بوگون كنديميزدن بير آغاج كؤچور
اودونچو دايانيب، دوروب اَر كيمی
او آغاج گؤزونون ياشينی ايچير
زورلا اَره گئدن گلینلر كيمی
بو باهار، كنديميز قيش كئچيره‌جك
بير پاليد عينادی دوغرانيب اونون
بو باهار يوواسيز قوشلار گله‌جک
اوزونه غم توزو قونوب كنديمين
او، عؤمور پايينی بوگون كئچير كی،
بير عؤمره بيرآنليق گرك اولاجاق
اوندا مين بير قوشون ائوی اوچور كی،
هارداسا بير ائوه ديرك اولاجاق
بو آغاج، بلكه بير چَلييه دؤنوب،
بير قوجا اليندن ياپيشاجاقدی
بير سويوق اوجاقدا آليشيب، يانيب
نه بیلیم اوستونده نه بیشه‌جکدی
بلكه بير داخمايا چئوريلدی صاباح
بير اينسان عؤمرونو بيتيرمك اوچون
بلكه بير تابوتا چئوريلدی او، آه!…
بير اينسانی يئردن گؤتورمك اوچون
بوگون كنديميزدن بير آغاج كؤچور
زورلا اَره گئدن او يازيق قيز تك
نئچه آرزو قوشو يوواسيز قاليب،
نئچه قوش بو كنددن اوز دؤندره‌جک
بلكه باخ بو كاغیذ هَمن آغاجدی
اؤزو او ظولومه قول چكير ايندی
بير جاهيل الينده ديلی كسيلدی
بير شاعير الينده ديل آچير ايندی
بير قلم اولماغا بير چؤپو يئتر
بو ظولمو دفتره كؤچورمك اوچون
يوواسيز قوش لاری او، قاتار ـ قاتار
آرزو گؤی‌لرينه اوچورماق اوچون
…دونيا كنديميزدن كؤچن آغاجين
چيينينده بير دونيا احتياج كؤچور
بوگون دونياميزدا سيخيلير بيرآن
بوگون دونياميزدان بير آغاج كؤچور!…
چوخ درین درده یارایان و عین حالدا طبیعت اوچون بؤیوک سؤز داشیییر
ساغولون ووقار بی