آشیق محمد نجفی

 

 

   آشیق محمد نجفی ۱۳۳۱ ایلینده طارمون وناب کندینده دونیایا گلیر، اما بوگون زنگاندا ساکیندیر. آشیق محمد اوشاق ایکن آنا لایلاسی ایله آناسیندان موسیقی و شعرلر اؤیره نیر. آنا لایلاسی اونون آشیقلیق صنعتی­نین بینؤره­سینی محکم قویموشدور. آناسی­نین گؤزل سسی بوگون آشیغیمیزدا بیر ده­یرلی میراث کیمی سسله­نیر. آشیق محمد نجفی بیر چوخلو داستانلار، شعرلر اؤیرنمیش و سینه­سی ادبیات و موسیقی خزینه­سی ساییلیر. اوشاق ایکم گؤزل سسینه گؤره آشیقلار چالیب، او اوخویارمیش و یاواش – یاواش ساز الینه آلیر. اونون ساز اوستاسی آذربایجانین بؤیوک و ماهیر اوستادی اوستاد ایمران حیدری اولموشدور. سونرا آشیق عزت عزیزی دن بیر چوخ داستان اؤیره نمیش و ۱۳۷۰ دن سونرا باجاریقی بیر آشیق کیمی صحنه­لرده چیخیش ائتمیشدیر. آ

آشیق محمد نجفی بیر نئچه موسیقی فستیواللاریندا اؤدول قازانیب و بوگون زنگاندا آشیقلیق هنری­نین ذیروه­سینده دایان بیر آشیق کیمی گنجلرینمیزه درس وئریر. زنگان هاوالارینی باشقا آشیقلاردان داها اییی و داها تکمیل بیلیر. او ۸۰ آشیق هاوالارینی چوخ دقیق صورتده آییرد ائدیر. جالب نکته بوراسی­دیر کی اونون اوغلو بوگون بیلیم یوردلاریندا انگلیسی درس وئره­رک، آشیق سازی­نین دا کامل بیر اوستادی و اؤیرتمنی دیر.

اوجا داغلار قار آلتیندا،

یاتیب، اویانماز اویانماز؛

گولی باغلار بار آلتیندا،

یاتیب اویانماز اویانماز.

بولبول اوچار گوله ساری،

آشیق چالار غملی تاری،

ایسته دیم کی گؤرم یاری،

یاریم اویانماز اویانماز.

خسته دوشت درمان ایستر،

باغبان اولان گوللر بسلر،

دارا دوشن ائلین سسلر،

ائللر اویانماز اویانماز.

غم – غصه یه باتان چوخدور

گؤز یاشینی تؤکن چوخدو

محمد دئیر یاتان چوخدو،

یاتان اویانماز اویانماز.

***

اوره گیم سنه باغلیدیر

سالما منی یانه گؤزل.

اینان کی عشقیم دوغرودو

قبول ائیله جانه گؤزل.

جانیم قوربان جمالینه،

اوتلار سالدین شیرین جانه،

منی قویدون یانه یانه،

گئدیرسن هایانه گؤزل؟

گل بیر وئره­گین ال – اله،

سال گیلن دونیایه ولوله،

قاشی کمان، گؤزو آله

سوره ک بیر دؤورانی گؤزل.

چیخاق بیر داغلار گزه ک،

نامردلرین باغرین ازه ک،

قلم آلیب داستان یازه ک،

یاییلاق هر یانه گؤزل.

اوخشاتدیم اولدوزا، آیه،

ماللا کیمی ائندی چایه،

محمدی چاغیر تویه،

من ده گلیم هایه گؤزل.

***

قادر الله بودور سندن دیله گیم،

بئش گونلوک عمروموز لاله زار اوله،

هر کسین حققین آلیب وئره لر،

آغلیان اولمویا، گولن چوخ اوله.

بیردن بولاق چیخا چشمه لر دولا،

چؤللر الوان اولا، باغلار گول آچا،

نه کدر، نه ورم، نه غم یارانا،

انسانلار قلبینده محبت اولا.

داغلاردا قار اولا، باغلاردا چیچک،

گؤزل اولا بیلمز هر روزی گؤیچک

ایلقاری دوز اولا، سؤزلری گرچک،

سئودیگی یارینا وفادار اولا.

کیشی اولان یئمز اؤزگه مالینی،

آخرتده دار ائیله مز یئرینی،

یالان سؤزه عادت وئرمز اؤزونی

کیشیده ده گره ک صداقت اولا.

قمه لر پاسلانا، چیخمیه چؤله،

هامی حکیم اولا، دردلری بیله

توپلار آچیلمیه، قان تؤکولمیه،

گؤره سن او گونلر نه زمان اوله؟

محمد دئیر گلین وئره ک ال – اله،

ایچیمیزده آرا ووران اولمیه،

حقدن ایلهام اولا، فرمان بویوره

ظولمتلی دونیامیز چیراغبان اولا.

***

زنجان چایی

سلام یئتیر یاخشی دوستان    زنگان چایی زنگان چایی

دؤزرت بیر یانین باغ و بوستان      زنگان چایی زنگان چایی

جوشغون سئللرین جوشار    آشیق سنه شعرلر قوشار

کندلریندن ائللر یاشار      زنگان چایی زنگان چایی

چای پره نین بره سینده    قیزلار گزر اوبه سینده

یاتماق اولماز هوسینده      زنگان چایی زنگان چایی

کنده دیللرده وار محبت    تویلاردا پیلارلار خلعت

انسانلارا سن ائت حؤرمت   زنگان چایی زنگان چایی

بایرامدا کندلیلر گزر  سفره یه بال کره دوزر

محمد تعریفین یازر   زنگان چایی زنگان چایی

***

بابک

وطن دوشمنینی آیاقدان سالدی

یاییلدی دیللره دئینده بابک

نامرد قارشیندا مردانا دوردو

نشان وئردی اؤزون دوشمنه بابک

کسدیلر قولونو آخ – وای دئمه دی

دوشمنین کؤکسونه بیر اود قالادی

غیرت اوسته اؤز قانین جالادی

یازیلدی تاریخه یادگار بابک.

بابک اؤز یوردوندا قهرمان ایدی

قوشون چکدی دوشمن اوسته یئریدی،

شهرتی یاییلدی، دونیا دا بیلدی

ایران تورپاغینا مقدس بابک.

خائن لر بوینونا سالدی کمندی

قورخمادی اؤلومدن ائیله دی جنگی

قایتاردی عربی، رومی، فرنگی،

ساوالان داغی کیمی اوجالدی بابک.

محمد ده اویاقدی ، هئچ زامان یاتماز

ناموس – غیرتی یادلارا ساتماز

غیرتلی اوغلانلار بیزی اونوتماز

بیر بابک یئرینه مین اولور بابک.

***

بایاتیلار

اووچویام داغ گزه رم،

بولبولم باغ گزه رم

سؤیگولومو وئرسه لر،

اؤلمه رم ساغ گزه رم.

ائوده وار چاخماق داشی

قورومور گؤزوم یاشی

غربت یئرده گون گئشدی

نه دیر بو فله یین ایشی؟

من اؤلسم سازیم قالار

دیللرده سؤزوم قالار

سن گئتمه غربت ائله

یوللاردا گؤزوم قالار.

عزیزیم ساز چالارام

گوله رم، آغلامارام

ازلدن سنی سئودیم

اؤزگه لره یاز اولمارام.

عزیزیم اوزومه باخ،

سازیما – سؤزومه باخ.

آلیشدیم، من ده یاندیم،

سینه مده کؤزومه باخ.

عزیزیم سازیم منیم،

شیریندیر سؤزوم منیم.

هئچ کسی ایسته میرم

سنده دیر گؤزوم منیم.

سینم اوسته تئللی سازیم

اوره ییمده وار سؤزوم

من سندن آیریلمارام

گؤ زلرینده وار گؤزوم.

عزیزیم سازی گؤتور

قارمانی – سازی گؤتور

خسرتم یاری گؤرم

سن منی یاره یئتیر.

***

مخمس

قوی بیر باخیم جمالیوا

یاناقلاری گول یارانیب،

آلا گؤزلر پیاله تک

قاشلاری کمان یارانیب.

اینجی صدف دیر دیشلری

دهانی غنچه یارانیب

سیه زولفی شب یلدا

تئللری افشان یارانیب

خوش دانیشیب شیرین گولر

طوطی خوش خوان یارانیب.

ترلان کیمی گؤیه اوچار

جاهیللرین قانین ایچر

عشقین بره سینه قاچیر

اؤزونه بیر همدم سئچیر

گؤر نئجه صراف یارانیب!؟

دلگیر اولوبدور دانیشمیر

عشقین شربتیندن ایچمیر

گناهین نه دیر کی کئچمیر؟ –

اوزونده روبندین آچمیر

گؤر نئجه حیالی یارانیب.

قاشلاریندا کمان توخور

اوغرون دورور قییا باخیر

آغ سینه یه گولر تاخیر

محمدی یاندیرریل یاخیر

ازلدن گؤزل یارانیب.

***

اوستاد کلامی

گلنده اوستاد کلامی

اوستادیما جان قورباندی.

اوستادیم آشیق ایمراندی

اوستادیما جان قورباندی.

وناب کیمی واردیر یوردوم،

ائل ایچینده واردیر آدیم،

آشیق عزت سؤز اوستادیم

اوستادیما جان قورباندی.

منیم سازیم پرده وئرمز،

سینی نین اوسته دورماز

اوستادی کی دؤیمه گی اولماز.

اوستادیما جان قورباندی.

آشیق ایمران ساز اوستادیم،

آشیق عزت سؤز اوستادیم

محمددیر منیم آدیم

اوستادیما جان قورباندی.

***

چولقاییب غمیم منی آی عزیز دوستوم

آهسته بیر ساز چال قوی قولاق آسیم.

سیریسین آریتسین قالماسین پاسیم

آهسته بیر ساز چال قوی قولاق آسیم.

سازا – کامانچایا واردیر هوسیم

ساز چالان اللره قوربانلار کسیم

آی آشیق بئله چال تیتره ییم – اسیم

آهسته بیر ساز چال قوی قولاق آسیم.

جنون ایله لیلی عمار سم

آشیق غریب کیمی شاد اولوب گولسم

فلکین چرخینی ووروب داغیتسام

آهسته بیر ساز چال قوی قولاق آسیم.

عشقین سؤزون بو سینه مه وورماسام

یار باغیندا قیزیل گوللر درمه سم

داریخار اوره ییم سازی گؤرمه سم

آهسته بیر ساز چال قوی قولاق آسیم.

چشمه لردن آخان سرین سو اواسام

محبت باغی نین آرخینا دولسام

انسانلیق هاردادی یولون بیلسم

آهسته بیر ساط چال قوی قولاق آسیم.

اوجا داغ باشیندا اسن یئل اولسام

ائللریمه خوش خبری یئتیرسم

محمد دئیر نه زمان کی داریخسام

آهسته بیر ساز چال قوی قولاق آسیم.

***

ارسال دیدگاه