غلام ترک / بهرام اسدی

کئچن یوز ایلده شوونیستلرین قلملرینده دؤنه-دؤنه راست گلدیگیمیز و ادبیات متنلریندن تاریخی متنلره کؤچورولموش و اونون واسطه­سیله خلقیمیز و ائلیمیزه سایسیز توهینلر گلن سؤزلردن بیری «غلام ترک» سؤز بیرلشمه­سی اولموشدور. اؤلکه­میزین علامه­ی دهر(!!) اولان شوونیستلری بو سؤزو آغیزلاریندا ساققیز ائدیب چئینه­میشلر. بو سؤزون فارس ادبیاتیندا گلدیگی دانیلمازدیر آنجاق اونون معناسینین تام ترسین آلیب ملتین خوردونا وئرمک و اونونلا تورک حاکملرینه و ایگیتلرینه توهین یوروتمگی آنجاق شوونیستلر باجارار. بیزیم شوونیست قارداشلاریمیز کئچن یوز ایلده بو سؤزون آنلامین سفسطه ایله قاریشدیریب و ادبیاتدان تاریخه کئچیرتمگی باجارمیشلار.

دوغرودان دا اونون آنلامی نه­دیر؟ «غلام ترک» دیلیمیزده ایکی معنا وئرر: ۱- تورک دیللی غلام ۲- تورکون غلامی. شوونیست حضرتلر بیرینجی معنانی آلیب بلکه ده سفسطه ائدیب و یوز ایل مدتینده آذربایجان ملتینه اولمایان توهینلری ائدیبلر و ائدیرلر. بیر حالدا کی فارس ادبیاتیندا گلن اونون ایکینجی آنلامیدیر. دوستلاریمیز دقت ائتسینلر: ایکینجی آنلامیدیر. شوک اولمایین دوغرو ائشیتدینیز: غلام ترک، تورکون غلامی و تورکون کؤله­سی دئمکدیر و فارس ادبیاتیندا بونا چوخ سایدا مثاللار گتیرمک اولار. بیرینجی مثال حضرت مولانادان:

منم باری بحمدالله غلام ترک همچون مه

که مه­رویان گردونی از او دارند زیبایی(مولوی-دیوان شمس)

بؤیوک مولانا بو ایکی مصراعدا اؤزون گؤیلرین آی اوزلولری اؤز گؤزللیکلرین اوندان آلان، آیا بنزه­ین تورکون غلامی آدلاندیریر و بو آدلاندیرماغا دا تانرییا شوکورلر ائدیر(بحمدالله)

بورادا تورک غلام دگیل، تورکون غلامی منظور اولوبدور.

بؤیوک فارس شاعری حضرت حافظ بویورموشدو:

ترک ما سوی کس نمی‌نگرد

آه از این کبریا و جاه و جلال

بورادا دا تورکون مقامی ان اولو بیر مقامدیر و همین حافظ باشقا بیر یئرده یازیر:

یارب این نودولتان را با خر خودشان نشان

کاین همه ناز از غلام ترک و استر می‌کنند

بورادا دا تورک غلام دگیل تورکون غلامی و تورکون قوللوغوندا و خدمتینده دورانلاردان سؤز گئدیر و بحث اولور.(لطفا دقت ائدک)

فارس شاعری، «امیرخسرو دهلوی» اؤزون تورکون غلامی آدلاندیریر:

ترک من ای من غلام روی تو

جمله شاهان جهان هندوی تو

سلمان ساوجی همین مسئله­یه بئله یاناشیر:

نیکبخت آن است کاو هندوی چشم ترک توست

یا غلامیّ در دارای صفدر می­کند

قاآنی دن مثال:

هر شب به شرط آنکه کند یاد از این غلام

بالین ز زلف ترک تتاری کند همی

بؤیوک شاعر عطار اؤز تذکره الاولیا اثرینده نثر اولاراق یازیر: ………….. قضا را چند ترک مست بدان غلامان رسیدند ………..

سیف فرغانی بئله یازمیشدی:

من غلام توام و بنده شدند آزادان

هندوی چشم تو را ای مه ترکستانی

اوحدی نین ده دیوانیندا تورک و غلام سؤزلری بئله گتیریلمیشدیر:

چشم ترکت را غلامان گرچه بسیارند لیک

زین غلامان مقبل آن خال است و مخلص خوی تو

و همین اوحدی باشقا یئرده تورک حاکمی سلطان محمودون آدین قئید ائدرک یازیر:

گاه عبدی و گاه معبودی

چه عجب چون غلام محمودی

خواجوی کرمانی بدیعی بیر تصویر یاراداراق یازیر:

شب شامی لباس زنگی آسا

غلام سنبل هندوی ترکان

ز ترکان گوشه چون گیرم که بینم

کمان حسن بر بازوی ترکان

بو مثاللاری داها چوخ آرتیرماق امکانی دا واردیر. اونو الده ائتمگه فارس شاعرلرینین دیوانلارین واراقلاییب اونلاردان سایسیز مثاللار گتیرمک اولار آنجاق بورادا بو نئچه مثالا قناعت ائدیرم و بو نئچه مثال، اوستده گتیردیگیم شوک ادعانی ثبوت ائتمگه یئترلی گؤرونور. گؤروندوگو کیمی شعوردان کاسیب اولان شوونیستلر اؤز دیللرینین ده ترکیبلرین آنلامیر یا دا آنلادیقلاری حالدا باشقا ملتلره توهین ائتمک اوچون سفسطه سلاحینا دولوب و سؤزو تام ترسینه آنلاتمیشلار و آنلادیرلار. تانری تعالا دونیانین بوتون جسمانی و روحانی مریضلرینه شفا وئرسین و بو شفانی شوونیست جنابلارین دا اوزرینه جالاتسین.

گؤروندوگو کیمی فردوسی و اونا تای چوخ آز سایدا اولان تاریخی مریضلری استثنا ائتمکله فارس ادبیاتی و فارس ملتینده تورک ملتینه سایقی و حورمت دالغالانیر. بونونلا دا بیزیم تنقیدلریمیز و ایرادلاریمیز فارس ادبیاتی و فارس ملتینین آیاغین توتمور. بیزیم ایرادلاریمیز و تنقیدلریمیزین آماجی انسانی و اسلامی شعوردان و دوشونجه­دن اوزاق دوشموش و روحی بحرانلارا دوچار اولموش شوونیستلردیر. بیرداها تانری تعالادان بوتون انسانلارا سعادت و بیری-بیرینه سایقی تمنا ائدیب مریضلرین شفاسین دیله­ییریک.

اورمو-بهرام  اسدی

ارسال دیدگاه