آنا / اوستاد ناظر شرفخانه ای

سوزولور شیرین دیلیندن آنا روحومون غذاسی
نییه دینمیسن؟ دانیش، دیین دیلین اولوم فداسی
من ایله دانیش کی دولسون یئنه بو شکسته شوره
گتیرر بالانی شوره آنانین شیرین نواسی
آچیلار اورک عزیزیم سن آغیز آچیب گولنده
نئجه کی ائدر شکوفا گولو بولبولون غناسی
آنا جان اومیدیم، عشقیم بو جهاندا تکجه سنسن
و او بال سوزن دیلیندیر هامی دردیمین دواسی
منی بیرده آل قوجاقه یئنه سینه ن اوسته یئر وئر
کی اَسَر سنین دوشونده منه جنّتین هاواسی
آنانین تبسّموندن اوشاق اویره نر تبسّم
آنانین گولوشلریندن گولوشه دولار بالاسی
اوره ییم دولار سوینجه هله ده ناغیللاریندان
جانیمی نوازش ائیلر هله لایلایین صداسی
آنا سئوگی لر حدیثین دئمک اولماز آیری دیلده
قورولوب سنین دیلینده منیم عشقیمین اساسی
یازیلاندا عمرِ باقی ظولومات ایچینده خیضره
یازیلیب سنین لبینده منیم عومرومون بقاسی
قازیلیب بهشتین آدی آنا جان آیاغین آلتدا
و سنین رضایتینده اولو ربّیمین رضاسی
سنی سئومک اوسته یاندیم بئله بوسبوتون کول اولدوم
نه دئمک ازلدن عشقین قویولوب بو جور بناسی
منی سندن آیری سالماز نه اولوم نه دار نه زیندان
چالیشیر کیم آیری سالسین ناگهان اولوم جزاسی
بوتون عشقلر جهاندا یئتیشللر انتهایه
سنین عشقینین عزیزیم اولا بیلمز انتهاسی
آنا بیرده گوزلرین آچ ائله “ناظره” نظاره
گئده تا کی سینه سیندن غمین اللی قاتلی پاسی

ناظر شرفخانه ای

 

نظرات

ارسال دیدگاه