قدیم سفره و یئمک کولتوروموزدن / مهندس علیرضا صرافی

قدیم زامانلار سفره‌دن دوز چؤرک اسگیک اولمازدی، بو آچیلان سفره‌نین ان واجباتیندان ایدی. یئمکدن اول بسم‌الله دئییب یئمگه باشلاردیلار، یئمک سونا چاتدیقدان سونرا دا آللاها شوکر ائدیب دوعا اوخوردولار.

سفره باشیندا اوتوروب دورماغین آدابی وار ایدی، داها ایندیکی کیمی قاچا- قاچدا آیاق اوستو بله-بؤیورد ائله‌مزدیلر. آیاق اوسته یئمگی عیب و مان بیلردیلر. خانملارین نذیر سفره‌لری اولاردی، هر نذیر سفره‌سینین اؤزونه گؤره مخصوص یئمکلری، ناغیل‌لاری وار ایدی. سفره‌لرین ان مشهورو حضرت ابوالفضل سفره‌سی و ان ساده‌سی حضرت رقیه سفره‌سی ایدی.

قدیم ائولرده قاب- قاشیق آز اولاردی، عموما ایکی نفره بیر قابدا یئمک وئرردیلر. قورو یئمکلری ال ایله، سولو یئمکلری (مثلا سوپ یا بورشو) قاشیقلا ایچردیلر. بو حالدا دا ایکی نفره بیر قاشیق وئرردیلر، بیر قاشیق او ایچیب، بیر قاشیق دا بو ایچردی.

یئمگین سونوندا بیر تیکه چؤرک ایله یاغا باتمیش بارماقلاری، دوداقلارین دوره‌سین تمیزلر؛ او بیر تیکه چؤرگی ده یئییب، آللاه چوخ شوکور دئیردیلر. دولتلی ائولرین قوناقلیقلاریندا یئمکدن اول و بیر ده یئمکدن سونرا آفتافا- لگن گتیریب اللرینی مختصر یوواردیلار.
قوناقلیقلاردا ائو صاحیبی سفره‌نین آشاغی باشیندا قاپییا یاخین یئرده اَیلشیب، قوناقلای دا یوخاری باشدا اَیلشدیرردی، اوشاقلاردا عموما سفره‌نین بوجاقلاریندا اوتورداردیلار.

آذربایجان سوفره‌سیندن مربّالار اسگیک اولمازدی، بو ات یئمکلریندن سونرا سویوقلوغو آرادان آپاران ایستی‌لیک ساییلاردی، هم ده یاددا قالان ان سون مزه شیرین اولمالی ایدی.

یئمکدن سونرا سفرده قالان چؤرکلرین قیراق- قوراقلارین نارین- نارین دوغراردیلار ائوده تویوق- خوروز اولسایدی سپردیلر اولار دنله‌سین، تویوق خوروز اولماسایدی، سپردیلر سئرچه‌لره. باتیق قابلاری درحال ییغیشدیریب، حووض باشیندا چوغانلاییب، یوواردیلار، چکه‌لره قویاردیلار سولاری سوزسون.

سفره‌نی ده قیراقلاریندان یاواش-یاواش ائله ییغاردیلار ، کی ایچینده‌کیلر فرش اوسته تؤکولمه‌سین، سفره‌نین ایچینده قالان آشقالی (آشدان قالان و درده دیمزلر خیریم- خیردالاری) کردییه تؤکردیلر، کی طبیعتدن آلدیقلارینی یئنه ده طبیعته قایتارسینلار.

سفره و یئمک عادت- عنعنه‌لریندن باشقا بیر چوخلو آتا سؤزلریمیز و دئییملریمیز و لطیفه‌لریمیز وار.

 

ارسال دیدگاه