نیه یاغیش یاغمیر / حمید احمدزاده

خالامین اری جوان اؤلدو ، خالام اؤز ارینه اورک سئوگیسی وار ایدی .
او اوزدن اره گئتمکدن داها چکینیردی . اما بیزیم کند ده مگر قویالار آدام اؤز سئودیگی کیمی یاشاسین ، هر یئریندن دوران خالاما ائلچی دوروردو .
بیری دییردی آی قیز ، من سنی قیزلیق زامانیدان ، بولاق باشیندا سو کوزه سینی چیگنینده داشیار کن گؤروب ، بیر کؤنول یوخ مین کؤنول عاشیغین اولموشام . داها اؤزگویه سؤز وئرمه .
بیری خالامین یاپا ، یاپماغین گؤروب ، گیزلیندن عاشیق اولموشوموش . خالامین اری اؤلندن سونرا ، گیزلی سیرین ، داها گیزلتمیردی .
اوزون سؤزون قیساسی ، خالامین سؤزو دیللرده گزیردی.
آخی اولدن بیزیم کند ده ، دول آروادین مشتریسی قیزدان چوخ اولاردی.
آنجاق یازیق کیشی نین قیرخی چیخیب چیخمازدان، ائلچی لر خالامین قاپیسنین، دابانلیغین، دابانلیغیندان چیخاردیردیلار.
اما خالام دا ایکی ایاغین بیر باشماغا سوخموشدو. نوح دییردی ، پیامبر دئمیردی.
آنجاق گونلر هفته لر سووشدو گویا خالامین دا عده سی سووشموشدو.
بیرگون گؤردوک کند اهلی مصلی یا چیخیب، الده قاشیق، چومچه، الله دان یاغیش دیله ییردیلر .
اما او ایل ده سانکی یاغیشین ملائکه سی بیزیم کنددن کوسموش آیدی. اصلا بیزیم کندی اونوتموش ایدی.
کند اهلی مصلادان دؤنه دؤنه ، کندین یوخاری تنگه سینده ، «فاطما »ننه یه راست گلدیللر .
فاطما ننه سورودو: اوشاقلار ! هاردان گلیرسیز ؟
مصلی یا چیخانلار دئدیلر: چیخمیشدیق مصلایا شاید اللاهین رحمی گلسین بیزلره ، آخی زمی – کوشن سوسوزوندان یانیر .
آیدین بولاغی ، شکربولاغی ، دادلی بولاق، میرزا ابراهیم بولاغی، قوروماقدادیر.
فاطما ننه  نه آلدی ، نه ساتدی  دئدی :
– نه زامانا قدر کی سید قیزی ائلچی لرینه هه جوابی وئرمه ییب، خیر و برکت و یاغیش بو کنده گلمز .
«منیم یوزدن آرتیق یاشیم وار، دده بابامدام ائشیتمیشم کی هر کندده دول آرواد اولسا، اورادان خیر و برکت قاچار .»
ائله بو سؤز بیر دقیقه نین عرضینده، شکر بولاغی کندین بورودو.
داها منیم خالام کند اهلی نین گؤزونده چیبان کیمی گؤرونوردو. هرکسین چؤره گی تندیره کوت گئدیردی، خالامدان گؤروردولر. نه باشیزی آغریدیم هامی بوتون فلاکت لرین، خالامین دول اولماغیندان گؤرور دولر.

ملا احد یئله قارشی کندین کدخداسی ایدی. یئله قارشی کندیندن، قیز بسدی خانیم ایله ائولنمیشدی، اونا علاوه بیزیم کنددن بیر آرواد آلمیشدی، ۵۰ دن آرتیق سنّی وار ایدی . ایکی آروادی اولدوغونا رغما، منیم ده خالاما دا مشتری چیخدی.
خالام اورگی یارالی، گؤزو قان یاشلی، کندین مشاطه لرینین الینده ایدی.
او گئجه سانکی گویون بولودلاریدا ، خالامین حالینا آغلاییردی .

هریئری سئل سویو گؤتورموشدو .
آخی کندیمیزده دول آرواد قالمامیشدی .

ح. ا. ۱۳۹۶/۸/۲۱

نظرات

ارسال دیدگاه