کرمعلی باقری (زنگانلی کرم)

آشیق ادبیاتی، آشیق شعری و موسیقی سی گونو – گوندن خالقیمیزین اوره یینده یئر سالیر و اؤزو اوچون زمینه یارادیر. بوگونلرده چوخلو گؤروروک ییغینجاقلاردا و تویلاردا گنجلریمیز ساز اله آلیب چالیب – اوخویورلار. بو گنجلر گؤزل سعرلر ده قوشورلار. زنگاندا یاشایان کرمعلی باقری بو گنجلردن بیری دیر. او ۱۳۵۸جی ایلده زنگانین ۹ کیلومترلیگینده بیجار یولوندا یئرله شن دیزج بالا (خارابا دیزه) ده آنادان اولموش و ۷ – ۸ ایل بوندان اؤنجه زنگانا کؤچموشدور. آنجاق هله ده اؤز آنایوردوندا اکینچی لیک له مشغولدور.

   کرم تخلصو ایله شعرلر قوشوب، اوره ک سؤزلرینی کاغاذ اوسته گتیریر و سازیندا اوخویور. او، گؤزل بیر سسه ده مالیک دیر. ساز و سؤزه کندلرینه بوللو – بوللو گلن رحمتلی آشیق عرب دن اؤیرنمیش و ادبیات لا موسیقی یه ماراق بسله میشدیر. بوندان علاوه دای اوغلوسو حسین اسکندری ده اونون ساز چالماسینا سوق وئرمکده بؤیوک رولو اولموشدور. او نئچه ایللر بوندان اوّل بیر ساز آلیر؛ آنجاق بارماقلاری نین کسیلمه سینه گؤره ساز چالماق چتین اولموشدور. بو دورومدان ناراحات اولان کرم، بیر گون یوخودا آشیق عربی گؤرور و ساز چالا بیلمه دیگینی اونا شکایتله نیر. آشیق عرب یوخودا اونون سول الی ایله ساز چالماغی تاپشیریر  و نهایتده سول الی ایله چالماغا مجبور قالیب و بوگون سول الی ایله نه گؤزل ساز چالیر.

   کرم خصوصی ییغینجاقلاردا، فامیل آراسیندا اولان توی – دوگونلرده ساز چالیر، اوخویور و شعر ده قوشور. او، اؤز شعرلرینی گؤزل سسی ایله اوخویور. آشیقلیق صنعتی نی دوزگون اؤیرنمه یه چالیشیر. بیر زامانلار منوچهر نجفی یانیندا ساز اؤیره نیر، آنجاق شعر و هاوالاری کاسئتلردن آلیر. بوگون بیر ماهیر آشیق کیمی چالیب – اوخویور. بونون یانیندا شعرلرینی ده آخساقسیز اولاراق سؤیله ییر. بورادا کرمین نئچه شعرینی بیرگه اوخویالیم:

” داریخدم ”

آشیق جلال هاردا قالدین داریخدم
گل پوزقون کؤنلومو سن ده آل گؤره ک
سونرا باس باغرینا تللی سازینی
سئودیگیم هاوانی بیر ده چال گؤره ک.

قیش سووشدو، باهار گلدی، یازدی یاز
سن گلرسن منیم کؤنلوم سازدی ساز
یوباندیرما واقتی زامان آزدی آز
گل بیر بیزه مهمان اولوب قال گؤره ک

نه دن بویله گئتدین ” کرم ” سایاغی
گؤز یاشیم ایسلاتدی الده واراغی
بو سنیق قلبیمین گل اول دایاغی
یولونو بیر بیزه ساری سال گؤره ک

زلیمخان دونیاسی

” اینجیمه مندن ”

وفالی دیلبریم اینجیمه مندن
سنین آرزین منیم دیله ییمده دیر
گؤزل جمالینی دوتماقا نه وار
چکمیشم نقشینی اورییمده دیر.

پاک عشقین دونیادا بیر قیمت یوخو
منیم نه واریمدیر سنیندیر چوخو
ایلک باخیشدا ووردون قلبیمدن اوخو
هله ده وار ایزی کوره ییمده دیر.

” کرم”م عشقیندن اولمارام غنی
سون عمرومه قدر سئوه جم سنی
وئردیگین یادیگار یاقوت یمنی
سالمیشام نیشانا بیله ییمده دیر.

“آی آنا ”

سنسیز یوخدور بو دونیانین لذتی
گؤزومون قاراسی سنسن آی آنا
جانیندان آیریلیب یاری جانیمسان
قلبیمین پاراسی سنسن آی آنا.

سنی من ایسترم جانیمدان عزیز
عشقینین اوستونه یوخ عشقی تمیز
حوسنونه سغیشماز جوشسا دا دنیز
محبت دریاسی سنسن آی آنا.

” کرم ” نئیلر سنسیز قورو جنتی
عؤمور بویو ادا ائده سننتی
جهنمده یانار چکمز مینتی
بهشتین معناسی سنسن آی آنا

” قوجالیق ”

ایگیت چوخ گوونمه قولون گوجونه
گون گئچر سنه ده چاتار قوجالیق
دئمه کی دلی یم گوجلویم ایندی
سندن بتَرینه باتار قوجالیق.

او گؤزل جمالین آلار اوزوندن
بوکر بئلین، طاقت آلار دیزیندن
هاردا اولسان گلر تاپار ایزیندن
قاپیزین دالیندا یاتار قوجالیق.

ائشیتمز قولاغین آچیلماز گؤزون
توتماز دیلین داها دئیه سن سؤزون
هوشون باشدان آزار بیلمه رن اؤزون
عقلینی باشیندان آتار قوجالیق.

دوزگون یاشا، انسان یاشا، شاد یاشا
گله جک قاشیقان نه تؤکسن آشا
” کرم ” نه ادیبسن گله جک باشا
بد عملان زهَر قاتار قوجالیق.

” سئویرم سنی ”

منی انسان خلق ائله دین
آللاهیم سئویرم سنی
اشرف مخلوق ائله دین
آللاهیم سئویرم سنی.

وئردین منه شیرین جانی
قلبیمده جوشدوردون قانی
نعمت لرین یوخدو سانی
آللاهیم سئویرم سنی.

گؤزوم آچدین یورد یئرینده
شرفلی آذر ائلینده
ذکر ائده رم تورک دیلینده
آللاهیم سئویرم سنی.

” کرم ” دئیر یوخدو کمیم
سن کی وارسان نه دیر غمیم
اول – آخیر سون همدمیم
آللاهیم سئویرم سنی

” بیر وصییت ”

آ یولداشلار مندن سیزه وصییت
اولماسین هیچ زامان بو ایش عار سیزه
ایکی کؤنول بیر – بیریلن کوسنده
باریشدیرماق اولسون بیر ایجبار سیزه.

قویمویون ائللرده کینه چوخالسین
قارداش قارداشیندان کوسولو قالسین
آیریلیق چترینی ائولره سالسین
گئچمه سین گونلریز آهی – زار سیزه.

انسان بیر – بیریلن یاشاسین گره ک
باجارسا الینه گئتیرسین اوره ک
قویمویون کینه دن قورولسون دیره ک
اولماسین دونیادا حیات دار سیزه.

“کرم”م مطلبیم عیان اولمادی
سؤزومو ائللره یایان اولمادی
من چوخ دئدیم حاییف سایان اولمادی
ایندی بوننان بؤیله قالیب جار سیزه

” نه گلدی ”

سویوق باخیشلارین آلیر جانیمی
آهو باخیشلارا گؤزه نه گلدی
بوزلادیرسان دامارلاردا قانیمی
ایستی دوداقلاردا کؤزه نه گلدی؟

خومار گؤزلرینی یانا سوزورسن
سیخارسان اوره گی جانی اوزورسن
دانیشاندا دوداغینی بوزورسن
آغزی بالدان شیرین سؤزه نه گلدی؟

بللی دیر او صحبتیندن سؤزوندن
یالان دئیب دانیشمیرسان دوزوندن
جاوانلیق چاغیمدا سالدین گؤزوندن
اللییه – آتمیشا – یوزه نه گلدی؟

” کرم ” دئییر گؤزل عشقین یولوندا
سوز وئریبسن دایان گیلان قولوندا
شیطان نه دن دوروب ساق و سولوندا
اَیری کی اَیریدی، دوزه نه گلدی؟

“بئزار اول بئزار ”

دلی کؤنلوم اویما هر بیر یئته نه
نانجیب یولداشدان بئزار اول بئزار.
دیلده جانین مالین قوربان ائده نه
نانجیب یولداشدان بئزار اول بئزار.

اولده دوست اولوب گوله للر اوزه ن
دانیشاندا شکر چیله للر سؤزه ن
سونرا تیکان اولوب باتاللار گؤزه ن
نانجیب یولداشدان بئزار اول بئزار.

سن بیلسن قدرینی قوهومون ائلین
ییخیلسان هر زامان دوتاللار الین
هر یولدان گئچه نه باغلاما بئلین
نانجیب یولداشدان بئزار اول بئزار.

دوستلوق دونون گئیب باشین قاتدیلار
دار گونونده قارا پولا ساتدیلار
“کرم ” تک اوغلانی دای آغلاتدیلار
نانجیب یولداشدان بئزار اول بئزار.

” آغلادیم ”

اوخودون اورکدن پوزدون حالیمی
بیر یانیقلی هاوا چالدین آغلادیم
بیر آندا مست اولدوم گئتدیم اؤزومدن
الدن قراریمی آلدین آغلادیم.

تاب ائتمز هر سؤزه عاشیقین باغری
سالدین اوره ییمه نه یامان آغری
سئوگیسیز یاشاماق چتیندی دوغرو
بیر کورک خیالا دالدین آغلادیم.

سن آللاه”کرم”ی توتما سن ناشی
باخما قامتینه دولمویوب یاشی
یار یولداش یولوندا تؤکوب گؤز یاشی
سئوگیمی یادیما سالدین آغلادیم.

” کرمعلی زنگانلی “

ارسال دیدگاه