سئوینیرم یاشاییرام / نادر پاشائی

بیر گون منی چاغیر گیلان     خلوتینین بوجاغینا

دردلریمین مین ده بیرین        پیچیلداییم قولاغینا.

چوخداندیر کی قارا کولک      قویمور گوله باغدا چیچک

اوچوب قونمور آغ کپه نک      قیزیل گولون بوداغینا.

دا شعریمدن شنلیک داممیر      کؤنول گؤزدن فایدالانمیر

چوخداندیر کی گولوش قونمور    سئوینجیمین دوداغینا.

نادیر پاشا آجی دؤوران          چالدی سنی ساغدان – سولدان

تومدو گونش دوندو چاولان    خزان دوشدو یایلاغینا.

نادر پاشائی ۱۳۳۸جی ایلده قارداغ ماحالی نین ورزقان گونئیینده یئرله شن میرزالی کندینده سازلی – سؤزلو بیر عائیله ده دونیایا گؤز آچدی. او، ابتدائی مدرسه نی کندده بیتیردیکدن سونرا تبریزه گلیب و تبریز دانشگاهیندان عالی تحصیلات آلدیقدا ماذون اولدو. ۱۳۶۵جی ایلده ایرانلا عراقین ساواش جبهه سینده اسیر اولاراق، ۲۶ آی عراق دوستاقلاریندا قالدی. آنجاق ملی دویغولو شاعیر بیر آن یازیب سؤیله مه دن اوسانمادی و بیر ایگید کیمی وارلیقیندان مودافیعه ائتدی. نادر پاشانین ایلک شعر دفتری اولان “سئوینیرم – یاشاییرام” عنوانلی دفتری اللرده گزیر. بو دفترده شاعیریمیزین غزللری، قوشمالاری، سربست شعرلری و باشقا فورمالاردا سؤیله نن شعرلرینی اوخویوروق.

   هارای – هارای

هارای – هارای نئجه چوخ چکدی ملتین یوخوسو

هله اویاقلاری دا مورگولور اویور چوخوسو.

یئرینده دامدا – باجادا قورخودا اوشاقلاریمیز

و اونلارین باشی اوسته همیشه بیر خوخوسو.

اوزاتدی قورشاغینی گؤی باخیب ماراقلاندیق

نه فایدا قالدی یاریمچیق اونون گؤزل توخوسو..

یئنه دؤیور باشینا ائل – اوبام یاد آغری لارا

مین ایلدی گیرمانا دؤنموش وئریر بو اوخ یئری، سو.

او آغریلار کی سپیلمیش بو گولشنین اوزونه

داها نه گول گؤرونر بیر ده، نه اونون قوخوسو..

بیچیلدی قامتینه نادرین قارا گونلر

سئوینجی غصه یه چئوریلدی ناله یه اوخوسو.

هارای – هارای نئجه چوخ چکدی ملتین یوخوسو

هله اویاقلاری دا مورگولور اویور چوخوسو..

نادر پاشا غزللرینده ده اجتماعی ماراقلارینی بیلدیریر و باشقا شعرلرینده یئنه اؤز دغدغه لرینی دئمه یه چالیشیر. شاعیر، ائل اوغروندا، وطن یولوندا اسیر دوشوب، عمرونو مبارزه ده کئچیرده رک، ملی دویغوسونو و آنادیلینه محبتینی بیر آن دا اونوتماییر. شاعیرین آتاسی بیر آشیق اولموش، او دا آتاسیندان موسیقی و شعر فورمالارین اؤیرنمیش و روحونو آتاسی نین ائل – اوبا حاققیندا سؤیله دیگی صنعتله بزه ییب و بوگون، آتاسیندان آلدیغی هنر، شاعیرین سؤیلم لرینده اؤزونو گؤسته ریر. ایندی بیر سربست شعرینی اوخویالیم:

آی اؤزگورلوک

دان اولدوزو آسلاناندا

سنین ایپک تئللریندن

گئجه میزین

سون بیر چاغی اولاجاقدیر

گونش

باهار اویلاغیندا

یاپیشارکن اللریندن

پوزولاجاق

قارانلیغین بور – بوساطی

یئر اوزوندن همیشه لیک

ان توتغون بیر اوره یه ده

سئوینج ایله، سئوگی نورو

دولاجاقدیر

کوچه میزدن، اؤتن ان خول قوش قووان دا

دوشونه جک سنی او گون

آی اؤزگورلوک.

بو شعر دفترینه موغان تخلص لو محمدعلی نهاوندی جنابلاری اؤن سؤز یازمیش و احد فر همندی جنابلاری دا دفترین ائدیت ایشینی چوخ دوزگون بیر دورومدا یاراتمیش و شاعیر تواضعکارلیقلا اونلاردان تشکورلرینی ده بیلدیرمیشدیر. بیز ده شاعیر اوچون یئنی باشاریلار دیله ییریک.

نظرات

  • نادر پاشا

    چوخ تشکرلر سایین دوکتور بی . سیزین ادبیاتیمیزا گؤرکملی خدمتلریز تاریخ بویو اونودولمازدیر . سیزین اذنیزله اوسته گئدن شعرلرین تایپ یانلیشلیقلارینا بیر اشاره ائتمه گی ،گرکلی گؤرورم :

    – یانلیش ( آن) دوغروسو ( آغ) …اوچوب قونمور آغ کپنک
    – یانلیش ( دانمیر ) دوغروسو ( داممیر)…دا شعریمدن شنلیک داممیر
    – یانلیش (چوخوسو) دوغروسو ( خوخوسو)… و اونلارین باشی اوسته همیشه بیر خوخوسو
    – ————
    سربست شعرده :
    – یانلیش : (گئجه میزیم) دوغروسو ( گئجه میزین )
    – یانلیش ( خوش) دوغروسو ( خول xol) … کوچه میزدن اؤتن ان خول قوش قوواندا

ارسال دیدگاه