۱۵-نجی یوزایلده، آذربایجان بؤلگه‌سینده، بیری – بیرینه سرت رقیب اولان، ایکی بؤیوک طایفا جؤولان ائدیردیلر؛ بیریسی آق‌قویونلولار، او بیریسه، قاراقویونلولار آدلانیردیلار. قاراقویونلو تورک‌لری شیعه مذهب، آق‌قویونلولارسا، سُنی مذهب‌ایدیلر و امیر تیمور گورکانی ایله قاراقویونلولارا قارشی بیرلشمیشدیلر. امیر تیمور گورکانی اؤلدوکدن سونرا، قاراقویونلولار آذربایجانا قوشون چکیب، تیمورلولاری یئندیکدن سونرا، تبریزی گئنیشله‌دیب، آبادلاماغا باشلادیلار. قاراقویونلولارین آدلیم حاکم‌لریندن جهانشاه، آذربایجانی دنیانین کولتور و مدنیت اوجاقلاریندان بیریینه چئویردی. ائله همین حاکم، گؤی مسجید، یا فیروزه مسجیدین تملینی قویوب تیکدیره‌نی‌دیر.
۱۴۵۳ میلادی ایلینده، عثمانلی پادشاهی، فاتح سلطان محمد، قسطنطنیه‌نی فتح ائله‌ینده، قاراقویونلو حکومتی عثمانلی‌لارلا بیرله‌شیک (متحد)ایدی. آق‌قویونلولار ایسه، انزوادا قالمیشدیرلار. بو دورومدان یارارلاناراق، جهانشاه آق‌قویونلولارین ایشینی بیتیرمک ایسته‌ییر. دیاربکرده، آق‌قویونلو حؤکمداری ایله جهانشاهین آراسیندا چیخان ساواشدا جهانشاه غفیل‌لنیب، اؤلدورولور. آق‌قویونلولارین پادشاهی، اوجا بویلو، گؤزل انداملی اولوغونا گؤره اوزون حسن آدلانان ابونصر حسن، ترابوزان امپراتورو ایله ایله‌تیشیمینه (ارتباطینا) گؤره، و کریستیان (مسیحی) حاکم‌لرله آپاردیغی مذاکره‌لره گؤره، عثمانلی سلطان‌لاری اوندان نفرت ائدیری. آنجاق تدبیرلی و باشاراجاقلی اولدوغونا گؤره، آذربایجان، عراق، فارس، کرمان، کوردوستان، ائرمنیستان و گورجوستانین بیر بؤلگوسونو آلدیقدان علاوه، فاتح سلطان محمدین مدعی‌سی و دوشمانی کیمی ده آد چیخارتدی. بو اوزدن، عثمانلی قارشیسیندا یئنی بیر جبهه آچماق آدینا، آوروپا شاه‌لاری اونون اوستونده حساب آچماغا باشلادیلار؛ بئله‌لیکله ده ترابوزان امپراتورو گؤزل قیزی دئسپینا-نی، اؤز دینینده قالماق شرطی ایله اوزون حسن-ین گلینی ائتدی.
بو قیسا یازیدا، آماج، بئله بیر سیاسی ائولیلیگین نه سونوجلارا واردیغینی آچیقلاماق دئییلدیر. مقصد، اوزون حسن-ین عثمانلی‌لارلا ساواشی‌نین و آوروپالی‌لارین ایسه، سؤزلرینی توتمادیقلاریندان سؤز آچماق دا دئییل. بو ائولیلیگین ان اؤنملی نؤکته‌سی، دئسپینا ایله اوزون حسن-ین قیزی، مارتا-نین یاشام حیکایه‌سی‌دیر. مارتا، شئیخ جونئید اوغلو، شئیخ حیدر ایله ائولندی، بو ائولیلیگین سونوجو اسماعیل ایدی، اسماعیل ایسه، صفوی سلسله‌سی‌نین قوروجوسو، و ایراندا حکومتی و رسمی شیعه‌لیگین تَمَلینی قویان‌دیر.
اوزون حسن، خانیمیسی دئسپینادان، و باشقا ونیزلی سفیرلردن آدریاتیک دنیزلری‌نین اوزه‌رینده اولان شهرین -ونیزین- تانیمی (تعریفی)، و وصفینی ائشیتدیگینه گؤره، بو عجیب و تایی- بنزه‌ری اولمایان شهره وورولموشدو. بو اوزدن ده، بئله قرارا گلدی کی، ونیزین سارایلاری کیمی، سولار اوزه‌رینده بیر سارای تیکدیرسین اؤزو اوچون، اورایا دا قاییق ایله گل- گئت اولونسون.
بیر چوخ آراشدیرمادان سونرا، اوزون حسن-ین دیلکلری‌نین گرچکلشمه‌سی اوچون تبریزین گونئی دوغو طرفینده بیر یئر کسین‌لشدی. بؤیوک بیر گؤل، اورتاسیندا ایسه گؤزل بیر سارای، اطرافیندا دا باغ-باغات تیکیلدی. بو عظمتلی گؤلون سویونو بوتون فصیل‌لرده یئتیرمک اوچون، «شاه آرخی» آدلی بیر چشمه چکیلدی. بو مجموعه، تیکیلش آماجی اساسیندا، هم ده اولدوقجا بدیعی منظره‌لرینه گؤره، «شاه گؤلو» آدلاندیریلدی.