مرثیه ادبیاتی و مرحوم یحیوی

الله تعالی نین آدیلا

مرثيه ادبياتي دئديكده ديوان و عاشيق ادبياتي ايله ياناشي آذربايجان ادبياتي نين بيرقولو كيمي اوزون كئچميشه ماليكدير. ان قديم دؤورلردن بيزه يادگار قالميش آغي‌لار، اوخشامالار و حزين باياتيلار نمونه‌لري بو ژانرين داها قديمي اولدوغونو ثبوت ائدير. بوگون فولكلور كيمي قورونوب ساخلانان بوادبيات نمونه‌لري هم ده آذربايجان خلقي نين تاريخي نين مختلف يؤنلريني آچيقلايان و قارانليق نؤقطه لريني آيدينلاشديران خزينه‌لر كيمي قيمتلنديريلير. مرثيه ادبياتيندا ايسه بونمونه‌لر باشقا بيرطرزده انكشاف ائتميشدير.

كربلا حادثه سيني قلمه آلان عرب و فارس تاريخچيلري نين اكثريتي بوحادثه ني تاريخي بير اولاي كيمي قلمه آلميش و حادثه‌نين مختلف جهتلريني تاريخي و روايي ديلده بيان و ضبط ائتميشلر. آذربايجاندا ايسه بوحادثه ادبيات، عرفان، ادبي – معنوي صنعت لرله يوغور لانميش شكيلده قلمه آلينميشدير. باخما ياراق ، ‌كي بو تاريخي حادثه نين منبعي اصلينده عرب و فارس ديل‌لي منبع‌لر و مقتل‌لر اولموشدور، آمما آذربايجان ديلينده قلمه آلينميش اثرلر قورو و لفظي، معنوي صنعت‌لردن خالي دئييلدير. محض بوسببه گؤره عرب و فارس ديلينده يازيلميش اثرلر و مقتل‌لرله آذربايجان ديلينده يازيلميش مقتل‌لر و اثرلر آراسيندا اساسلي فرق موجود دور. يعني آذربايجان ديلينده يازيلميش اثرلر احساسلي، شعريت، هنر، ادبي صنعتلر و عرفاني مقاملارلا يوغرولدوغو اوچون بواثرلر چوخ آزاراق تحريفلره معروض ‌قالميشدير.

كربلا حادثه سيني آچيقلايان قديم و بيرينجي اثر ابومخنف لوط بن يحيي نين (وفات ۱۵۸ ه‍.ق، ۷۴۴ .م) ياراتديغي اثردير، اوندان سونرا ابوالفرج اصفهاني (۹۲۷ م) و ابو اسحاق اسفراييني (۱۰۲۷ .م) و سيد بن طاووس كربلا حادثه سيني قلمه آلميشلار. فارس ديلينده ايسه بوساحه‌‌ده چوخلو اثرلر اوجمله‌دن بعضي تحريفلره معروض قالميش روضة الشهدا و فاضل دربندي نين يازديغي مقتل لردن آد آيارماق اولار

قاضي [غازي] قاستامانلي (۱۴۶۱ م)، يحيي بخشي (۱۴۹۹٫م، ۹۰۵٫ ه‍ ق) – [۹۶۷ بيت شعر شكلينده]، لامعي (۱۵۳۲٫م، ۹۳۸ه‍. ق) حاجي نورالدين افندي (۹۴۰٫ ه‍ .ق) ايلك عاليملر دير كي، تورك ديلينده كي مقتل‌لري نظم و نثر شكلينده قلمه آلميشلار.

آذربايجان ديلينه گلديكده كربلا حادثه‌سي تام و كامل تاريخي – ادبي، عرفاني بيراثر كيمي ملامحمد فضولي بغدادي قلمه آلميشدير. فضولي‌نين شاهكار اثري كيمي قيمتلنديريلن حديقة السعدا اثري فورما باخيميندان سعدنين گلستاني كيمي مسجع ، نظم و نثرله بيرگه و محتوي نقطه نظريندن ادبي و عرفاني اثر ساييلير.

كربلا تاريخي‌نين آذربايجاندا چئشيدلي ژانرلاردا انكشاف ائتمه‌سي و خلق آراسيندا گئنيش ياييلماسي اردبيل مكتبي نين (شيخ صفي مكتبي) يئتيرديگي شاه اسماعيل خطايي ايله محكم باغليليغي وار.

قطعيتله دئمك اولاركي، شاه اسماعيل هم مرثيه ادبياتي اوچون لازم اولان شرايطي ياراتدي و همه ده اؤزونون هجا وزنيننده دئديگي بيرينجي دفعه اولاراق قوشمالاريندا مرثيه اوچون يئرآييردي.

بوگون ماتم گونوگلدي                  آه حسين و واحسين

سنين دردين باغريم دلدي    آه حسين و واحسين

كربلانين يازيلاري             شهيد دوشدي غازيلاري

فاطما آنا قوزو لاري           آه حسين و واحسين

صفويه دؤروندن باشلاياراق آذربايجان مرثيه ادبياتيندا بؤيوك ايشلر گؤرولدو. بوگون مرثيه آدلانديريغيميز ادبيات اصلينده آيدي-آيري حيصه‌لري اؤزونده جمع لشديرن تمام – كمال بير مجموعه دير ، اونون اساسي بؤلمه‌لري آشا غيداكيلاردان عبارتدير:

  1. مقتل
  2. مرثيه
  3. نوحه
  4. شبيه
  5. گردانليق
  6. مرثيه موغاماتي

مقتل‌يازما:

بوندان اول دئديگيميز كيمي مقتل يازما صنعتي كربلا حادثه‌سي نين تاريخيني روايت لره اساساً يازماقدير. عرب، فارس و تورك ديل لرينده بوگونه كيمي بير چوخ مقتل‌لر يازيلميشدير و آذربايجان توركجه سينده يازيلميش ايلك مقتل ملامحمد فضولي‌نين حديقة السعدا اثريدير. مسجع و تام ادبي و عرفاني مقاملارلا دولو اولان بو مقتل بئش يوز ايلديركي، مرثيه ادبياتي نين ان معتبر منبعي اولموشدور مقتل ايكي حيصه‌دن عبارتدير.  بيرينجي حيصه ده پيغمبرلرين، حضرت رسولون (ص) حضرت علي (ع) و حضرت فاطمه (س) و حضرت امام حسن عليه السلامين حياتيندان و وفاتيندان سؤزگئدير. ايكينجي حيصه ايسه كربلا حادثه سينه حصر اولموشدور.

مقتلده كي شعر پارچاريندان بيرنمونه:

صبردن قطع كف و ساعد مني منع ائيله مز

نخلي قيلماز منحرف نقصان برگ و شاخسار

مرد ميدان بلايم قطع اعضادن نه باك؟

شهپر همتده دور پرواز اوج اقتدار

فضولي‌دن سونرا آذربايجان ديلينده داها بؤيوك حجمده نظم و نثرله يازيلميش مقتل ملاحسين دخيل مراغه‌اي نين يازديغي ۷ جلدليك مقتلدير.

مرثيه‌لر:

مرثيه‌لر كربلا حادثه‌سي ايله علاقه دار ادبي و يانيقلي ديلده يازيلميش نظم و نثر پارچالاريندان عبارتدير. مرثيه لر ده مقتل‌لر كيميدير، آنجاق مقتل ژانري ايله ادبي باخيمدان فرقله‌نير. مرثيه‌لرده جمله‌لر، افاده‌لر چوخ يانيقلي، حزنلو، احساسات و هيجانلارلا دولو شكيلده بيان اولور. نظم ايله نثر بير- بيريني دوغرولدور و تماملابير .عمومتيله اوخوجونون و يا دينله‌يه‌نين احساساتيني اوياتماق وعزا و آغلاما احوال – روحيه‌سي ياراتماق اوچون شعر و ادبي نثر صنعتيندن استفاده ائديله‌رك يازيلان متن و حيصه‌لردير. مرثيه‌لرده بؤلمه‌لر چوخ گننيش دير. آذربايجان ديلينده يازيلميش ان مهم و مشهور مرثيه “سحاب الدموع” (گؤزو ياشلي بولودلار) كتابي دير. بو كتاب بؤيوك شيعه عاليمي و مرجعي تقليدي آيةالله ملامحمد نخجواني (۱۳۴۴ ه‍ . ق وفات) طرفيندن يازيلميشدير. كتاب بيرمقدمه ۱۲ سحابيه بيرمؤخره و بيرده خاتمه دن عبارتدير. سحابيه لره چوخ گؤزل آد وئريلميشدير و بودا متنده كي حادثه‌نين يانديريجي مقامي و فاجعه درجه‌سي ‌ايله علاقه‌داردير. مثلاً الصاعقه المحرقه، شعله ملتهبه فؤاديه، شعله محرقة فؤاديه، شهاب الثاقب، الشرارة المحرقة الاكباد

مرثيه‌لر يازيلي و شفاهي شكيلده افاده اولوئور. شفاهي شكيلده افاده اولونان مرثيه لرده سبك و طرز –افاده‌سي اولان عاليملر چوخدور. شفاهي شكيلده اولان مرثيه‌لرين ده اؤزلرينه مخصوص داخلي بؤلگولري وار.

ساده مرثيه‌لر

مركب مرثيه‌لر

تحليلي مرثيه‌لر

گيريزلي مرثيه‌لر

بوساحه‌ده مكتب صاحبي اولان مرثيه خوانلاردان آية الله خسروشاهي نين آدي خصوصي ايله حاللانماليدير.

اونون تحليلي مرثيه‌لري حقيقتاً بؤيوك بير صنعت خزينه سيدير.

اونون مرثيه‌لرين ائشيدن هر كس آغلامايا بيلمز.

بونو دا قيد ائتمك لازيمدير كي ، بعضاً  بو نوع ادبيات تحريف لره  معروض قالميشدير. بو  ساحه نين آدامي اولمايان بيرسيرا شخصلر مادي ماراقلار اوزوندن مرثيه‌لريميزه چوخلو تحريفلر داخل ائتميشلر.

شبيه گردانليق: آذربايجان مرثيه ادبياتي نين داها مهم و عظمت‌لي ژانرلاريندان بيري ده شبيه گردانليقدير. بو صنعت اصلينده مذهبي تئاتر فورماسيندا شعر، موسيقي و تئاتر صنعتي‌‌نين پارالئل شكيلده اجرا اولونوب بيرلشمه سيندن عبارتدير.

شبيه گردانليق صنعتي‌نين متني مكالمات آدلانان حماسي، موافق و مخالف رجزلردن عبارتديركي، هرهانسي بير نقشي و رولو ايفاء ائدن قهرمانين شخصيتينه، توئدوغو موقعيتينه اويغون افاده طرزي و اجرا سبكي وار.

ملامحمدتقي گلزار قمري دربندي دئمك اولاركي، بوساحه‌نين ان بؤيوك حماسي شاعري ساييلير. قمري نه اينكي ايراندا، بلكه بوتون شيعه منطقه لرينده، ايران، آذربايجان، نخجوان، داغستان، تركمنستان، روسيه و تركيه‌ده سئويلير. اونون كنزالمصائب آدلي اثري شبيه گردانليق ادبياتي نين ان محتشم و مهم منبعي دير.

مرثيه موغاماتي:

عاشيق و ديوان موسيقي سيله يا ناشي مرثيه موغاماتي نين دا اؤزونه مخصوص يئري وار. عرب، فارس و آذربايجان موغاماتي نين بيرلشمه سيندن ايره‌لي گلن مرثيه موغاماتي كلاسيك موسيقي دستگاهلارين خصوصيت لرينه و گؤزل ليكلرينه مالك اولماقلا ياناشي اؤزونه مخصوص اولان دستگاهلار، شعبه‌لر و هاواجاتي دا واردير.

مرثيه موغاماتيندا ديوان موغاماتيندا اوخونان بوتون دستگاهلاردان باشقا حاج حسينقلي سه‌گاهي، سليم سه‌گاهي، ديزمارهاواسي، حجازي و بوكيمي هاوالار گئنيش شكيلده اوخونما قدادير. سينه زنليك، زنجيرزنليك، شاه بيت خوانليق، تك‌‌ضربه، سه‌ضربه كيمي ضربلي موغاملار دا اؤزونه مخصوص يئري وار.

بوساحه‌ده ده اردبيلين بؤيوك خدمتي اولموشدور، اردبيلده، يئتيريلن نوحه خوانلارين اؤزلرينه مخصوص سبكلري اولموشدور. حاج حسينقلي كيمي هنرمندين هنريني بوگون سليم مؤذن زاده كيمي شرقين آواز سلطاني و يئگانه مرصع‌خواني ان اوجا ذيروه‌لره چاتديرميشدير.

نوحه قوشما

مرثيه ادبياتي نين چوخ ساحه‌لي و چوخ گئنيش ياييلميش ژانريندان اولان نوحه ايستر قالب و فورما باخيميندان ايسترسه محتوا باخيميندان چوخ اهميت‌لي دير.

بو ساحه ده آذربایجانین بوتون شاعیرلری اؤز باجاریق و قدرتلرینی نمایشه قویموشلار. دئمک اولار کی، آذربایجاندا نوحه شعری دئمه ین شاعیر یوخدور. کلاسیک شاعر لردن توتمولش معاصر شاعیرلره قدر بوتون شاعیرلر آزدان – چوخدان بوساحه ده شعرلری اولموشدور.

حجم اعتبار یله ده نوحه شعری باشقا شعرلرله مقایسه ده بیرینجی سیرادا دورور. صنعت، بدیعی لیک، اوبراز، تصویر رنگارنگلیگی نقطه نظرنیدن ده نوحه شعرينه چاتان شعر یوخدور. ایستر قصیده، غزل، دوبیتی، مثنوی، چارپاره، مخمس، ایسترسه ده بایانی، قوشما، آغی و دئییشمه ژانرینرا نوحه شعری داها قاباقجیل دیر.

آذربایجان نوحه شعرینی تاریخی باخیميندان اوچ دوره بؤلمک اولار:

قدیم و نوحه شاعیرلری. فضولی، خطایی ، نباتی و باشقالاریپ

اورتا كلاسيك نوحه شاعیرلری . صراف، راجی، سیدعظیم شیروانی، میرزه علیاکبر صابر، سعدی زمان، نیر، شكوهي ، ميرزا حسيب و باشقالاری

معاصر نوحه شاعیرلری، یحیوی، منزوی، انور، منعم، شاهی، مضطر، معنوي ، دلریش و باشقالاری

قدیم نوحه شعری دیوان شعریله چوخ فرقلنمیر، اورتا عصر نوحه شاعیرلري نين نوحه لری یانیقلی اولسا دا دیل و ادبی نقطه نظردن چوخ ساده، آخیجی و ساده دير. معاصر نوحه ايسه تام فرقلي دير.

معاصر نوحه شعری نین خصوصیت لرینه نظر و دقت يئتیردیکده گؤروروک کی، معاصر نوحه شعری نین باشیندا، ادبیقدرتی، رنگارنگ تصویرلری و یا نیقلی افاده لري ايله سئچیلن عباسقلی آقا  یحیوی دورور.

یحیوی بیرطرفدن بوتون کئچمیش شاعرلرین خصوصیت لرینی (فردوسی، نظامی و باشقالاری) توپلایاراق اؤزونه مخصوص اولان بیر صنعت له و افاده طرزیله بیان ائدیر، دیگر طرفدن تصویر و دیل نقطه نظردن معاصر فورمالارلا ائله بیان ائدیر کی، یاراتدیغی اثر لرده هم تاریخی ایزلر گؤرونور هم ده معاصر لیک اییی گلیر. بو كيمي سینتز ياراتماق، کئچمیش له معاصر لیک آراسنپدا بئله بیرباریشیق و بیرليک پاراتماق آنجاق یحیوی نین شعرينده گؤرونور بوباخیمدان – یحیوی نین آذربایجان نوحه شعرينده تأثیری ميثيلسیزدیر و باشقا شاعیرلردن سئچیلیر.

او بیری طرفدن یحیوی نوحه شعرینه باشقا بیر خصوصیت ده آشیلایبر. او کئچمیشده کیلره رغماً بیرشاخه دن باشقا بیر شاخه یه آتيلمير. هر شعری مکمل بیر منظومه و پوئما کیمی داخلی هماهنگ لیگینی، بوتونلوکده آهنگدارلیغینی تام درجه ده قورویوب ساخلاییر.

همچنین کئچمیشده كيلره رغماً ایشلتدیگی کلاسیک افاده لری  او درجه ده مهارتله و اوستادلیقلا ایشله دیر کی، معاصر سؤزلردن استفاده ائتمه دن  نام معاصر افاده کیمی گؤرونور، بو باخیمدان دا یحیوی شاعرلرین باشیندا دوررور.

یحیوی نین دیگر خصوصیتی بیر منظومه نین یارچالاری  آراسیندا منطقی علاقه یاراتماسی دیر. اونون اکثر منظومه لرینده مطلع و نتیجه عینی لیک تشکیل ائدیر و مطلع ایله نتیجه آراسینداکی منظوم پارچالار دا خصوصی بیرمنطق و شیوه ایله زنجیر حلقه لری کیمی بیر – بیرينه باعلانیر و بوتونلوکده شاعرین صنعتينی تمام – کمال بوتوله ییر.

مثلاً عصر عاشورا منظومه سينه دقت يئتيره ك

استاد بومنظومه نين مطلعينده دئيير:

بويوردو ختم‌الانبياء سفينه النجا حسين (ع)پ

چراغ رهنما حسين فروغ نه سما حسين

همين منظومه‌نين سونوندا – نتيجه حيصه سينده منطقي وچوخ مهارتلي بير قاييديشلا مطلع حيصه سينده ايره‌لي سوردوگو فكره بيرداها موفق پريستيژله و غالبانه ژئستله قاييدير.

دئيير:

باشيمي قوو زاديم نه گؤر دوم اول زمانيده

هلالي قووسدور، قزخ چكيلميش آسمانيده

حرير هفت‌رنگ تك عياندي كهكشانيده

بو ايكي جمله ثبت اولوب او منجلي كمانيده

سفينه النجا حسين، چراغ رهنما حسين

حقيقتاً استاد يحيوي‌نين ياراديجيليغيني آرا شديرماق ايسته‌سك جليد-جليد كتابلار يازماق اولار. چوخ تأسف‌لر اولسون كي ، بوگونه قده ر نه اينكي آذربايجان مرثيه ادبياتي بوتولوكده استاد يحيوي كيمي شاعرين ادبي و مذهبي شخصيتي و ياراديجيليغي تحقيقات موضوعسو اولما ميشدير و داها فاجعه‌لي مقام  بوندان عبارتدير كي، بيزيم علمي- تحقيقاتي ، مدني و ديني آراشدير مالار مركزلري تحصيل اوجاقلاري و دانيشگاهلار بوكيمي موضو علارلا بيگانه دير. اونلار اصلي بوراخيب فرعين دالينجا دوشموشلر، حقيقتي قويوب مجازدان آسلانميشلار.

سؤزوموزون ثبوتو اوچون چوخ اوزاقلار گئتمه‌يك، لاپ بو يا خينلاردا بير- بيرنيه اوخشايان، بير- بيري‌ نين اوزندن يازيلميش كلاسيك شاعرلرين شعرلرينه داير نشر اولان شرحلر‌ين بازارچالارينا باش وورساق بونون نه درجه ده فاجعه‌لي اولدوغونو گؤره‌ريك.

موضوعدان كنار دوشمه‌يك، صحبت استاد يجيوي نين ياراديجيليغي نين خصوصيت لريندن و اونون آذربايجان مرثيه ادبياتي نين نوحه ژانريندا بوراخديغي تأثيردن گئدير.

بيزبونو آچيقلاماق اوچون اوستادين بير منظومه سيني قاباغيميزا قويوب مختلف جهت و يؤنلردن آراشديرماغي بيزي مقصده چاتديران كسه يول كيمي حساب ائتديك.

دئديك‌ كي، استاد يحيوي كلاسيك و اورتا دؤر نوحه ادبياتيني او اوزدن بو اوزه دؤندردي. عمومتيله ساده ديلده سؤيله نيلن نوحه شعرلري يحيوي‌نين ديلينده داها ادبي له شيب، شيرين له شيب و گؤزل شميشدير. بوگؤزل لشمه اونون اؤزونه مخصوص اولان صنعتيندن ايره‌لي گلير.

قيسا شكيلده دئسك استاد يحيوي آشاغيدا قيد اولان خصوصيت لره گؤره باشقا شاعرلردن هم فرقله نير هم ده اونلارلا مقايسه ده اوستون و معاصر ساييلير. محض بو خصوصيت لره گؤره اونا تاج الشعرا لقبي وئريلمه سينه تام لاييقدير.

يحيوي نين شعرينده كي تصويرلر، عمومتيله بيررسم تابلوسو كيمي گؤزل گؤرونتويه ماليك دير. اونون تصويرلري گؤزل بير تابلو ياراتماغا بؤيوك منبع و امكان دير. مثلاً عصر عاشورا شعرينده كي بوتون بندلر بو خصوصيت مالكيدير.

يحيوي‌نين تكرارلاري اصلينده تكرار دئييلدير. لفظاً تكرار اولانلاردا چوخ باجاريقلا افاده اولونموشدور. مثلاً :

ايشيق چكليدي كاملاً دؤنوب هوا اَنيب شفق

هوادن ابر ظلمتي آييردي خارق الفلق

ستارگان تابناك بؤلوندولر ورق – ورق

كي لكّه – لكّه نوردور گلير يئره طبق – طبق

او نور آسمانييه اؤزو وئرير جلا حسين

ايشيق چكيلدي

هوا دؤندي

شفق ائندي

۳- منظومه‌لر خصوصي و منحصر به فرد آهنگدار ليغا ماليكدير:

۴- منظومه‌لر، افاده‌لر عرفاني مقاملارلا دولو اولسادا عرفاني مقاملار اولاً ساده‌ ديلده افاده اولونور هم ده چوخ نيسگيل لي و حزنلو و يارالي شكيلده بيان ائديلير. چوخ ماراقليديركي، عرفان، حماسه و رثا هراوچو عيني ليك تشكيل ائدير يحيوي نين شعرينده.

عرفاني اولدوغو قدر حماسي دير، حماسي اولدوغو حالدا رثايي دير. بوايسه يحيوي نين ادبي معجزه سي دير. حالبوكي بيضاي اردبيلي نين شعرينده عرفاني مقاملار چوخ يوخاري اولسادا او درجه‌ده رثايي دئييلدير.

۵- شعرين وزن و قالبلري محتوي و موضوع ايله چوخ اويغونلوغو وار

۶- غلو و مبالغه صنعتيندن ائله – باجاريقلا فايدا لانيركي، تحريف لره يول وئرمير. بودا يحيوي نين اؤزونه مخصوص اولان بيرصنعتدير. چونكي باشقا نوحه شاعرلري و حتي مقتل و مرثيه يازيچي لاري بوصنعتدن فايدالانديقلاري زمان عاشورا حادثه سينده تحريف‌لره يول وئريرلر. يحيوي ايسه تام مهارتله بوصنعتي تشبيه و زبانحال ايله ائله بيان ائديركي، خبر تحريف اولونمور و ائشيدن تام آيدين شكيلده شاعيرين منطقي‌نين جدي، خبري و روايي دئييل،اونون شعر و نظم منطقي ايله سؤيله دبگي افاده لري‌ آيدينجا باشا دوشور.

يوخاريدا دئديكلريميزين هاميسي آشاغيداكي منظومه ده تام اؤزونو گؤسترير:

بويوردو ختم الانبيا سفينه النجا حسين

چراغ رهنما حسين ، فروغ نه سما حسين

بني اسدده بير نفر ائديبدي بو روايتي

محرم آيي نين اوني تاپيپ حسين شهادتي

….                .قوشون آپاردي غارتي

گيريز

اوچؤلده قالدي يادگار هواده قان علامتي

اسنده يئل كي، سسله نير دئيير: «هواده يا حسين»!

بيرينجي تابلو

دئييركي، عصر تنگ ايدي افقده گون باتان زمان

واريدي مزرعم منيم او چؤلده سبز و ارغوان

او كشتزاري گؤرمگه روانيديم قدم زنان

ساتاشدي ناگهان منيم گؤزومه سهمگين مكان

قولاقيمه يئتيشدي واي غريب نينوا حسين

ايكينجي تابلو

يئتر مشامه بوي خوش نسيم دلنوازيدن

نه بوي دلپذيركي، چيخار گل و گياهدن

غبار مشك پخش اولور زمين خيمه گاهيدن

اوچونجو تابلو

او دشت خوفنا كده دوشوب يارالي نعشلر

برهنه سينه‌لرده قان چو نقره اوسته نقش زر

بيلكدي، قولدو، جسمدير، اولور نظرده جلوه‌گر

سه شعبه تيرلر ده‌يوب آچوب جنازه‌لرده پر

فداي حقيلن ائديب او عرصه ني منا حسين

دؤردونجو تابلو

هواده دسته – دسته قوش گؤرور گولون بهاريني

انيب قاناديله سيله بدنلرين غباريني

بير آيري دسته قوش آچار پران سايه داريني

آلير يارالي نعشدن حرارتين فشاريني

قاناد ووراندا چؤللره دوشور صداي وا حسين

بئشينجي تابلو

چكيلدي رنگ آفتاب او قورخولي مكانيدن

چيخيبدي بير مهيب شير ميان نيستانيدن

بدنلره باخيب كئچيب كنار كشتگانيدن

گلير خفيف همهمه او شير بي زبانيدن

گزير ياواش – ياواش دئيير ديلينده بي‌صدا حسين

آلتينجي تابلو

يئتيشدي تاپدي مقصدو مرادي نين ياتان يئرين

كنار قتلگاهينه ادبله ووردو اللرين

بوياردي يال و كاكلين سيلردي خون احمرين

اوقاندا آشكاريدي ملمع الدماء حسين

يئددينجي تابلو

چكردي بانگ عربده سالاردي دشته نعره‌سين

سپردي باشه تورپاغي يئره ووراردي پنجه سين

طواف ائدردي متصل ضريح عشق كعبه سين

گليب وحوش جنگلات او شيرين آلدي دؤره‌سين

هامي جهانيان سنين مقاميوه فدا حسين

سككيزينجي تابلو

ايشيق چكليدي كاملاً دؤنوب هوا اَنيب شفق

هوادن ابر ظلمتي آييردي خارق الفلق

ستارگان تابناك بؤلوندولر ورق – ورق

كي لكّه – لكّه نوردور گلير يئره طبق – طبق

او نور آسمانييه اؤزو وئرير جلا حسين

دوققوزونجو تابلو

اونورلر اَنير يئره بو نور عرشه قووزانير

او پارچا – پارچا نورلر بونورون اوسته توولانير

فضاي تيره رنگده چراغ آسمان يانير

بونوركي، چيخيرگؤيه‌ هامي جهان ايشيقلانير

جمال حقي گؤسترير طليعه ضحاء حسين

اونونجو تابلو

ائشيتيدم اوندا غيبدن اوجالدي نوحه و نوا

او نورلردن آيريلير صداي ضجّه و بكاء

گؤزه گورونمز آغلايان گلير ترنم عزا

كي، دسته جمعي سسله‌نير حسين‌وا – حسين‌وا

غريب نينوا حسين قتيل اشقيا حسين

اون بيرينجي تابلو

دئيير باشيمي قووزاديم نه گؤردوم اول زمانيده

هلالي قووسدور قزح چكيلميش آسمانيده

حرير هفت رنگ تك عياندي كهكشانيده

بو ايكي جمله ثبت اولوب او منجلي كمانيده

سفينة النجا حسين چراغ رهنما حسين

دومانلی دوزال

ارسال دیدگاه