يئتمه­ ليك ايللريندن بري، شعر و ادبياتلا ماراقلانديقدا، دنيا گؤروشونو مصراعلارا بوكوب، معاصر شعريميزين اقتدارلی شاعرلريندن اولدو. سهند، اؤز عصرينين اؤن سيرالاريندا ايرليله­ ين، مفكوره­لي شاعرلريندندير. او، مين ايلليك مكتوب ادبياتيميزين داهادا اعتبارلي كلاسيك نمونه لريندن ساييلان «دده قورقود» داستانلاريني معاصر ادبي ديل شيوه ­لري­له شعره چكميش و ملي شعوروموزون چيچكلنمه­ سينده بؤيوك رول اويناميشدير. «اوغوز» ائللري­نين كلاسيك اسطوره ­لريندن سؤز آچان «سازيمين سؤزو» كتابي، سهندين ايلك شعر كتابي كيمي، اوغورلا شاعريميزه دنيا شهرتيني ارمغان ائده بيلميشدير. فردي استعدادينا داياناراق، خالق فولكولوروندان قيدالانيب يازديغي شعرلريله، چاغداش   آذربايجان ادبياتي­نين معاصر دورومونو اؤلكه­ ميزدن اوزاقلارادا تانيتديرانلاردان اولان سهند، بير چوخ تدقيقاتچي و علم آداملاري­نين آراشديرمالاريندا يازيلان تدقيقي موضوعلارا چئوريلدي.

بو معاصر شعريميزين خالق طرفيندن آلقيشلانديغيني گؤسترير. ائليميزين ـ يوردوموزون قانلي ـ قادالي ايللريندن بري، سهندين عالم دوستو، دوكتور، «محمدعلي فرزانه» جنابلاري­نين تشبثو ايله، اؤتن ايل، قاباق ايللرده چاپ اولان ايكي جلدليك سازيمين سؤزو كتابلارينا علاوه اولان باشقا شعرلرله بيرليكده، سهندين آغير حجم­لي شعر مجموعه­ سي دده ­مين كتابي، آدي­له اؤلكه­دن اوزاقلاردا ايشيق اوزو گؤردو[۱]. دده قورقود بويلاريني احتو ائده ­ن بو كتاب، محتشم شاعريميزين ائله جه ده، چاغداش ادبياتيميزين شاه اثري­دير دئسه­ ك، هئچ ده سهو ائتميريك.

سهندين چاپ اولان شعرلرينه يازيلان اؤن سؤزلرين مؤلفي، تانينميش عالم و بؤيوك فولكلور شناس م.ع فرزانه جنابلاري، سهند حياتيندان سؤز آچديقدا يازير:

   «۲۰جي عصر، جنوبي آذربايجان ملي ـ مبارز شعر سيماسيندا پارلايان سؤنمز اولدوزلاردان بيري و بلكه ده بيرينجيسي ساييلان بولود قاراچورلو، مشهدي مطلب اوغلو، ۱۳۰۵جي ايلده مراغا شهرينده بير ايشچي عائله­ سينده دوغولموشدور.

   دوغما ائل سجيه ­لري و قوراللاري ايله ايلگيله ­نن آتا و آنا، اؤز كؤرپه­لرينه «بولود» آديني سئچديلر. اونلار بو آدي سئچمكده كيم بيلير، بلكه آذربايجانين جوشغون و بولودلاري شيمشك چاخان طبيعتيني و بلكه ده خيرداجا بولودون بيرگون ياغمورلو بولود اولوب، آذربايجان شعر گلشنيني سوواريب گوللنديرديگي اوچون اونا وئرميشلردير.

   بولود قاراچورلو، رضاخان استبدادي­نين اَن قورخونج ايللرينده، يعني آذربايجان خلقينين ملي ـ مدني وارليغي تاپدالانديغي و لاغا قويولدوغو ايللرده دوغولوب، بويا ـ باشا چاتدي. او درس اوخوماق اوچون گئتديگي مدرسه ­ده اؤز آنا ديلينده اوخويوب ـ يازماق و حتي دانيشماغا حقلي اولماسا بئله، ياراديجيليغينا باشلاديغي گوندن شعر و منظومه ­سينين اساس حصّه­ سيني آنا ديلينده يازماغا باشلادي و عمرونون سونونا قدرده بو دؤزولمز شرايطه باخماياراق اؤز وارليغي، ديلي ،تاريخي، مدنيّتي يولوندا يورولمادان و يئنيلمه ­دن جارچكيب، قلم چالدي.» [۲]

۱۳۵۸جي گونش ايلي ياز فصلي­نين ايلكين گونلرينده آزادليق گونشي­نين ايليق هاوالاري اؤلكه­ يه ياييلماقدا ايكن، بولود قاراچورلو «سهند» دنياسيني ده ­یيشيب، ابديته قوغوشدو. او، اؤلمز اثرلري­له، اؤلمزليكده ياشايان، بير كؤوره ­ك اوره­ كلي شاعردير. اؤزو دئديگي كيمي؛ «آنجاق ائلي اوچون ياشايانلارين اؤلوب گئتمك ايله عمري قورتولماز اؤلومله حياتدا بير بوتونلوك وار :گول توخوم اولماسا، توخوم گول اولماز»

   اولو سهندين ياراديجليق پراسسيني گؤزدن گئچيرديكده، شعريميزين بوتون بعدلرينه گؤسترديگي قايغيلاريني باشادوشه بيليريك. يازيب ياراتديغي ايللر، دنيا ادبياتي­نين يئني­ليك­چيليك دؤورو اولدوغو كيمي، سهندده بو ادبي يولون اوغورلو شاعرلريندن اولور. اونون هئجا وزنلرينده يازديغي شعرلر معاصر آذربايجان شعري­نين تيپيك نمونه­ سي­دير. خالق حياتيندان ذوق آليب، انسانلارين عصرلر بويو آختارديغي عدالت، سعادت و انسان سئو­رليك، سهندين اثرلرينده اساس رول اويناييب، آپاريجي اولموشدور.

   عصرلر بويو شفاهي خالق ادبياتيميزدا، ائله ­جه، مكتوب ادبياتیميزدا اؤنميني قورويان آتا ـ بابا مثللريميز، آشيق ادبياتي اؤرنكلري سهندين شعرلرينده اؤزونو قورويا بيلميش و اونون أن كؤوره ­ك دويغولاريني تمثيل ائده ­ن شاعرانه جمله ­لر اولموشدور. او ائلي اوچون چيرپينان بير اوره ­ك، دانيشان بير ديل اولموشدور.

   سهندين فلسفي دوشونجه ­سي، حكيم زنوزي، ملا محمد باقر خلخالي و حكيم هيدجي ­نين فلسفي زنجيري­نين سون حلقه­ لريندن بيريسي حساب اولور. بو، سون حلقه­ ده فلسفه، انساني­له ­شير، حيات قوخوسو آلير و شاعري هر بير «ايسم» ـه قارشي قويور:

       قارقيش شيطانلارين وسوسه­ سينه،

             قارقيش آزغينلارا، اگوئيستلره.

            قارقيش دوشمانلارين دسيسه­ سينه

            كومونيسم دئين شوونيستلره.

***

            قيچيندان آسلانير شيطان داش تكين

            انسان ديرماشديقجا كمالا ساري.

            يئنجير يئنجيشديرير ايپين اؤركنين

            آرتيق يوكسلمگه قويمايا باري ….

            انسانا ياراشيق سئوگي ـ ايستك­دير،

            ياراماز خيصلت­دير كين باغلاماقلار.

            انسانا ياراشان اؤره­ك كؤوره ­كدير،

            وجدان خسته­سيدير، بوتون شيلتاقلار.

     ***

            محبت ائويدير انسان اوره­ گي

            چوخ تئز كدورتدن بوشالابيلر

            فطرتاً تميزدير انسان ديله­ گي

            كينه­لر اولفته چئوريله بيلر.  [۳]

ائله بونا گؤره ده، سهند، انساني­ لشميش فلسفي دوشونجه ­ميزي، بيرده اجتماعي­لشديرير و سياسي­لشديرير[۴]. او، پهلوي شوونيزمي قارشيسيندا، طبيعي حقلري تاپدالانيمش مظلوم ائيليميزين وارليق ديله ­مك يوخ، بلكه حقلي ووروشلارا گيره ­رك جايناغيندان قورتارماق ايسته ­يير. بو حركتي ايسه بصيرت گؤزوايله يولاچيخاراق باشلايير. دنيانين مداري­نين ضدّيت­لردن، دوغدوغونا اينانان فلسفه­ لي شاعر، گرچک ليگين ايشيق ايله قارانليق ووروشوندان پارلاماسينا اينانير:

            دفعه­ لر بو سؤزو سؤيله­ ميشم من،

            حقي غصبكاردان اولماز ديلنمك.

            آزاد ياشاماغي سئويب ايسته­ين،

            حقلي ووروشلاراگيريشسين گرك.

***

            يئرلي ضدّيت­لر، عينِ حيات­دير،

            دونيانين مداري اونسوز پوزولار.

            ايشيغين پارلايان يئري ظلمات­ دير

            مجادله­ لردن حقيقت پارلار.

    رحمتليك گنجعلي صباحي دئميشكن: «بولود قارچورلو سهند، بير متفّكر، بير فيلسوف كيمي حياتين درينليك­لرينه جوماراق، آزادليق و مبارزه يوللاريني گنجليگه نشان وئرمك اوچون، سوندورولموش ملّي دويغو، ملي شعوري اويالتماغا چاليشدي …» [۵]

       سهند سؤز اوستادي اولدوقدا، ان مهارتلي عاشق و ساز اوستاديميش ائله بونا گؤره ده، سازي بير ناطق ـ اؤزوده قوخماز بير ـ انسان كيمي تانيتديرير:

                        اورداكي ديل، آغيز سؤزدن اوساندي

                                                سوروشون مطلبي تئللر سؤيله­ سين

                        دوداق دانيشارسا، اود توتلر ـ يانار

                                                گركدير زخمه­ لر، اللر سؤيله­ سين[۶]

سارسيلماز شاعر چاغي­نين گرگين دورومو، ديل ياساقليغي و بير يوللوقلا آزادليغين بوتون جيغيرلاريني باغلي و بوتون آغيزلاري قاپالي دويدوقدا، ضيالي صنعتكارلاري، ساز سيغينمالاري، ائله­ جه ده اوره ­ك سؤزلريني، سازلا آنديرمالاريني تاپشيرير.

   شاعرين اينامينجا انسان ديلي ديينمه ­ين سؤزو، ساز ايله دئيه بيلر، دوغورداندا آشيقلارين سازيندا ترنم اولان سيزيلتي­لار ياخود هاي ـ هارايلار او جمله­ دن جليلي، جنگي كور اوغلو، يانيق كرمي و … اولو شاعرين ادّعاسيني ثبوت ائدير. آشاغيداكي چارپارايا باخين:

                        آشيق دايانديرير سؤزو صحبتي

                                                الينده صدفلي سازي دانيشير

                        كامالا يئتنده انسان صنعتي

                                                چؤللرين اؤرده ­يي، قازي دانيشير.[۷]

  آشيق اؤزو دانيشديغي سؤز- صحبتي بير آنليقدا، دايانديريرسا دا، اينجه و ظريف بارماقلارينداكي مضراب، كؤكسونه سؤيكه ­دیيي قوپوزون، روحو جلالانديران تئللرينه ده­ يه ­رك اونون يئرينه سازي دانيشير. دويار شاعر دئيير انسانين هنر و صنعتي كامالين سون زيروه ­لريني منيمسه ­ديكده، چؤلون ديل بيلمز حيواناتي او جمله­ دن قانادلي قوشلاريني دا دانيشديرا بيلر. باجاريقلا شاعر دده قورقود داستانلاري­نين باشلانغيجيني اوره ­يه ياتيم پوئما ايله باشلاديقدا «ديرسه خان اوغلو بو غاج خانين» داستانينا ائل آشيقي و اونون سازي ايله گيريشير:

            آشيق چالير سازيني

            آچير عشيق يازيني

            نغمه­لري اوينادير

            چمن­لرين قازيني

            چمن گولور، گول گولور

            داغلار گولور ائل گولور

            گولوشدوكجه طبيعت

            نغمه گولور، تئل گولور

            جوشور عاشيغين قلبي

            دولانير هر ديياري

            دئيير قورقود دده ­دن

            سازي­نين دوداقلاري! [۸]

ساز – سؤز صنعتكاري، اولوسال دويغولار ياراديجيليغينا اؤزه­ ل اوبرازلار باغيشلاياراق، سازين روحو اوخشايان و جيلالانديران سسي ايله عشقي، املي چيچك لنديرير، هابئله اور­يه ياتيم نغم­سي ايله بوتون آچي (طبيعت)ينين قوشلاري، بيتگي­لري، سولاري، داغلاري، باغلار … ين گولدورور، ائله ­جه ده عاشيق قلبي دالغالانيب، جوشور و يوگر­ك خيالي قارتال ساياغي قانادلاناراق بوتون تورك اؤلكه و ائل- اوبالاريني دولانير و كؤكسونده ­كي سازين اينجه تئللري انسانين دوداقلاري كيمي ترپه ­نه­ ر­ك ـ نهايتده اوغوزائللري­نين باش بيلن آغ ساققالي قورقود دده­ دن سؤز آچير …

   «قانلي قوجا» داستاني­نين باشلانیشيندا، اولوسال صنعتكاري اؤيره­ك، قوپوز چالماسي و اولو بابالاريندان سؤز آچماسيني رجاء ائدير:

                        جانيم آشيق، گؤزوم عاشيق

                                                چال قوپوزون، آچ داستانين

                        او سِحركار جومرد الين

                                                 پرده­لرده خوش دولانسين

                        اووزو قارا، باغري قارا

                                                جهالته جوموب، باتان

                        قادينليغا بهتان آتان

                                                شارلاتانلار بير اوتانسين.[۹]

   آشيغين فسونكار بارماقلاري سازين پرده ­لرينده دولانديقدا، اوزو قارا و قلبي قارا سارساق ساتقين لاري هابئله منم­ليك دنيزينه جومان، قادينليق ناموسانا بهتان ياخان خورياد شارلاتانلارا و تانيسين دئيه، سؤز قيرمانجينا باغلايير، ائله­ جه ده ياراماز ائتگي (عمل)لرين افشا ائدير.

   اينجه روح و كؤورك اوره­ ك شاعر، ان كيچيك ياشلاريندان سازي بير وورغون آشيق كيمي دينله ديكده، جيلخا اوره ­يي دالغالانير، جوشور ائله بونا گؤره ده كؤنلونون ايلك ياوريسي اولاراق ايلك الهاميني ايسه سازدان آلير:

                        ازلدن مني ده جوشدوان اودور

                                                اونو دينله­ميشم، فكره دالميشام

                        او، وورغون كؤنلومون ايلك ياوريسي­دير

                                                من ايلك الهاميمي اوندان آلميشام.[۱۰]

       او دئيير: ائلين حرمتلي صنعتكارلري اولان عاشيق ساز مضراب ووردوقجا اؤزوده، اؤز نغمه­ سينده غرق اولور ائله­ جه ده هاي ـ هاييندان طوفانلار قوپارير:

                        اؤزوده غرق اولور اؤز نغمه­ سينده

                                                طوفانلار قوپارير هر بير نغمه­ سي

                        آچير خيالي نين آغ يئلكه نيني

                                                يئنه ده سؤيله بير قورقود دده­ دن .[۱۱]

   آشيق، دده قورقوردان داستان آچاراق كئچميش آتا ـ بابالاري­نين ياشاييش طرزي، سجييّه‌لري، قهرمانچيليق، مردانه ­ليك لريني خاطرلايير. بونونلادا دويان شاعرين دويغولاري چيچكله­ نير.

                        دانيش ديليم آشيق ديلين وار اولسون

                                                آردي كسيلمه­ سين قوي بو داستانين

                        دانيش كئچن­لرين ايزيله بلكه،

                                                اليندن ياپيشاق يول آختارانين.[۱۲]

دييه وارليغين ياخود كيملييين آرايان ائللرين اللريندن توتوب، اونلاري اؤز كئچميش­لري ايله تانيش ائتمك اوچون، آتا ـ بابالاري­نين ايزلرينه ايشيق سالماق ديله­يير.

   ائل دردي اؤره ­يينده، پوئماسيندا خيال كندريني آچاركن، آيلاري ـ ايللري گئريده قويور، اؤزونو كئچميش اولو بابالاري­نين ائل ـ اوبا قونا قليغيندا دوياراق، ائللري­نين توی ـ دويونو ييخيناجاغيندا گؤزو قورقود دده ­يه دوشور، ياسلاناراق، غملري داشير، دئمك بير ايستكلي و اركويون كؤرپه كيمي، دده­يه ياخينلاشاراق، ياشاديغي دؤرون سيخينتي ـ هابئله رحميسيز دوشمانلارين آمانسيزجاسيا ائل ـ اوباني تاداماسي و… دان آتاسينا شكايت ائده ­رك، كندلرده، اوبالاردا، طوي ـ دويونلرده نغمه ياساقليغي، گئت ـ گئده، آشيق و سازين و باشقا محلّي موسيقي آلت­لري، هابئله مثل­لر، متل­لر، عنعنه­لر و رسم­لرين اونودولماسيندان آجي يير:

                        اوبالاردا نه توي نه بايرام اولور

                                                نه قوپوزچالينير، نه مرد اؤيونور .

                        نه بير اوزان گلير نغمه اوخويور

                                                نه بدوو آتلارين ايچي دؤيونور .

   بولوت قره چورلو آذربايجان ادبياتي­نين گؤركملي، درين دوشونجه ­لي، مرد شاعريني بئله ساده خاطرلاماقلا كفايت­لنمك اولماز، سهندين اثرلريني يئني باشدان اوخويوب- آراشديرماق، يئني اوخوجولار البته چاتديرماق، شاعري تانيماق اوچون قورولتايلار قورماق، اونون ادبي- سياسي- فرهنگي ايشلريني ده ­يرلنديرمك ملي بير وظيفه كيمي بوينوموزا آلمالي­ييق.[۱۳] بيليريك بو بؤيوك اومانيست شاعرين اوره ­يي بوتون خالقي ايله چيرپينيردي، اونون نبضي خالقي ايله دؤيونوب- ووردو.[۱۴] اونون آجي اؤلومونون، واختسيز دنيادان كؤچمه­سي­نين، بو بؤيوك ايتگي­نين آجيسي هله ده داماغيميزي يانديرير. ايندي خالق شاعري قارشيندا خالقيميزين ايكي بؤيوك وظيفه­سي واردير: بيرينجي وظيفه اونون اثرلريني يايماق، اينجه­لمك و خالق الينه چاتديرماق، ايكينيجي وظيفه شاعرين مقبره ­سيني خالقيميزين مردليك، انسان­ پرورليك سمبلي اولان آنا يوردوندا قورماسي­دير.

   اومانيست شاعريميز ايكي جلدليك «سازيمين سؤزو» اثرينده اؤز خالقي­نين تاريخيني، عنعنه ­لريني ضبط ائده­رك، خالقيندا ملي شعور ياراتماغا جان آتميشدير. اومانيست شاعر يئري گلديكده انسانا اوز چئويرير و انسان حقينده درين فلسفي گؤروشلريني، انساني باخيشلاريني، سؤيله ­مه گه چاليشير: حقين – حقيقتين باغچاسي هر واخ اينسانلا گول آچير، اينسانلا سولور ان بؤيوك حقيقت انساندير؛ آنجاق انسانسيز حقيقت اولسا، كور اولور. انسانا بئله ده ­ير وئره ­ن شاعر، بونا اينانير كي بو گؤزه­ ل پري ـ انسان ـ سئوگي­سيندن الفتيني قيران گوندن دَلي مجنون كيمي ايلك محبتيني اونودانمايان كيمي چؤللري گزمگه دوشموسدور. انسان هله ده سرگردان بير قوش كيمي يورد ـ يووا تاپماميش، انسانليغي تاپماق اوچون بوداغدان ـ او داغا قونور. انسان حقيقتي ايتيرن گوندن باشي داشدان داشا سيلديرم يوللاردا سرگردان قالير و سعادت جيراني اؤنوندن قاچير. انسان  اؤزلوگوندن آزيب ايتگين دوشور و بو زاماندير كي اوز قانيني ايچير؛ بيلمير اؤزونو هارادا آختاريب تاپسين:

   او اؤز صورتيني يادا سالديقدا بير چوخ افسانه­لر ياراتميش. بعضاً آختاريب، يورولوب يولدا قالديقدا، ايندي اؤزون افسانه­لرده گزیب آختاریر. بؤيوك اومانيست شاعريميز افسانه ­لر دنياسي­نين يارانماسيني بئله ايضاح ائدير، اسطوره ­لرين يارانما علتيني آرايير و افسانه­ لري علمي ـ شاعيرانه باخيشلا ده ­يرلنديرير. شاعر افسانه ­لري – « انسانلارين ايده ­آل دنياسي­نين تبسّمي، حياتدا تجسم تاپمايان بؤيوك آرزيلارين ترنمي­دير. »[۱۵]– دئییر.

   بو باخيشلا، شاعر افسانه­لره اوز چئويرير، اونلارين ايچ صورتيني اينجه­ له ­يير، حتي اؤز افسانه‌لرین بيرده قلمه آلير چونكي بيلير: بير اولگو اولموشدور گاهدان انسانا عصرلردن قالان افسانه رؤيا اوخشاييب تسلّي وئرميشدير؛ اونا هر زامان داريخيب داردا قالاندا. اودور كي انسانليق بير پري كيمي داغلارين باشيندا بيزي سسله ­يير، بعضاًده بورونور گؤيرچين پالتارینا. او ساحيلسيز گؤيلردن اومود ديله­ يير. بو اومودلاري بسله ­ين، داغلار باشيندان بيزي سسله­ ين نغمه ­لر، عاشيقلارين سازلاريندان سؤيله ­ديك‌لري افسانه­ لرده بويلانير. آشيق چومچه­ سيني اينگيلده ­ديب افسونكار الي پرده ­لرده گزير، ساز نئللري تيتره ­یه­ رك اوره­ ك­لري تيتره ­دير! عشقي، آرزيني جانلانديرير. سهند، بو الهام دونياسينا قدم قوياراق اؤزو بير آشيق- دده قورقود ـ اولور، آتا ـ بابالاري­نين قهرمانليق داستانلاريني سؤيله­ مه­ گه جان آتير. شاعر، محبت داستاني ايله قهرمانليق داستاني آراسيندا بؤيوك و محكم ايلگي­ لر گؤرور، محبت سيز قهرمانليق اولماز، قهرمانليق محبت­ سيز اولورسا، ده­ يرسيزدير:

 انسانليق يوكسلن ان اوجا يئرين              بير آدي سئوگي­دير بيري محبت .

هر ياني آختارديم من درين ـ درين          آرايا بيلمه­ديم باشقا حقيقت.

   دوغرودان بو حقيقت آدلي سئوگي قهرمانليق – انسانليق يولوندا آتا – آنالاريميز دؤيوشموش، ووروشموش، عشقه چاتميشلار. بو عشقدن يارانان آذربايجان خالقي بوگون بو افسانه لري ايتيره رمي؟

سهند نئچه اثرلر يازيبدير كي بونلاري آد آپارماق اولار[۱۶]: دده قورقودون ۱۲ ناغيليني اوچ جلدده: ۱) سازيمين سؤزو ۲) دده­مين كتابي ۳) قارداش آندي،

   باشقا اثرلری: شاللاق، ارمغان، شهريارا مكتوب، آخر سؤز اشتاين بگه، كور چايليا مكتوب، سووئت گؤزه­لي، بوز چيچگي، حسرت، جيران، فرهاد، من تبريزدن گلميشم، زيارتنامه، اماما سلام و …

    بو اثرلر آراسيندا دده قورقود كتابيندان الهام آلاراق يازان اثرلري بو گونكو ادبياتيميزين پارلاق صحيفه ­لري و شعريميزين ايشيقلي حيصه ­لري­دير. سهند ديلميزي يئني­دن جانلاديب، تميزله ­ديب، حماسي گؤزه­ لليك ­لري ديرينمك­له سؤز باخيميندان دا بؤيوك بير خزينه معاصر ديليميزه باغيشلاميشدير. سهند دده قورقود ناغيللاريني قلمه آلماقلا، اولو بابالاريميزين ـ آنالاريميزين قهرمانليق، صداقت، محبت و ايگيدليك­لريني جانلانديرماق قصدينه گلميش و بو طريق ايله شهرياري دا اويادان –  مرحوم سهند اولموشدور. مرحوم سهندين خاطرلاما، ائليميزده ملي دويغو ياراتماغا خدمت ائتميشدير. خاطرلاتمالييام كي اوستاد مجلسلريني قورماق و اثرلريني اينجه ­له­ مه بو گونكي و گله­ جك نسيل­لره ان ضروري بير ايشدير.

هله يانار اوجاغيمدا كؤزوم قاليب

دوداغيمدا دئييلمه­ ميش سؤزوم قاليب

دويونله­ديم ايللريمي ايللره من

باغيشلاديم سئوينجيمي ائللره من

منه شاعر سؤيله ­ديلر

من اؤزومو شاعرلره تن بيلميرم

آما بونو بيليرم كي

اؤز خالقيمين صدامي يام

عمروم بويو يويورموشم

يخيلميشام

اويانميشام

دان يئرينين آل زنگينه بويانميشام[۱۷]

آردی وار . . .

قایناق:

م. کریمی، ائلیمیزین آتشین دیلی، تهران، انتشارات تک درخت، ۱۳۸۹٫

م. کریمی، آذربایجان معاصر شعری، تبریز، انتشارات نباتی، ۱۳۹۶٫

نظرات

ارسال دیدگاه