شئعر / سئور شهابی

 

يومورتانين آغ دووارين
آنا عشقيله دلدينيز
سيزلرده,آنانيز كيمى
يئتيم دونيايا گلدينيز

آنانيزى قينامايين
سانمايين سيزى آتديلار
اونلارى دا آتانيز تك
بوغدا ايله آلداتديلار

آتانيزين آياقلارين
قارماقلارا باغلاديلار
يئره باخان باشلارينى
بيچاق ايله داغلاديلار

اونون سحر آوازيلا
نارين _ نارين سوزمه دينيز
ماهميزينين كؤلگه سينده
مغرور _ مغرور گزمه دينيز

ساختا آنا قوجاغيندا
اويومادان,اوياندينيز
بوياقچينين قارشيسيندا
اؤكسوز _ اؤكسوز داياندينيز

الوان _ الوان بويالارلا
كيمليگيزى ده ييشديلر
بوياقچيليق صنعتيله
سعادته يئتيشديلر.

سئور شهابى

ارسال دیدگاه