حكایه‌جیك‌لر / حسین واحدی

۱–    دایان، یاردیم ایسته‌ییر بو قادین!
هر گون شهرین كمر یولوندان كئچنده او یاشماقلی و اوزونو اؤرتموش یاشلی قادینی گؤروردو،  چوخ راحاتسیز ائدیجی بیر آن اولوردو.  بئلی آزجا بوكولموشدو و الین اللره آچمیشدی…
ائلمان اوركدن آه چكیب تانریدان اونا یاردیم ایسته‌دی. اونا یاخینلاشیب، آرابانی ساخلاییب، شوشه‌نی ائندیریب، آزجا پول وئریب؛ ننه تانریم سنی قوروسون، منه ده دوعا ائت- دئدی!
یاشلی قادین؛ اوغلوم! عؤمور بویو ساغلام یاشایاسان، تانری سنی ساخلاسین، ایجاره ائوده اوتورورام و كیمسم  یوخدور … دئدی.
ائلمان دریندن آه چكیب، حزین باخیشلا اوندان آیریلیب، یولونون آردین توتدو…

۲–    اوشاق محبتی
سئوین، پالتارلارین گئیمك ایسته‌ییردی، آمما كؤینه‌یین باشینا كئچیرده بیلمه‌ییردی. تومانین ترسینه گئییردی! آناسی گلیب اونا یاردیم ائدیب، گئییندیردی. یانیجا آلیب بازارا گئتدیلر. بازارین توكانلارین بیر- بیر گزیر، آناسی ایسته‌دییی شئی‌لری آلیردی. قیزیل بازاریندا، توكانلارین بیرینین یانیندا، اوزو یاشماقلی بیر قادین اونلارین یانینا گلیب یاردیم ایسته‌دی! سئوین- ین آناسی اؤزونو توتاراق ائشیتمك ایسته‌مه‌دی بو سسی! او حئینی آبیرلی دیله‌نن قادینین اوشاغی سئوین-دن دوندورماسینی ایسته‌دی. سئوین ایسه، ائشیتدی بو سسی! سئوین ایكی الی ایله یاپیشدی دوندورماسیندان. سئوینه- سئوینه وئردی اوشاغا!!

۳–    یورولماز قاریشقا
اؤزوندن نئچه قات بؤیوك و آغیر اولان بیر بوغدانی داشیییردی. چوخ دقتله یولونو گئدیردی. قاباقدا بیر چؤپ واریدی و قاریشقا اونا یئتیریب دایاندی. سانكی “اورست” داغینین اؤنونده دایانمیشدی.
ساعاتلارجا اورادا دایانمادان بوغدانی اویانا كئچیرمه‌یه چابا گؤسته‌ریردی. بؤیوك بیر یئر كوره‌سی، اوجسوز- بوجاقسیز بیر عالم و خیرداجا بیر چؤپ و بیر یورولماز قاریشقا!
بوغدانی دیكینه توتوردو، بوغدا یئنه آشیردی؛ آمما یوز دفعه بو یوران ایشی تكرارلادی. بیر دفعه اونو دیك توتماغی باجارا بیلسه‌یدی اونا یئترلییدی! بویانا كئچیب،اویانا كئچیب، بوغدادان واز كئچمك ایسته‌میردی. دونیادا بوتون یئمك‌لر سونا چاتمیش كیمی!!
… سونوندا بوغدانی دیك توتوب چؤپه دایاندیرا بیلمه‌یی باجاریب، اویانا آتدی و اؤزوده چؤپدن كئچیب اوزون بیر یولونا داوام ائتدی! گؤرن بو اوزون یولدا نه قده‌ر چؤپ وار؟

۴–    كؤچمن قارانقوش
سون باهار گلمك اوزره‌دیر. یولداشلاریم دئییر: قالدیغیمیز یئردن باشقا یئره گئده‌جه‌ییك. آتامدان سوروشاندا: هاراگئده‌جه‌ییك؟ من تانیمادیغیم یئرلردن سؤز آچیر. هردن اؤز- اؤزومه ائله داریخیرام! دئییرم نه اولار ائله بو یام-یاشیل یئرده قالیب یاشایاق. آمما آتام دئییر:
-بیر آیین ایچینده بورادان گئتمه‌سك هامیمیز سویوقدان اؤله‌ریك. قارانقوش‌لار ایستی یئرده یاشایارلار. ائلیمیزین بؤیوگو دئییب.
ایكی گوندن سونرا اورمو گؤلونون یانینا گئده‌جه‌ییك. آتام دئییر:اورمو گؤلو، چوخ گؤزلدیر و اورادا آیاقلاری اوزون فیلامینقولار، ساری جئیرانلار، قوچ‌لار و… یاشاییرلار. ایندی چوخ ماراقلی اولموشام تئزلیك‌له قالدیغیمیز یئردن اورمو گؤلونو گؤرمه‌یه گئدم…
كؤچمك گونو گلیب یئتیشمیشدی و یولداشلاریم‌ایله بیرلیكده بیر قیراقدا اوچماغا حاضیر اولموشدوق. ائلین بؤیوگونون اوچماغی‌ایله هامیمیز گؤیه ساری یوللاندیق. شهرلرین اوستوندن كئچنده اوشاقلارین هامیسی بیزه ال ساللاییردیلار و ائله بیل اونلار بیزیمله بیرگه اوچماق ایسته‌ییردیلر…
یول چوخ اوزونویدو، آمما هئچ یورولماق بیلمه‌ییردیم، یالنیز اورمو گؤلونه چاتماق ایسته ییردیم. بؤیوكلو-كیچیكلی داغلاری، اورمانلاری، شهرلری آشیب گئدیردیك. گئتدیگیمیز یئره آز قالیردیق. آتام، آنام‌ایله بیرلیك‌ده یانیمدا اوچوردولار و من چوخ سئوینیردیم.
… اوزون یولچولوقدان سونرا، آرزیسین چكدیگیم یئره یئتیشمیشدیك، آمما اورمو گؤلو… اورمو گؤلو من آرزیسین چكن دئییلمیش. چوخ آغلادیم بورا گلدیگیمه، بورا چؤلدن باشقا بیر زاد دئییلمیش. آتام یانیما گلیب، آغلاما قیزیم بورا سولو بیر گؤلویدو، قوروماسینین نده‌نینی بیلمه‌ییرم، سنی آپاراجاغام گؤزل «وان» گؤلونه، دئییرلر اورا چوخ سولو و گؤزل دیر… سن آغلاما، گؤزل قیزیم …!

ارسال دیدگاه