“چیلله” / خسرو باریشان

دالیسیندا قاپینین
شاختا بابا دایانیر.
پوفله دیکجه هر یانی
شاختا، قار، بوران آلیر.

ایچینده ایسه ائوین
بوگون بوتون عائله
چیلله شنلییی اوچون
ییغیشیبلار بیر یئره.

آنجاق ائلچین بالانین
ذهنینده بیر سوال وار؛
دده سیندن سوروشور.
ائشیکده ده یاغیر قار.

مگر چیلله دئییل می
ایلده لاب اوزون گئجه؟
قارانلیغا، شاختایا
آخی سئوینیم نئجه؟

دونور حیوانجیغازلار؛
آغاجدان یاپراق دوشور.
کوچه ده ساققیز ساتان
اوشاق تیتره ییر، اوشور.

دده سی دئییر: -آخی
هرگون چیلله دن سورا
اوزاناجاقلار گوندوزلر
قوووشاجاق باهارا.

شعر: خسرو باریشان
گوز-۱۳۹۶
اوشاق شعری

ارسال دیدگاه