آشیق مسلم عسگری

آشیق مسلم عسگری زنگانین قوجامان آشیقی ۱۳۱۷جی ایلده زنگانین بادامستان کندینده آنادان اولدو. ایلک تحصیلینی کندده بیتیریب و ۱۳۳۴جو ایلده زنگانا گلدی. توفیق و شریعتی دبیرستانیندا درس اوخویوب دیپلم پیتیگینی الده ائتدی. آنجاق ۱۳۴۷جی ایللردن آشیقلیق درسینی آلماغا باشلاییر و آتاسی آشیق سهرابدان اؤیرنمه­یه باشلاییر. ایلک دؤنه تاریمدا هیندی کندینده مجلیسه چیخیر و آلقیشلانیر. او گوندن زنگان و تاریمدا بیر چوخلو توی – شنلیک مجلیسلرینی دولاندیریر.

   آشیق مسلم یوکسک سویه­ده ایفاچیلیق ائدیر، داستانلار سؤیلور، شعرلر قوشور و گؤزل ساز چالیر. دئمک اولار زنگاندا بوگون آشیق هاوالارینی و داستانلاری هامی آشیقلاردان یاخشی بیلن آشیق ائله آشیق مسلم­دیر. او آشیق شیرین و بیرچک خانیم، لیلی و مجنون، بهرام و گول خندان، کلبی و سلبی، ورقا ایله گولشن، طاهیر میزرا، غلام حیدر، یئتیم سیدی، خسته قاسیم، واله و زرنگار، شاه اسماعیل، آشیق قوربانی و بیر چوخلو داستانلاری بیله رک، داها بوگونلر آشیقلیق ائتمه سه ده، داستان سؤیله مک و علمی چیخیشلاردا اؤزونو گؤسته ریر.

آشیق مسلم ۱۳۰ کاسئت نوار دولدورموش. آذربایجانین ۷۰دن آرتیق موسیقی هاوالارینی اوستادلیقلا چالیر. زنگان هاوالاری، تاریم هاوالاری، خرمدره هاوالاری دئییلن موسیقی هاوالارینا بیر متخصص کیمی توخونور.

ایندی آشیق مسلم­دن بیر شعر:

حؤرمتلی ائلیمین آرزولارینی

هر زامان سئویرم، اوره­گیمده­دیر.

باشی یاشیل یایلاقلاری گزنده

حسرتیم ده اودلو دیله­گیمده­دیر.

قوشلارین سسینه اویانان ائللر

بولبول نغمه سینه سئوینیر گوللر

لاله یاناقلاردا دانیشان دیللر

ازیلیب بال کیمی چؤره گیمده دیر.

بو شانلی وطنیم، اؤلکم، ماحالیم،

قوتولسون محنتیم، گئتسین ملالیم

سنده­دی شوکتیم، سنده جلالیم

آغریمدا دیلیم تک گره­گیمده­دیر.

الیمده قلمیم، سینمده سازیم

آتالار – آنالار منیم مورازیم؟

سینه دفترینده دیلیمه یازیم

قووتی ائلیمین بیله­گیمده­دیر.

چیخارتما یادیندان بو شن ائللری

سنه امک وئره ن یاشیل چؤللری

وطن آشیقی­یام مسلم عسگری

قهرمان اوغوللار کوره­گیمده­دیر.

ارسال دیدگاه