آشیق زولفعلی اسدی

آشیق زلفعلی ۱۳۳۶جی ایلده سلطانیه ده دونیایا گؤز آچدی. آشیق محمود آبی پور و آشیق رسول نوروزی یانیندا ساز اؤیرندی. اونون داستان سؤیله­مه اوستادی دا آشیق پروزی سلیمانی اولموشدور.   او، ۱۵ ایل تامام بیر نئچه آشیق او جمله­دن: آشیق رسول نوروزی، آشیق محمود آبی­پور، آشیق عین اله کاکاوند، آشیق الماس رشیدی یانیندا قاوال چالیر و گاهدان دا اوخویور. بئله­لیکله ده آشیقلیق رسم – رسوماتینی اؤیره­نیر. ۳۳ یاشیندا اوستادلاری­نین خئیر دوعاسیلا آشیق­لیغا باشلاییر. ایندی اؤزو اوستاد بیر آشیق اولموش. گؤزل داستانلار دئییر، سسده ده آدلیم بیر آشیقدیر.

   بوگون آشیق زلفعلی بؤلگه­میزین اوستاد آشیقلاریندان ساییلیر و ساز چالما ایله شعر اوخوماق و داستان سؤیله­مکدن علاوه، اؤزو شعرلر ده قوشور و مجلیسلرده اؤز شعرلرینی زنگان هاوالاریندا چالیب – اوخویور. اوزو گولر و آچیق سفره­لی بیر آشیق­دیر. تمام آذربایجان آشیق هاوالارینی اوستادلیقلا بیلیر.

   آشیق زلفعلی ایندی بیر شاعیردیر ده. اونون شعر دفتری چاپ اوچون حاضیرلانیر. بورادا ایکی شعرینی اوخویالیم:

اوغول سنه بیر نصیحتیم وار

سیرر سؤزون نامرده دئمه، آماندیر

آرخاندا یاتیبدیر چوغول – کور شیطان

دوستلار آراسینی قاتار آماندیر.

ساخلا سیرری، هر یئته نه سؤیله­مه،

نامرددن اوزاق گز، حؤرمت ائیله­مه،

کس آرانی بی ایلقارا دوست دئمه،

گؤررسن حؤرمتین باتار، آماندیر.

آشیق زولفعلی گزیب ائللری،

دئییب – دانیشدیریب هر بیر دیللری،

امتحان ائتمیشم مین کؤنوللری،

ایکی دیللی آرا قاتار، آماندیر.

***

داغا باخدیم چوخ داریخدیم،

گلنمه رم سیزه داغلار.

اوره­گیمده مین دردیم وار،

دئیه بیلمه رم سیزه داغلار.

باشیندا گؤزه ل قارین وار،

اته­گینده چمنین وار،

یاناغیندا بولاغین وار،

اوتورئیدیم سنله داغلار.

چیچک­لر سنه یاراشیر،

کهلیک لرین قاققیلداشیر،

اووچولار سندن دانیشیر،

دولانئیدیم سنله داغلار.

زولفعلی­یم، بودور سؤزوم،

داغلار، سنده قالیب گؤزوم،

الده قلم بئله یازیم:

بیر گون گللم سیزه داغلار.

***

ارسال دیدگاه