زنگان آشیقلاری

زنگان آشیق محیطی ایرانین ۷ آشیق محیطیندن بیری ساییلیر. بو آشیق محیطی دئدیگیمیز مییانادان باشلامیش البرز – کرج شهرینه کیمی اوزانیر. ایندیلیکده بو محسطده ۳۰۰دن آرتیق آشیقلاریمیز اللرینده ساز، دوداقلاریندا سؤز و اوره کلرینده درین محبت انسانلارا خدمت ائدیب، خالق ایچینده شنلیک یارادیب اؤیودلر پایلاییرلار. بونلار زمانه میزین هومری آدلانیرلارسا حاقلیدیرلار. اونلارین بوینوندا بوگونکو رسالت لری داشییاراق اؤز ایلقارلارینا وفالی گزیب – دولانیرلار؛ سازلاریندا و سؤزلریندا بو ایلقاری داشییرلار. آشیقلاریمیز سازلاریندا یئنی هاوالار یارادیب، زنگانین ۲۷ اؤزه ل هاوالارینی – آذربایجانین ۱۰۰ هاوالارینا آرتیراراق – چالیب چاغیریرلار. ایندی ده یئنه هله بو هاوالاری درینلشدیرمک و چوخالتماسینا چالیشیرلار. هابئله یازی ادبیاتیمیزا آرخا دوراراق چوخلو آشیقلار اللرینه قلم آلیب و کتابلار یازیرلار. او دا تکجه شعر یوخ، بلکه داستانلار دا قوشوب یارادیرلار. بورادا بو آشیقلاری بورادا تانیتدیرماق و اثرلرینی اینجه له مه نی بوینونا آلیر.

آشیق جمشید عبدی

مییانا آشیقلاری سیراسیندا آدی چکیلن و آیاقلارینی زنگاندان چکمه ین گؤرکملی آشیقلاردان بیریسی آشیق جمشید عبدی دیر. او، بوگونه قدَر اوچ کتاب، آشیق ادبیاتینا پای وئرمیشدیر. بو کتابلاررین آدلاری بودور:

۱-     آینالاری بولاقلار

۲-     سازیمین تئللرینده

۳-     هله چاپ عرفه سینده اولان باشقا بیر کتاب.

آشیق جمشید ۱۳۴۱جی ایلده میانانین میدان داغی بؤلگه سینده آنادان اولموش، ابندائی مکتبینی اورادا بیتیرمیش و همان یئنی یئتمه یاشلاریندان چالیب – اوخوماغا ماراق بسله میش، اوشاق ایکن جعبه تخته لریندن قوپوز دوزه لدیب ساز ائتمیشدیر. همان چاغلاردان اوزانلیق هنرینی الده ائتمه یه چالیشان آشیق، بیر نئچه اوستاد آشیقلاری یانیندا شاگیرلیک ائتمیش، او جمله دن آشیق مالیک نجفی و آشیق یداله نوظهور یانینا اؤیرنمیشدیر. ساز چالماغا و سؤز قوشسماغا قابلیت تاپاراق ائل آراسیندا مجلیسلر بزه ییب، تویلار یولا سالمیشدیر. آشیق جمشیر بوگون آدلی – سانلی بیر ساز و سؤز اوستاسی دیر. اونون سؤزلرینده طبیعتین گؤزه للیگی – مئهلی داغلار، میوه لی باغلار، سرین سولار چاغلایان بولاقلار دیله گلیر؛ اونون دیلینده طبیعتدن علاوه، خالق ایچینده یاخشیلارلا پیسلری بیر – بیریندن سئچیلمه یه چالیشان آشیق، بیر آغ ساققال کیمی اؤیود وئریر و یول گؤسته ریر. او، آهیل بیر آشیق اولاراق انسانلاری اؤز حقلرینه قانع اولمالارینی سؤیله ییر:

آدم اوغلو اؤز حاققیوا قانع اول،

اؤزگه نین مالیندان سنه مال اولماز.

آشیق عنعنه لرینه دوزگون صورتده باغلی اولان آشیق، خالق ایچینده دوز دولانیب، دوز دانیشمالی و دوز یولو سئچمه ده خالقینا یاردیمچی اولمالیدیر و بونا گؤره ده آشیق اؤیودلری ائشیتمه لی دیر:

آی عاریفلر، فیکیرله شین، دوز سئچین،

اگریدن – اوغرودان آغ ساققال اولماز.

صاباحین حسابین دوز اؤلچون – بیچین،

دوز اولان انسانا هئچ زاوال اولماز.

آشیق عؤمور بویو دوزگونلوک جارچیسی اولموش، دوزگونلویو خالقینا اؤیرتمه لی دیر و اونلاری دوز یولا چکمه لی دیر. اونا گؤره ده شعرلرینده دالغالانان پیس عمللرین قیراغا قویولماسینا اؤیودلر وئریر:

آخیرا یئتیشمز ظولم ائیله ینلر

داراشیب اؤزگه نین مالین یئیه نلر،

حقسیزلیک ائیله ییب بهتان دئینلر،

شیطان فتنه سینی سوراغلار گئده ر.

یئنه باشقا بیر اؤیود:

ائشیدیب دانیشما، گؤردوگونو دئ،

خالقا بهتان دئمه، انسانسان اگر.

شیطانلیق ائله ییب آرانی قاتما،

بیر ده یالان دئمه، انسانسان اگر.

آشیق، بیر پارا یالانچی – یولانچی انسان آدلانانلاری و ریاکارلاری تنقید اوخونا باغلاییر:

یالاندان آلنیوی مؤهوره دؤیمه،

اوره یین دوز دئییر آی شیطان سنین.

کبریندن قلبیوی بیر آباد ائیله،

عملین دوز دئییر آی شیطان سنین.

آشیق، ملی وارلیغینا باغلی بیر انساندیر. او، بوتون آذربایجان آشیقلاری کیمی آنادیلینه، وطنینه و الئلینه باغلی بیر انساندیر. انسانلارلا گولور، اونلارلا آغلاییر؛ شادلیقلاریندا شادیر، یاسلاریندا اورتاق. او، چوخلو شعرلرینده آذربایجانلی اولدوغونا گووه نیر، آنادیلینه اولان محبتینی سؤیله مکدن شادلانیر و ائله باغلی اولماق اوچون چالیشیر. آشیقا یئنی باشاریلار و ساغلام جان دیله ییرم.

ارسال دیدگاه