خائين / عليرضا ذيحق

حيكايه

اره گئده ندن بير دوستاقدا ياشاييردي. ديشاري چيخماغا حاققي يوخ ايدي . قاپيني اري  اوزونه كيلدله ييب ائشيك دن ده بير قيفيل ويريردي. پرده عوضي پئنجره لره پتي آسيردي . گون ايشيغينا دا حسرت ايدي . ائوين ايچي ده اؤزونه مخصوص بير زيندان ايدي . اوتاق دان اوتاقا گيريب قاپي لارين بويو آلچاق ايدي . حَيَطه چيخماغا هئچ شانسي يوخ ايدي . كيچيك ياشلاريندا يوخسوللوق اوزه رينده بيله سيني اره وئريب گونونو قارالتميشديلار . بيرگون  هوس ائلير اري ائوده اولماياندا چيخيب بير آغاج آلتيندا كؤلگه لنسين و اؤزونه او جسارتي وئرديك ده بدني اسمه يه دوشور . آمما اوره يي نين دؤيونمه سينه و جانينا دوشَن قورخويا باخمادان حيطه چيخير و كردي ده كي گول لر ايله گول آچان گيلاس آغاج لاريندان ذوق آلير . بير ساعات كئچديك ده ائوه قاييدير . باشقا قادين لاري دوشونوردو كي آزادليق لا كيشي لر كيمي بازارا ،آل وئره ، قوناق ليقا و گزمه يه چيخيرديلار . اوچونجو صينيف ده ايدي كي بيله سيني مدرسه دن چيخاريب بو قارا كؤهو له آتميشديلار . اري بيله سين دن قيرخ ياش يئكه ايدي وخائين ليقي لاپ بيله سيني جانا گتيرميشدي. بئله نكي آداملارا كي آروادلارينان بو چئشيد دوارا نارديلار خائين دئيه رديلر. آدي ترلان ايدي و قاپي قونشو نو بو نئچه ايل ده تانيماغا شانسي اولماميشدي . بو قفس ده چير پينيب جان وئرمه لي ايد ي يوخسا آتا آناسي نين باشينا قاييتسايدي اونون قارني نين چؤره ييني تاپماغا چتين ليك چكه جك ايدلر. ناچار چي ليق لا ياشاييردي و يئددي ايل ائولي اولسالاردا اوندان بير اوشاقي اولماميشدي . اوگون ناهار چاغي ايدي كي اري ائوه گلدي و بير آز اويان بويانا باش چكر كن خانيميني چاغيريب وار گوجو ايله اونا بير سيلله ويردي . سونرا ساچ لاريندان ياپيشيب اونلاري يولماغا باشلادي . سونرا دئدي  : “ظاليمين بالاسي سن بوگون حيطه چيخيب سان . دئه گؤروم نييه شيطانين فعلينه اويوب  منيم سؤزومو هئچه ساييب سان . هره نين حيات دا بير سليقه سي وار منيم ده سليقه م بودور كي نه حيطه نه كوچه يه آياق قويماياسان . سن نه فيكر ائلي ييب سن من ائودن چيخاندا يوز يئره علامت قويارام . باشماق لارين آلتينا يازي يازميشديم و ايندي باخيرام گؤرورم او يازي لار پوزولوب . سني بوشاياجاغام . ”  چوخ چكمه دي كي ظاليم اوغلو ترلاني بوشادي و ترلان آزادليقا چيخاندان سونرا بير چوبان قيزي كيمي  قويون اوتارماقا باشلادي . آز يئييب  آز گئيسه ده اونون بخت اولدوزو بير گون پارلادي  و كاسيب بير اوغلان لا كي مردليك اونون ووقار ي ايدي و قادينلا بير اينسان كيمي داوارانيردي ائولن دي . قاباقكي اري ده گئديب اوزاق كند دن يئنه بير قيز جيغاز آليب  شهره گتيريب  اونو اؤز قارا زيندانينا سالميشدي  كي چوخ چكمه دي  اونون  اؤلوم خبري ياييلدي . ترلان ايندي ايكي اوغول صاحيبي ايدي وحياتين داديني آلاراق ظاليمين اوغلو قارا توپراقلارا قوووشموشدو . دئمك كي اونون يوكسك ليسانسي اولاراق  و يونيورسيته ده درس وئره رك خائين ليك بير مرض كيمي جانينا دوشموشدو

ارسال دیدگاه