دریا او دریا دئییل دی / علیرضا ذیحق

حیکایه

ایللر سونرا، یانیندا قدم ویریردیم. آمما فیکره دالیب گیژ کیمی ایدیم. نه دالغالار ساحیلی اؤپوردولر نه ده ساحیل بللی ایدی .یئر چات – چات اولموشدو و آتدیغیم آددیملار دوزا باتیردی . بیر آن بئله منه ائله گلدی کی سو باشیمدان آشاراق گؤزلریم آجیشدی. بیر خیاری ایکی بؤلوب سورتدوم گؤزومه کی سویون شورلوغونو آلسین. سونرا چیمه رک دالدیم  دریانین درین لیک لرینه کی گؤز ایشله دیکجه ماوی لی یی گؤزه دَییردی. گمی لر آداملار لا دولو ایدی و قاییقلار گلین دامادلاری میندیریب دریانی گزدیریر دیلر . کؤچری قوشلار دا آغ قانادلاری و قیرمیزی دیمدیک لری له باشیم اوستونده اوینایاراق اوچوردولار. باشیمین دالیندا دا پلاژ لا ردوزمه دوزوب ساحیلی بوروموشدولر. بیر دسته ده دونبک قووالین دؤوره سینه ییغیشیب “سکینه دای قیزی” ماهنی سینی اوخویاراق سسلری دالغارا قوشولوب  آدامین قولاغینی نوازیش ائدیردیلر. یای لاری بورا بهشت ایدی و اوزلری دریایا باخان کافه لرچئشیدلی یئمک ایچمک لرله دولو اولاراق تلیس دن هؤرولن ایلیق سولو حاماملار، آرواد کیشی لرین گولوشو و اوشاقلارین شیطانلیق لاری، شن ماهنی لارلا قاریشاراق ، مین لرجه توریستی بورا چکیردیلر. آدالاری  دا اؤزلرینه بیر دونیاایدلار. قوچ لار و ماراللار یوزلرجه چئشیدلی قوشلارلا گؤزلری اوخشاییب گونشین ایلیق ایستی سی، سویئل و تورپاقین لذتینی بوتونلوک له آدامین جانینا چیله ییردیلر .سو اوزونده چیمه ن قوشلار منی اؤزلرینه ساری چکدیلر و  ایره لی یورودوکجه تکجه اونلارین نعشینی گؤردوم که دوزلاقلارا سَپه لنمیشدیلر. اؤزومه گلدیم. دریا قوروموشدو ونه اونون یان یؤوره سینده اولان اوزوم باغلاریندان خبر وار ایدی نه ده آدامی سو اوزنده آپاران دالغالاردان. ساحیل قاریشمیشدی قورولوغا و گؤزه دَیه ن تکجه قوشلارین نعشی ایدی و یوک ماشین لاری نین دوز یوک له مه سی. قوشلارین دیمدی یی قورویاراق قاناد لاری دوزا بَلَن میشدی .اوره ییم سیخلیری. بو قدر اوزاق دا و قوربت ده یاشایان دان سونرا گلیب بو منظره نی گؤروب دریانین مرثیه سینی نه تکجه ائشیتمک بلکه گؤرمک، جانیمی اوزوردی و ” سکینه دای قیزی ” ماهنی سینی خاطیرلایاراق قاچیرام دریانین قلبینه و باشاردیقجا هؤنکورتولرله آغلاییرام. قاییدیرام شهره. جماعت پاساژلاردا گزیرلر و کیمسه پلاژلارین فیکرینده دئییل. اورمو شهری همان شهرایدی آمما دریا او دریا دئییلدی.

ارسال دیدگاه