قوجا تبریز / دکتر جوادی زیوه

بو قوجا تبریزه هر لحظه قوجاق وئر
قافلانا، آیَا و ققنوسا قولاق وئر
اوچوروم ذیروه لره ، سینه دایاغ وئر
ایاغی آل اَلَه، معشوقه ایاق وئر
او شیرین دیللی «تیلیمخان»ه سایاق وئر

تبریزیم سنده یاتیب
کؤکلو، دَیَیرلی، اوجا بوی عاقیل و عاشیق
کی ائدر حضرت سیمرغ اولارا سجده ی صادق
اؤپه جک دیر
پاریس و لندن و مسکو ایاغیندان
آتن و بابِل و یونان
او اساطیره قاتان باشلی شهرلر
سنه تعظیم ائده جک لر

گوی مچیددن آچا معراجه قانات
شمس تبریزی ایلن، حضرت قاضی
حضرت روح الامین ده اونا راضی

وئرمیسن تاریخه شأن و شرف و شوکت
و عزّت
تقی رفعتینن
خامنه ای آچدیلا آزادلیقا بیر یول
وئردیلر او یولا رفعت
دوشمَسین درده سَنین دردین آلانلار
باشی قینرجه و طوفانلی یازانلار
همده مشروطه نی میدانا سالانلار

بارالها ! تبریزین باشی ساغ اولسون
او سهندین باشی طوفانلی قار اولسون
او شیرین چشمه لری بال، آخار اولسون
گئنه ده باغچالاریندا باهار اولسون
هامی قیزلار گؤزل اولسون
مارال اولسون
عسل اولسون
غزل اولسون
قیزیل اولسون
نگار اولسون
هجر اولسون
سارا اولسون
دشمنین سینسین اَلی
دردلی خفیف ، همده خوار اولسون
شاعیریم !
قیل و قال ائتمه قوورما
قارا قازماغلاری قازما
بوقارانلیق یولا آزما
قارا ماهنیلاری یازما

قرآنی قانمیان عاشیق لره قاندیر
عودی آل سال اودا یاندیر
تارینان قارمانی سیندیر
اوره یین سازینه سوزیله قولاغ وئر
گؤرنه سؤزلر آلیشیر سینه ده سن سیز

ایستریک خوش گله بایرام
لاله وئر سین بیزه بیر جام
شادلیغا، خوشلوغا باش گؤستَره ایام
باریشا کینه لی اقوام
هئچ بشر قالیما ناکام
آخ ! آخ !
هاردادیر نازلی گؤروشلر؟!
هاردادیر بالی اؤپوشلر؟!

قوی یازین شیهه سی یئردن گؤیه
قالخسین
ایلدیرملار گئنه شاخسین
آغ بولودلار گؤزو آخسین
سونالار
نازلی قادین لار
آیا بنزر
گونه بنزر
گوله بنزر
او شرابی گؤزیلن

عشقیله شیرین سنه باخسین

داغ گییر گوللو چیچک کؤینگین اوردا
باغ آچار گوللو چتیر قول بوداغ اوردا
سارماشیقلار اولالا قول بویون اوردا
لاله لر صف چکه لر
بلکه دوشه بیر یولون اوردا
چالالار سازی عاشیق لار
کی قورولسون تویون اوردا

کاش سیاسیت ائوی یانسین
قانمیانلار بونو قانسین
شاه گلیب یوخسولو اؤپسون
قوللارین بوینونا سالسین
شوقیلن دردلرین آلسین
او قیزیل عرشه چاتان قصره آپارسین

ایسترم خوش گله بایرام
هئچ بشر قالمیا ناکام
وئره لاله بیزه بیر جام

قول سالیبسان رقیبین بوینونا من سیز
کؤنلوم سیرچه سی غمدن بوکولوب
کونج قفسده بئله دنسیز
آلیشار روحی «حبیب»ین گئنه سن سیز
کاش گؤریدیم گؤزل انسانلاری غم سیز

ایسترم خوش گله بایرام!
آغا گوندن
آغا آیدان
آغا گویدن
قوناغیم وار
حضرت عشق کیمین شانلی
دیرلی، دایاغیم وار
تورک ائلینده ساوالان تک
ایاغیم وار
شهریارین غزلین نن بوداغیم وار
او ساری تئل لره جانا کیپریگیمدن
داراغیم وار
دوداغین اؤپمگه عاشیق
دلی
اودلو
دوداغیم وار

شطح و طاماتی آلیشدیر
عقلینن عشقی باریشدیر
اودونان سویو قاریشدیر
بو گؤزل دویغولاری قاندا چالیشدیر
نه ارسطو، نه فلاطون، نه ده سینا
سنه هئچ وقت چاتا بیلمز
سهروردی بو شیرین معرکیه
دیقت و شوقیله نگاریم باخا بیلمز

یاز قلم قانلی آرازدان
دئدی «الله صمد»
یازدی صمد
اولدوزا بیر قصه کی گون تک
گؤز آچار هر سحر افلاکه پاریلدار

یاز قلم جوشقون آرازدان
نازلانیب ، عشوه لنیب،
قاش گؤز آتان سئوگیلی یازدان
او شیرین دیلی شعفلی
شور و شهنازیده
خوش نغمه چالان
دشتی توتان
قلبی آچان یاره لی سازدان
دِه آشیق «دولت»ه چال سازی
گتیر خلقی مناجاته
دیریلسین تازادان
روحی بو یازدان

او چمندن کی دئیب یئل آذانین
لاله و نسرینیله نرگیس
قیلاجاق هر سحر احساسیله
او قانلی نامازدان
باهارین عطری دؤلوب کؤشنه یار
گَل اَل آچاق آللاها ساری
کی آپارسین بیزی یئردن گؤیه ساری
قورتولاق غصه و درددن بیه باری

سن سحر آچ باشیوی
قوی گئنه بولبوللر اویانسین
او شیرین نغمه نی چالسین
گول لری هوشدان آپارسین

تبریزیم آچ گئنه شهلا گؤزونو
تا هامی انسانلار اینانسین
کی گؤزلسن
کی عسل سن
کی غزل سن
گئنه داغلاردا گزرسن
گئنه باغلاری بزرسن……

دوکتور جوادی زیوه
تایپ: رحیمه . م

 

 

ارسال دیدگاه