لال اویونو / غلامحسین ساعدی (گوهر مراد)

۳

توتک

   چؤل اورتاسیندا دمیر بیر اوتاق، پنجره­ سیز دووارلار، اوتاغین قاپیسی تاماشاچیلارین اوز به اوزونده، قاپی یانیندا بالاجا پوتوشقا.

   بیر کیشی پوتوشقادان ائشیگه باخیر، اوتاق قارشیندا قیزیل گول بوتاسی گؤوه ­ریر. آت سه­سی اوزاقلاردان ائشیدیلیر، آغاجین بوداغی اوتاغین دالیندا یوکسه­ گه قالخیب، اؤنه اگریلیر؛ قیرمیز و یئککه آلمالاری واردیر. گول یانیندا بیر قوش اوخویور. قیزیل گولون یانیندا بیر فواره قالخیب – سویو چیله ­ییر، یاواشجا بیر یئل اسیر، آغاجین بوداغینی ترپه­دیر. کیشی الینی پوتوشقادان ائشیگه اوزالدیر، چالیشیر آغاجین بوداغینی توتسون، آنجاق باجارمیر؛ هاوانی توتور. بیر قادینین گولوش سسی­ اوزاقدان ائشیدیلیر. کیشی باشینی پوتوشقادان ائشیگه چیخارماق ایسته­ ییر و باجارمیر. دقت و اومودسوزلوقلا دور – بره ­یه باخیر، سونرا هیرسله­ نیب قاپینی چالماغا باشلاییر. قاپییا تَپیک وورور، آنجاق قاپی آچیلمیر. یئنه پوتوشقانین دالینا گلیر. آغاج گولونن دولوب. بیر قادینین اوخوما سسی­ اوزاقدان ائشیدیلیر و بیر آتین چاپاراق آددیملاری­نین سسی ایله نئچه قادینین گولمه­ لری­نین سسی گلیر. کیشی یئنه ده قاپینی بتردن چالیر، پوتوشقا دالیندادیر. آغ پالتارلی بیر قادین سئن اوسته گلیر. نازلاناراق اؤنه گلیر، یوموشاقجاسینا اگیلیب – بیر گول دریر؛ ایگسیلیر و گوله­رک گولو تئللری آراسینا تاخیر. فواره ­نین قاباغینا گئدیر، سو ایچیر. بوداقدان بیر آلما دریب – دیشلیر. اوره­ ک اوخشایان بیر موزیک سسی اوزاقدان ائشیدیلیر؛ قادین قولاق آسیر. آتین دیرناقلاری نین سه سی یاخینلاشدیقدا بیردن کسیلیر. اوزاقدان بیر کیشی چیغیریر: “ها! ها!”. قادین قولاق آسیر و جواب وئریر: “هو، هو!” و گوله ­رک قاچیب صحنه­دن چیخیر.

   کیشی قاپینی به­تردن دؤیور، قاپی بیردن آچیلیر، کیشی ائشیگه اگیلیر و قاپی همن به­تردن باغلانیر. کیشی، قادین گئده ن طرفه قاچیر، باخیر. بیر آن مات دایانیب، اومودسوزلیقلا قیزیل گوله ساری گئدیر، قیزیل گول یئرینه، تیکان بوتاسی گؤرور. فواره­یه ساری گئدیر، اگیلیر سو ایچمه­ یه؛ فواره قورویوب. یاخاسین آچیر و کؤکسونو یئله ساری توتور، یئلدن خبر یوخ، یئره اوتورور، دیزلرینی قوجاقلاییر، گؤزله­ین گؤزلریله هر یانا باخیر. بیردن آیاغا قالخیب چیغیریر: “ها، ها!”. گؤی گورولتو کیمی بیر سَس جواب وئریر و ایلدیریم صحنه نی ایشیقلاندیریر. کیشی اوتاغا ساری قاچیر و قلپینی چالیر، قاپی آچیلمیر. یئنه چالیر، یورغون و اومودسوز یئنه یئره جومور و گؤزون یومور. تیکان بوتالاری قیراقدان گؤوه­ ریب اؤنه گلیر و بوتون یؤن – بره­نی توتور و دیزلریندن یوخاری قالخیر.

   کیشی قورخاراق قالخیر و قاپینی ­تپیکله دؤیور. قارا بیر بولود صحنه­نین اوزون توتور و گؤی یئنه گورولدور. یئنه قاپی چالیر، قاپی آچیلیر، کیشی تله­ سیک ایچه­ ری گیریر و قاپی باغلانیر.

   نئچه دامجی یاغیش یاغیر و توکه نیر.

گونش چیخیر. کیشی پوتوشقا دالیندا تاپیلیر. آلما آغاجی نین بوداغی اوتاغین دالیندا زویون آشاغی ائنیر. قیزیل گول ایری گوللرله گؤرونور. فواره سو آتیر. موزیک سه سی ائشیدیلیر. قادین آغ پالتارلا صحنه یه گلیر. نئچه کیشی اوزاقدان گولورلر. کیشی یئنه قاپینی چالیر. قاپی آچیلمیر. قادین گول دریر، سو ایچیر و آغاجین بوداغینا ساری گئدیر. کیشی قاپی چالیر. قادین آلمانی دیشله ­ییر. بیر آتین آددیملاری­نین سسی یاخینلاشیر و کسیلیر. بیر کیشی چیغیریر: “هو، هو!:”. بیر گنج کیشی صحنه یه گلیر، قادین گولور و دیشله­ میش آلمانی کیشی­یه ساری آتیر. کیشی آلمانی قاپیر و گوله­رک صحنه­ دن چیخیر. کیشی اوتاق ایچیندن یئنه قاپینی چالیر، قادین قاییدیر، باخیر و گولور. قاپی بیردن آچیلیر. کیشی ائشیگه چیخیر. قاپی باغلانمیر. کیشی قاپی­نین آستاناسیندا دایانیر و قادین باخیر. بیر توتک سسی ائوین دالیندان ائشیدیلیر. قادین قولاق آسیر. توتک سسی یئنه ائشیدیلیر. قادین قاچیر. کیشی قاباغا گلیب، قولاق آسیر. توتک سسی نئچه دؤنه تکرارلانیر. کیشی دال دالا گئدیر. یئنه توتک سسی­. کیشی اوتاغا گیریر. قاپی باغلانمیر. توتک سسی صحنه ­نی دولدورور، کیشی اوتاق ایچینده یئره چؤکور، گؤی گورولتوسو و ایلدیریم یئنه صحنه­ نی ایشیقلاندیریر. یئل، آلما آغاجی و قیزیل گولو ترپه­ دیر و یاغیش دامجیلاماغا باشلاییر.

***

ارسال دیدگاه