گؤزل آنا / امیر نصیری (زنگانلی ائلمان)

شوه تک  ساچینا  زامان  دن سالیب
یام یاشیل گونلری کیم سندن آلیب؟!
اوزومده  دوداغین ، ایستی سی قالیب
ایندیسه یارپاق  تک اسیرسن، آنا !
دونیالار بیر یانا ، سن ده بیر یانا

آیریلیب گئدیرم اوزاق بیر یؤلا
گاه ساغا چؤنورم ، گاهدان دا  سؤلا
آیاغیم ایلیشیر  داشیلا کؤلا
یوخودا دیسکینیب دئییرسن ، جانا
دونیالار بیر یانا ، سن ده بیر یانا

اتگینده گولوم ، گولشنیم قالیب
بیلمیرم یئنه وار؟ یوخسا سارالیب !
گونشیم هارداسان ؟گونوم قارالیب
داریخیب قولاغیم یئنه بیر جانا
دونیالار بیر یانا ، سن ده بیر یانا

یاواش  سور دئیردین چرخینی آمان
هادیر اول ییخارسان ، یاماندیر یامان
ایندیسه قوجالدیب دونیامی ، زامان !
دوندریب بو خزان کؤنلومو قانا
دونیالار بیر یانا ، سن ده بیر یانا

سئوینجله لاردین  دیزلرین اوسته
لای لایلا اوخشاردین یاتام اوز اوسته
گئجه لر یورغونلوق قالدی گؤز اوسته
قوربانام موقددس، سن تک عونوانا
دونیالار بیر یانا ، سن ده بیر یانا

داغلارین  مارالی یاشیل چیچگی
دردلرین  درمانی ، آنا لچگی
بالانین شیپ شیرین سن سن گؤیچگی
الیمدن  دوتاراق گلیرم جانا
دونیالار بیر یانا سنده ، بیر  یانا

شربتین دادی  یوخ  آغزیمدا  سن سیز
یاراشماز  داغلارا  یاشاسین ، چن سیز
گؤرمه دیم گؤزونو  یوماسان من سیز
ساچینا دن دوشوب  یئتیشمیر  سانا
دونیالار بیر یانا ، سن ده بیر یانا

هر   زامان سیخیلمیش اورییمد  ه سن
نیسگیللی  آرزیمد ا ، دیله ییمده سن
گؤزلورم ، گؤزومون یاشین سیله سن
سودونو حالال ائت آنا ، « ائلمانا »
دونیالار بیر  یانا ، سن ده  بیریانا
امیر نصیری”ائلمان”