جليل محمد قليزاده و ملانصرالدين ژورنالي / يحيي آرين پور

  ترجومه : عليرضا ذيحق

 

ملانصرالدين

 ملا

ييرمينجي يوز ايل لي‌يين ايلك ايللرينه جان، قفقازدا هئچ بير گونده ليك و ژورنال نشر اولونموردي. آمما ۱۹۰۵- نجي ايلين اكتُبروندا ياييلان يالانچي بيلديريش دن سونرا، سايسيز- حسابسيز درگي و ژورنال ايدي كي اولدوز لاركيمي بولوت آرديندان بالا- بالا باش اوزارديرديلار.

اكتبرون بيلديريشيندن آلتي آي سونرا، آذربايجانين ايلك ساتيريك و گولمه‌لي ژورنالي «ملانصرالدين» اؤزدئديگي كيمي «مسلمان قار داشلارين سوراغينا گلدي». بو ژورنال بوتون اجتماعي و سياسي ايشلره تنقيدله ياناشيب موجود قورولوشا قارشي مخالف بير جبهه آچدي و چوخ چكمه‌دي كي «صابر» و اونون استعدادلي شاگيرد و دوستلاري، «صابر»ين حيات زمانيندا اولدوغوكيمي، اونون گؤزله نيلمز اؤلوموندن سونرادا «صابر» مفكوره و دوشونجه سيني دوام ائتديرديلر. بو آرادا «عليقي نجف اف» و «محمد سعيداردوبادي» كيمي گؤركملي يازيچيلار و هابئله «عبدالرحيم حق وردي اف» ساياقي بؤيوك بير دراماتوردا  «ملانصرالدين» درگي سينه قوشولدولار.

جليل محمد قليزاده

ميرزا جليل، محمدقلي اوغلو، ملانصرالدين ژورنالي‌نين مؤسس و باش كاتبي (۱۸۶۹-۱۹۳۲ م) نخجوان ولايتينده و «نهرم» آدلي بير كند‌ده دونيايا گؤز آچدي، اونون آتا باباسي اصلينده ايرانلي ايديلار. باباسي «حسينقلي بنا» اون دوققوزونجي يوز ايل‌لي‌يين ايلك ايللرينده خوي دان نخجوانا گئتميش و اورادا خويلي بير عائله‌نين قيزيني آلميشدي.

ميرزا جليل اؤز حياتي‌ حاققيندا بئله نكي بير سؤزو ايره‌لي سورور: «من نخجوان شهرينده‌كي آرازين آلتي آغاج ليقيندا و جلفا‌نين قيرخ آغاج ليقين دادير، دونيايا گلديم. آراز و جلفا آدلاريني بو رادا گتيرمك ده، بير قصديم وار. نييه كي بللي اولدوغوكيمي، آراز چائي ايران سرحدينده يئرله شير و جلفادا بيز و ايرانين گمرك پاسگاهي دئمك دير. من اؤزومو بو چايا و بو شهره ياپيشديرماق ايچون ايكي جهت دن فخرائديره‌م. بيرينجي اوكي ايران اؤلكه سي منيم آتا- بابا يوردوم دور و ايكينجي مسئله اوكي ايران تورپاقي، دونيادا ديندارليقا آدليم دير و منيم ايچون بؤيوك باش اوجاليق ديركي بئله نكي بير مقدس تورپاقين قونشولوقوندا آنادان دوغولموشام. ميرزا جليل توركجه، فارسجا و روسجا يازيب اوخوماقي، بوشهرده اؤيره‌نه ركن اون دؤرد- اون بئش ياشيندا گرجستانداكي دارالمعلمينه داخل اولوب تحصيليني بيتيرديك دن سونرا، ايللر بويو معلم چيليك له چاليشدي.  ۱۹۰۴- نجي ايلده تفليسه گئديب «شرق روس» قازِ تينده كي اونون مديري «محمد آقا شاه تختي» ايدي، يازيچي ليق ائتدي.

«ميرزا جليل» اؤز ادبي ياراديجيليقيني حكايه يازماق ايله باشلادي. او ايلك حكايه لرينده مثلاً، «پست صانديقي»، «داناباش كندي نين احوالاتي» و «اوستا زينال» كيمي اثرلرينده كي  ۱۹۰۴- نجي ايلدن اول يازيلميشدي قفقاز مسلمانلاري‌نين معيشت و ياشاييش طرزلريني چوخ باجاريقلا تصوير ائديري. بو اثرلر آجي حقيقت‌لر له دولو اولاركن گولوش و طنز شيوه لريندن فايدالانيب‌لار.

«ايراندا آزادليق»، «ساققالي اوشاق» ، «قربانعلي بيگ» حكايه‌لري و «اؤلولر»، «آنامين كتبابي»، «دلي‌لر ييغينجاقي» آدلي ساتيريك درام‌لار كي «ملانصرالدين» ژورنالي نين انتشاريندان سونرا قلمه آلدي، اونون ياراديجليق دونياسي‌نين اؤلمز اثرلري دئمك ديلر. اؤزه‌ل ليك‌له  «اؤلولر» دراميني دونيانين كلاسيك و ياشار ادبي اؤرنه ك لريندن سايماق اولاركي «مولير»ين «تارتوفي» ايله و «گوگول»‌ون «مفتش» درامي ايله بير گه سويه‌ده دايانيرلار.

   «محمد قلي‌زاده» نين ايكينجي و اَن بارلي يازيچي ليق دؤوره‌سي، «ملانصرالدين» ژورنالي‌نين ياييلماسي ايله باشلانير. ملانصرالدين انقلابچي دموكراتيك ايده‌آل لارين ارقاني دئمك اولاركي بير سيرا ضيالي و آيدين دوشونجه‌لي قلم اهليني اؤز دؤوره‌سينه آلميشدي و او دؤورون باشقا ژورنال لاري كيمي انقلابچي دوشونجه‌لري تبليغ ائديردي. ايران شاهيندان توتدو عثمانلي سلطاني ايله و بْخارانين اميري‌ايله چير پيشيردي و اعيان- اشرافين چيركين ماهيت لريني آچيب گؤستريردي. استثمار و استعمار دونياسيني  و اوندا حؤكوم سوره‌ن قانونسوزلوق و انسانلاري كيچيلديب اينجيده‌ن رسم‌لري استهزاء ائديب ساتيرا قامچي سيله تاپداييردي. اؤز دئدي‌يي كيمي «ضديت» لري آچيب گؤستريردي و اؤرتوك‌لري قيراغا ووروب جهل ايله خرافه جايناغيندا چابالايان انسانلارا دئييردي: «سيز اگر دوزگون آدام اولسايدينيز و اگر غيرتي‌نيز و شعورونوز اولسايدي…  هانسي ظاليم جرئت ائده‌ردي كي سيزين انسانليق حقوقونوزا اَل اوزونلوق ائده؟»‌

… ملانصرالدين ائله بير اجتماعي قورولوشون داليسيجا ايدي كي اوندا «وارلي ايله يوخسول و آغانان ديلنچي بير گه بير حق- حقوقا صاحاب ايديلار و ائله بير حكومت ايش اوستونه گلمه‌لي‌ ايدي كي آزادليق اوصولونا آرخالانيب بوتون يئر و تورپاق لاري أكينچي لر آراسيندا بؤله‌ركن ايشچي لرله كندلي لر، دولت ده اشتراك ائتمه‌لي ايديلر».

ژورنال باش مديري يازديقي اؤز ترجمه حاليندا بئله دئيير: «داغ كيمي اؤنوموزده باش قاغزايان استبداد، شاه و سلطانلارين استبدادي دير و اونلاري قورويان قووه‌لر ديلركي شريعتي ده تحريف ائديرلر». «ملانصرالدين» ين بو ظولم اؤنونده دايانماسي نا تكجه سيلاح، اونون گولوش و ظرافاتلا عكس ائتديرده‌ن ادبي- بديعي اثرلري ايديلر.

بو ژورنال بيرينجي نمره سينده، اوخوجولارا خطاب بئله دئيير: «اي مسلمان قارداشلار، اونداكي بير گولمه‌لي سؤز مندن ائشيتدينيز و آغزي نيزي آچيب گؤزلري نيزي يومدوز و قاه- قاه چكيب گولدونوز و گؤزلري نيزين سئوينج ياشيني سيله جك عوضي، اؤز اتگي‌نيزله سيلديز و شيطاني لعنت‌له ديز … ظن ائتمه‌يين كي ملانصرالدينه گولور سونوز … اي مسلمان قارداشلار، اگر ايسته‌ييرسينيز بيله سيز كي كيمه گولورسونوز، گوزگونو أله آليب و اؤز مبارك جمالي نيزي تاماشا ائتمه‌‌ك دن چكينمه‌يين! … ».

آمما اونلاركي اؤز چيركين قيافه‌لريني، بو ژورنالين آيناسيندا باخيب گؤر دولر، آييلماق عوضي باشلاديلا بو ژورنالين يازيچي لارينا قارشي ضديت ائتمه‌يه و تزارين سانسور دستگاهي و فئوداليزمين قارا قووه‌لري اله أل بير لي‌يه …

جليل محمد قليزاده‌نين آذربايجان جمهوريتي نين علم لر آكادميا سيندا ساخلانيلان خصوصي آرشيوينده، آدي تانينمايان بير آدامين مكتوبو واركي «قاسم كندي» كنديندن يوللاني‌ليب‌دي و دولودور يامان يوغوز ايله كي اونلارين قتليندن و قانالاري‌نين تؤكولمه سيندن سؤز آچيلير…

ژورنالين باش مديري كي اؤز دئدي‌يي كيمي «آري لارين يوواسينا چؤپ اوزاديب» ناچار اولدي كي تفليسين گورجي لر محله‌سينده، گيز لينجه ياشاسين. او اؤز أل يازما لاريندا قيد ائديركي: «بير گون كي ژورنالين ايكينجي ايلي ‌نين ساييلاري‌نين بيرينده قادين لار آزادليقي حاققيندا بير مقاله ياز ميشديم، يولداشلار نصيحت ائتديلر كي كوچه- بازاردا تاپيلمايام چونكي «شيطان بازار» دا اتوكانلاري باغلاييبلار و جماعت ايليم- ايليم مني آختاريرلار.»

قارانليق بير دؤوره‌ايدي.  تعصب و خرافات دين يئرينه و دين آدي ايله جماعتين آمانين كسيردي. نه ساياق پالتار گئيمك، ساققال قويماق، باش قيرخديرماق و قاپ- قاشيقي نه جوره و نئچه يول يوماق، انسانلار حياتي‌نين أن اساسلي دين اصول لارينا چئوريلميشدي و ملانصرالدين گرك ايدي كي تزار حكومتي نين دشمن لي‌يينه و عوام خلقين تعصبينه سبب اولمادان، بئله نكي زاد لاري آردان قالديراردي و اونلارين يئرينه آزدليق و كولتور توخومي سپه‌ردي!

بونلارلا بئله، ملانصرالدين هميشه صاباحا و گله جه‌يه اينام بسله ييردي و قارانليق دا «ايشيق ليق» آختاريردي. «ماللا عمي» ايشيقلي سيماسي ايله او أل بو أل دن و قاپي باجادان هر بير يانا باش چكيردي و خلقين باشدان كئچيرتديگي وضعيته شاهد اولوردي. گاهدان گولوردي و گاهدان دا چوخ ملول حالدا، فيكره داليب تعجب له نيردي. آمما هميشه اؤز گوردوگو ايشين گله جيه‌يينه ايناملي ايدي.

ملانصرالدين ژورنالي نين چوخلي نمره لرينده، حيات و جمعيتين دوزگون ياشاييش تصويري و سئويملي بير دونيانين گؤزه ل‌لي‌يي و طبيعتين أن اوجا زيروه‌لي داغلاري و ايشيقلي گله جه يين قيزيل گونش لي گونلريندن سؤز گئدير. بو ژورنالين بؤيوك بير اؤزه‌ل ليگي ايسه اونون كاريكاتور لاري ايدي كي آدليم رسام «عظيم عظيم‌زاده» توسطي ايله و باشقا ايكي قدرتلي رسام واسطه سيله دوغرولوردولار و هابئله آذربايجانين أن بؤيوك صنعتكاري «ميرزا علي اكبر صابر» ين يازديقي شعرلر ديلركي ايلك دفعه اولاراق بو ژورنال داچاپ اولور دولار.

ايران و ملانصرالدين

بو فايدالي ژورنالين ياييلماسي تكجه قفقازدا يوخ بلكه ايران و بوتون شرق اؤلكه لرينده بير تاريخي حادثه‌كيمي قيمت‌لن‌ مه ليدي.

ملانصرالدين ژورنالی بوتون مسلمان اؤلكه‌لريني نظره‌آلاراق بو اؤلكه‌لرين چيركين مناسبت‌لريني آچيب گؤستريردي و ايران، عثمانلي، افغانستان، عربستان و الجزاير ده كي واقعه‌لري خلقين باشادوشه‌جه‌يي ساده بير ديلده ساتيريك ژانري ايله يازيلميش شعر، حكايه، مكتوب و گولمه‌لي تلگراف و جانلي كاريكاتور واسطه سيله بيان ائديردي و پيس ليك لره و اوزاماناجان يئرسيزليك له محترم و عزيز ساييلان زادلارا قارشي مبارزه آپاريردي.

ملانصرالدين ژورنالي يازيچي‌لاري ايرانلي لارين عادت و عنعنه‌لرينه تانيش ايديلار و بو ژورنال ۱۹۰۷- نجي ايلدن بري، هر نمرده ده ايرانين سياسي- اجتماعي و دورومون دان صحبت آچيردي. اؤزه‌ل ليك‌له ايراندا گئده‌ن انقلابي- سياسي حركاتين گوجلنديرمه‌يين ده بؤيوك بير رل اويناييردي.

«ملانصرالدين» ميرزا جهانگيرخان صور اسرافيل و ملك المتكلمينه كي هر ايكيسي سوسيال دموكرات پارتياسي‌نين چاليشقانلاريندان ايديلار، چوخ احترام قائيل ايدي. ۱۳۲۶ هـ.ق ده كي ايرانين ملي شورا مجلسي باغلاندي و آزادليق حركاتينا قوشولانلار قارا قووه‌لر طرفيندن حبسه آلينديلار، ملانصرالدين بئله يازدي: «ايراندا اوز وئره‌ن مصيبت‌لر ايچون، بيز اؤزوموزو ايرانلي قارداش لاريميزين دردلرينده شريك بيليريك. قلم اهلي‌نين و آزادليق مجاهدلري‌نين اولو روحلاري قارشيندا كي اوغروندا جلادلار ألينده شهيد اولوبلار، تعظيم ائده‌ركن ايران اؤلكه‌سي‌نين نجاتي اوغروندا چاليشانلارا آلقيش دئييب خلقين سعادتي‌ني آروز ائديريك.»

باشقا بير يئرده ده بئله يازدي: « … اي تبريزلي قارداش لاركي چؤره‌ك عوضي سيزلره داش قوم يئديديرلر، اي خويلي، مشكين و سرابين باشي پاپاقلي لاري، اي مراغالي، اردبيل‌لي و خلخال لي قارداش لار، گلين و منيم قارشيما بير يول قويون. آللاها آنداولسون كي عقليم بير يانا چاتمير. آخي دونيا عوض اولوبدي و هر زاد اؤز اصلينه قاييداركن، هئچ بيرزاد اؤزيئرينده دورمايير. گلين بير يئره ييغيشاركن، كئچه پاياقلاريميزي آرايا قوياق و فيكر ائده‌ك كي نئيله مه‌لي ييك و اؤلكه ميز هارادير؟ گلين، گلين اي منيم اونودولموش چيركلي ياخا وطنداشلاريم، گلين گؤره‌ك كي بو ملتين بؤيوك باشلاري كي بئشيك‌ده اؤزگه سودو ايله بويويوب اؤلكه‌نين درديندن اوزاق و ملتين قايغي لاريندان خبرسيز ديلر، سيزه نه يوخو گؤروبلر؟ اي منيم آج- لوت قارداشلاريم، نييه به سسي نيز چيخمايير؟!»

بو يازي مستبدلر ايچره ائله بير قورخو ياراتدي كي اونون اوخوماغيني ياساق ائتديلر…  محمدعلي ميرزا دا كي تبريزده وليعهد ايدي دستور وئردي كي ملانصرالدين ژورنالي نين اونمره‌سيني پستخانادا توقيف ائده‌لر.  آمما خلق ايچره‌ بو ائله بير هيجان ياراتدي كي تبريزين ايالتي انجمني مجلسه تلگراف ووردي و چوخ چكمه‌دن آزادليقلا ياييلدي. بو تضييق لره باخمادان، اونون بوتون نمره‌لري ايرانا چاتيردي. خصوصاً  آذربايجاندا كي جماعت ژورنالين ديلي ايله تانيش ايديلار، چوخ علاقه‌ايله اوخونوردي و صابرين شعرلري كي ايران حاققيندا ايدي، تبريزده و آذربايجانين باشقا يئرلرينده ديل‌لر ازبري‌‌ ايدي و كوچه- بازاردا گئنيش ساياق‌دا ياييلاراق و جماعتي آييق سالماقدا بؤيوك تأثير قويوردي. ائله اولوردي كي آذربايجانلي‌لار اؤزلري باشقا بيت‌لر اونون شعرلرينه آرتيريرديلار و اونون تأثيري آلتيندا يئني، شعر لر يازيليردي. بو شعرلر كي گولوش و ظرافاتلا قاريشيق‌ايدي خلقين كين و نفرتيني شاهليق اصول اداره‌سينه و استبدادا قارشي آيدين لاديردي و انقلابچي لارين جسارتينه شاها قارشي مبارزه  ده داها آرتيق آرتيريردي.

مستند و خصوصي أل يازمالاردا بئله نكي بير قيده راست گليريك:

«اتابكين، اؤلمه‌سينه گؤره مجاهدلر و مكتب‌ شاگيردلري بؤيوك بير شنليك قوردولار. بو مناسبته‌ گؤره وئريله‌ن  بير نمايش ده، ميرزا تقي چايچي كي قيلينج آقا آديله تاني‌نيردي، چالقيچي لارين باشيندا، ايتي بير قيلينج‌لا بازارا  چيخدي. نمايش وئره‌نلر او واخت كي حاجي مهدي كوزه كناني‌نين تجارتخاناسي قاباغيندان كئچيرديلر، حاجي مهدي يوخاري مرتبه‌دن جماعته خطاب، صابرين اتابكين اؤلومو مناسبتي‌له يازيلميش شعريني اوخودي:‌

قتل ائيله ديز اتابكي، من كي بو امري دانميرام

 واريئنه اتابكيز، يوخسا عمل لي قانميرام

بو شعرين خلق‌ده ياراتديقي هيجان، اوقدر گوجلو ايدي كي دئمك ايله باشا گلمز. تبريزين مجاهد و آزادليق سئوه‌ر انسانلاري، نئچه يوللار سنگرلرده و حرب ميدان لاريندا «صابر» ين ستارخان حاققيندا يازديقي شعرلري اوخويور دولار و اونون مضمونوندان گوج آليرديلار.

باشقا بير يئرده ايسه بئله يازيليبدي: « بير شنليك مجلسي ايدي، او مجلس ده نغمه‌لر، ماهني‌لار  و انقلابچي شعرلر اوخونوردي. بو آرادا گنج بير انقلابچي صحنه‌يه چيخيب و صابرين ستارخانا يازديقي شعرلري اوخودي:

حال مجذوبيم گؤروب، قارء، دئمه ديوانه دير

نعرة شوريده مي ظن ائتمه بير افسانه دير

شاعيرم طبعيم دنيز، شعرتريم دْردانه دير

آفرينيم همت والاي ستارخانه دير …

_________________*ترجمه از كتاب «از صبا تا نيما» جلد دوم  تأليف يحيي آرين‌پور

ارسال دیدگاه