ایکی شئعر / خسرو باریشان

۱

بیر روماندیر هر اینسان
اوخویونجا یاشایار
ائهئ..ئی.. اوخویون منی
ائی
سؤز داشییان آددیملار
ائی
سؤز جالادان باخیشلار
ائی
سؤز اؤپمه ین دوداقلار
اوخویون منی
گور سسله
هر نفسله
دورمادان اوخویون

***

۲
“اوْزوْن اوزلوم”

ایینه‌سینه تیکیلدیک دونیانین
آیدینلیغیمیز
بوُلانلیق گؤزلره باتدی.
قاناتمایاق دئیه
آییران بیر چای کیمی
هپ قانادیق،
قانادیق…
آنایدیق، بیز آنا…
دردلره کؤینک اوْلوب
عؤمروموزو سینیرداکی گوللره کپنکلر توْخودوق.
سینیرلار پوُل-پوُل پوُل کیمی…
پوُللار زامان کیمی…
زامان دیکتاتؤر کیمی
بوُ بئیتی میزیلداییر قوُلاغیما:
– چالخاندیقجا، بوُلاندیقجا زامان نئهره کیمی،
یاغی یاغ اوسته چیخیر، آیرانی آیرانلیق اوْلور.
آه آچیلیب باغریوی دلَر
بوُ دومانلی گونلر
گوللَه ‌لر..،
گوللَه ‌لر…
گوللر، گوللر
اوْزوْن اوزلوم
سنی گؤرمه‌یینجه آچیلماییرلار.
نفس قیتلیغی دیر بوُرالاردا.
هر شاعیرین کؤینه یی دیر شعر، قفس ائدیلیب!
گل.
گل آرتیق سئوگیلیم.
گل بوُ سینیرلاری سیل.

شعر: خسرو باریشان

 

ارسال دیدگاه