ساتيريك گولوشون غَضَبي / عليرضا ذيحق

 

 

” سؤزون دوغروشونو ، ظرافاتا سايب دييه رلر”

 

                                                   آتالار سؤزو 

 

 

طنز يا ساتيرا ، حيات و  جمعيّتين اَن مهم مسئله لريني گولوش و ظرافاتلا عكس ائتديره ن سؤز صنعتي دير . ساتيرانين تنقيد هدفي ، حياتين چيركين خصوصيت لري ، جمعيتين نقصان و عئيبه جر ليك لريدير. بير سؤزله يئني حيات قورماق و مثبت ايده آل لاري تبليغ ائتمك قصديله ، گئري ليگي جهالتي قامچي لاماق ساتيرانين اَن مقدس وظيفه سينه چئوريلير. پيس ليك لر ، نقصان لار ، حاقسيز ليق لار و موهومات ، جانلي تيپيك صورتلر يارادماق واسيطه سي ايله ، اولدوق لاريندان داها قاباريق و گوبود ساياق دا گؤستري ليب و ساتيرا آتشينه توتولور لار. بونا گؤره ده مفكوره سياسي جهت دن مترقي بير ماهيت داشي يان هر ساتيريك قلمي ، بير افعي يه اوخشاتماق اولار كي ، اجتماعي عدالت سيز ليك اونون قويروغونو آياقلا يير و ساشماقا وادار ائدير . چالير و سانجير هر او زادي كي حياتين جمعيتين اينكيشافي قارشيندا دايا نير و اجتماعي چيركين ليك لره مئيدان آچير.

آيدين لاتماق كي جهالت ، برابر سيزليك ، مدني و اقتصادي گئري ليك لر هاچان اونون قويروغونو آياقلاما سالار ، اودا دؤنوب ساشماز.

بديعي ادبياتين بو ژانري ، گولوش اساسيندا قورولسادا ، بو گولمك آغلا ماغين قارداشي دير ، بو سئوينج غم له عِكيز دير. ايلكينده اوخوجونو گولدور سه ده ؛ سونوندا كدر لن ديرير و دوشوندورور . آرتيق اَسكيك لري و عئيبه جر ليك لري دايانمادان اونون اوزونه چكير، ياراماز ايش لري خاطير لادير و جمعيت ده اولان چيركين مونايسبَت لري آيدين لادير . نهايتده ايسه اوخوجونو ، ياشاديغي جامعه نين احوالينا يا خود اؤز شخصي احوالينا آغلادير و چيركين ليك لري قالدير ماق هَوَسيني اوندا اوياديب ، دوشونمه گه و تلاش ائتمه گه چاغيرير. بو ايسه ساتيرانين گوجون دن ديركي تأثير داييره سي بئله كسكين و گئنيش دير و جمعيتي آييق سالماقدا  بئله قوووَتلي و جسارتلي رُل اوينايير .

 بئله ليك له آييق ووجدانلي ساتيريك بير صنعتكار ، گؤزل عادت لر و نجيب عمل لرين مدافعي كيمي ، طُفِيلي طبقه لره و منفي عمل لره قارشي ، اَل قولو سوسدالمادان باريشماز بير جيبهه ده دايانيب ، كسكين و اؤلدوروجو مبارزه آپارير . ووروشا ووروشا گولور ، استهزا ائدير و اؤز سئويملي مثبت ايده آل لاريني آچيق دا اؤرتوك ده ، مئيدانا چكيب گؤستر مَگه جَهد ائدير .

آذربايجانين گؤركملي ادب سيما لاريندان اولان ” يحيي آرين پور ” ، ساتيريك صنعتكارين بديعي گولوشونو يوكسك بير سَويّه ده بئله قييمت لنديرير: ” ساتيريك صنعتكار اوزامان كي معين بير موضوع و مسئله يه گولور يا اونو ردّ ائدير و دانير ، حقيقت ده ايسته يير اؤز مثبت ايده آل لاريني ، كي اونلارين عكسينه و ضيدّينه دير، گيزلي ده آچيق دا اوخوجويا آچيب گؤستر سين .” *

هر هانسي دؤوره ده كي ، موجود قورولوش دان آسيلي اولاراق ” ديل آغيز سؤزدن اوسانار و دوداق دانيشير سا اود توتوب يانار ” ** ساتيرا بديعي ادبياتين اَن واجيب و ضروري بير نوعينه چئوريله ر. بئله بير زمانلار دا ، آتا بابا لار دييه ن كيمي ، سؤزون دوغروسونو ظرافاتا ساليب دئمك دن باشقا ، بير چاره تاپيلماز . هابئله وطن ده ، آزادليق  – استيقلاليت اوغروندا گئده ن مبارزه دؤورون ده ايسه ، ساتيرا جسارتلي بير روح لا مئيدانا چيخار ، اينكيشاف تاپار و كسكين بير مبارزه سيلاحينا دؤنه ر. بو سببه گؤره ده ، جمعيت ده گئده ن اينقيلابي سياسي حركاتي گوج لن دير مك ده و عكس اينقيلابچي قوووه لرين ايچ اوزونو قووهتلي بير ساياق دا نيشان وئرمك ده ، ساتيرانين داشيديغي جسارتلي وظيفه ني اونود ما ما لي ييق .

ساتيرانين غضبلي گولوشونون تأثير افادهسي نين بو كسكين ليگي و اؤزونه مخصوص خصوصيت لري ، اونو ” مزه لي احوالات لار ” دان ، ” هَجو ” لردن و ” لطيفه  ” لر دن  بوتون لوك له فرق لن ديرير. هجو ، لطيفه و فكاهي يالنيز گولدورور آمما ساتيرا هم گولدورور ، هم دوشوندورور و هم كدرلن ديرير .

ساتيرانين گئنيش اؤلچوده ياييلماسي و زحمتكئش خلق كوتله لري نين طرفيندن حرارتله قارشيلانماسي ، اونون ساده و جانلي خلق ديليندن قيدالانماسي له مستقيم علاقه دار دير .  بير سؤزله بو يولون يولچوسو ريا، خلقين باشا دوشه جه گي بير ديل ده يازماغي و خلقين مقدراتي ايله باغلي اولان موضوع لاري ، اساس معيار توتمالي دير .

 سون سؤزده بو جهانشمول نظريه ني خا طير لاتماق لازيم دير كي  ساتيرا دؤوروموزون اَن كَسَرلي و تأثيرلي  انتقادي بديعي اثري دئمك دير .   

۱۳۶۱

——————–

              آرين پور ، يحيي. از صبا تانيما ، ج ۲- تهران : ۱۳۵۷، ص ۳۷

              ** بو تعبير آذربايجان شاعيري ” ب. ق. سهند ” ين شعرين دن آلينيب دير كي دئيير :

     اونداكي ديل آغيز سؤزدن اوسانار

      سوروشون مطلبي تئل لر سؤيله سين

    دوداق دانيشير سا اود توتار يانار

    گرك دير زخمه ل زاَل لر سؤيله سين

ارسال دیدگاه