يازيلاريميزي بيرلشديرك / بهرام اسدي

 

 كئچن يوز ايلده الفبا مسأله‏ سي آيدينلاريميزين آراسيندا چوخ يئر آچان بير موضوع اولموشدور و هله ده دوام ائدير.

عرب الفباسينين ديليميزده اولان چاتيشمازليقلاري و اونون نئچه چئشيت (Z) و (S) كيمي حرفلرينين اولدوغو اونون بيزيم ديلده اساسي ايرادلاريندان ساييلير. آنجاق بوتون بونلارا رغماً بو الفبانين نئچه اوستونلوگو ده واردير. اونون اوستونلوكلريندن بيري اونون قيسا يازيلماسي‏دير.

دئمك بير چوخ كلمه ‏لرده مصوّت‏لره مستقل حرف قويولماديغينا گؤره بو الفبا ايله يازيلان كلمه ‏لر آز يئر توتورلار. نتيجه ‏ده مثال ايچون بير چيخيشدان يادداشت گؤتورن بير شخص بو الفبا ايله لاتيندا و كيريلده اولان چتين‏ليك‏لره دوشمور.

عرب الفباسينين باشقا اوستونلوگو بو الفبا ايله يازيلان سؤزلرين كؤك و ريشه ‏سينين آسان تاپيلماغي‏دير مثال ايچون (اليم و عليم) دئييلنده (اليم)ين، الم (درد-آغري) كؤكوندن و (عليم)ين، علم (بيلگي و بيليك) كؤكوندن اولدوغو بللنير. بير حالدا كي لاتينجا (əlim) يازيلاندا اونون كؤكو بيزه آيدين اولمور.

عرب الفباسينين ان اهميتلي اوستونلوگو بوراسيندادير كي بيزيم مين ايلدن آرتيق ادبياتيميز بو الفبا ايله يازيليب و بيز بو الفباني بيلمك ايله كتاب دده قورقوت و باشقا نهنگ آبيده لريميزي آسان‏ليق ‏ايله اوخويوروق. بورادا عرب الفباسينين چاتيشمازليقلاريق و اوستونلوك‏لرين تره ‏زي‏يه قويماق نيّتيميز يوخدور آنجاق بير زاد بللي ‏دير او دا بو كي بيز ايران تورك‏لري بو الفبا ايله يازيريق و اونو ايشله‏ ديريك. بونونلا دا مختلف يازيچي‏لاريميزين آراسيندا بيرليك يارانمالي و يازيلاريميز بيرلشمه ‏لي‏دير.

بو بيرلشمه‏ نين بيرينجي تمل(ين) مرحوم پروفسور نطقي قويدو و او مرحومون بو موضوعدا چاليشيقلاري اونودولماز و دانيلمازدير.

 پروفسور نطقي بيرينجي دفعه اولاراق مصوّت‏لري گؤسترمه گه عرب الفباسينا بير علامت‏لر آرتيردي و بو علامت‏لر سرعت ايله اؤزونه يئر آچدي و يازيچي‏لاريميز و شاعرلريميز طرفيندن قارشيلاندي و مختلف نشريه ‏لر اونلاري ايشلتديلر و دئيه بيلريك بوگون بو علامت‏لر رسميته دوشوبلر و اونلارين اوستونده بحث آپارماق گرك دگيل.

 آنجاق بير پارا آيري نقصانلار گؤزه دگير و مختلف نشريه ‏لريميزين آراسيندا گوبود فرق‏لر گؤرسنير، بونونلا دا من بو مقاله‏ ده چوخ قيسا اولاراق بير نئچه مورده اشاره ائدرك اؤز اؤنورلريمي ده تقديم ائده ‏جگم.

 مقدمه‏ ده اشاره ائتديگيم كيمي عرب الفباسينين اوستونلوك‏لريندن بيري اونون قيسا يازيلماسي‏دير آنجاق گاهدان بير پارا يازيچي‏لاريميز اؤز كلمه ‏لرين يئرسيز اولاراق اوزاديرلار مثال ايچون (kəpənək) سؤزونده (كپنك) يازماغيميز كفايت ائدر چونكي بو كلمه ‏يه باخان اونو باشقا بير شئي اوخوماياجاق‏دير ايندي اونو گتيريب (كه‏ په ‏نه‏ ك) يازماغيميز هئچ ده گرك دگيل ياخود  (gedənmərəm)يازاندا اونو (گئده‏ نمه ‏ره‏ م) يازماق لازم دگيل و (گئدنمرم) يئتر و بو كيمي مثال‏لار…

 مصوّت‏لري خصوصيله (Ə) مصوّتين گؤسترمه گه يازديغيميز (ه – ـه) حرف‏لرين آنجاق گرك اولان يئرلرده يازمالي ‏ييق و هر يئرده (ه) سسي اولاندا اونو يازماغيميز گاهدان كلمه ‏ني ده قيليقدان چيخاردير و اونو يئرسيز اوزادير مثال ايچون (gözəl) كلمه‏ سينده اونو (گؤزل) يازماق يئتر چونكي بو كلمه باشقا تلفّظ ايله اوخونا بيلمز، آنجاق (gözələ) يازاندا (ز) دن سونرا (-ه) يازيلماسا (gözlə) ده اوخوناجاق‏دير و مثال ايچون  (gözələ dedim)  (gözlə dedim) اولاجاق‏دير.

 چاغداش ديليميزده بير پارا دگيشيلمه ‏لر اولوبدور مثال ايچون اسگي ديليميزده اولان بير پارا (گ) حرف‏لري چاغداش ديليميزده ي  (y) حرفينه چئوريليبلر و تلفّظ اولورلار. توركيه الفباسيندا بونلاري گؤسترمه گه (گ) يازيلير آنجاق اوستونده ده بير علامت (ğ) قويولور و دئمك بو حرف يازيلاندا (گ) اوخوياندا (ي) اولور بيزيم الفباميزدا بونو گؤسترمگه خاص بير علامت يوخدور بورادا (ي) يازماق بير پارا سهولره باعث اولا بيلر. بونونلا دا منيم اؤنوروم اونلارين (گ) يازيلماسي‏دير.

 مثال ايچون (دئييلدي) يازاندا بللي اولمايير كي بو (گفته شد) يا خود (نبود) معناسيندادير. اسم مصدرلره (اك) آرتيريلاندا اونلارين سونلاريندا اولان (ك) حرفين اؤز ياخين حرفي اولان (گ) حرفينه چئويرمگيميز داها يئرلي‏دير و بير پارا سهولرين ده قارشي‏سين آلاجاق‏دير مثال اوچون (گلمه ‏ييم) يازاندا بللي اولمايير كي بو (آمدنم) يوخسا (نيايم) معناسيندادير بونا گؤره ده بيرينجي‏سين (گلمگيم) ايكينجي‏ سين ‏ايسه (گلمه ‏ييم) يازماغيميز داها يئرلي اولار هابئله ‏دير: (اوره‏ گيم) و…

بير باشقا اختلاف  (dahI) سؤزونون يازيلماسيندادير اونو بير پارا يازيچي‏لاريميز (داهي) و بير پاراسي (داحي) يازيرلار. (ح) حرفي عربه مخصوص اولان بير حرف‏دير و بيز هئچ بير تورك كلمه‏ سين اونونلا يازماياجاغيق آنجاق بو بير مثالدا بو سؤزون اصلينه باخاركن اونون (دخي) اولدوغو اوزه چيخير، بونا گؤره ده بو كلمه‏ ني (داحي) يازماغيميز داها ياخشي‏دير بئله ‏ليك‏له اونون املاسي (داهي – dahi) كلمه‏ سينين املاسي ايله فرق‏له نير.

يوخاريدا اشاره اولدوغو كيمي الفباميزدا بير تعداد عربه مخصوص اولان حرف‏لر واردير (ح – ط – ص – ض – ذ – ظ – و…) بيز بو حرف‏لري آنجاق دخيل كلمه ‏لرده و عموميت‏له عربدن گلمه سؤزلرده ايشله‏ ده ‏جگيك و اصيل تورك كلمه ‏لرينده بو حرف‏لرين يئري يوخدور و مثلاً (طرلان، اصلان، قاطر، حله) يازماغيميز دوغرو اولماياراق (ترلان، اسلان، قاتير، هله) يازماغيميز دوغرودور.

 بو مقدمه‏ ايله دخيل كلمه لرين املاسينا داخل اولوروق، دخيل كلمه‏ لر ايكي نوع‏دور. بيري فارسدان و عربدن گلمه سؤزلردير، بيري ايسه لاتين و روس ديل‏لريندن گلمه سؤزلر. فارس و عربدن گلن سؤزلرين عموميتده املالاري قوْرونوب ساخلاناجاق‏دير و بو اونا گؤره ‏دير كي بيز فارس و عرب تحصيلي آليريق و بئله ‏ليك‏له بير كلمه ‏يه بير املا اؤيره ‏نيريك و اونو بير فورمادا يازيريق بورادا دا آنجاق خاص بير كلمه ‏لرين املاسين دگيشه بيلريك و بونلار بيزي چاش-باش سالان بير كلمه ‏لردير.

مثلاً بيز (عالم) يازاندا اونو (aləm) و  (alim) اوخويا بيلريك بونا گؤره ده (alim)ين املاسين آييرماق ايچون اونو (عاليم) يازماغيميز ايرادسيزدير. آنجاق (جاهل-لايق-سالم) و بو كيمي كلمه ‏لرين املاسين دگيشمك يئرسيزدير. (حرمت) سؤزو مختلف لهجه‏ لرده (حؤرمت) و (حورمت) تلفّظ اولور. ائله محض بونا گؤره ده اونون تلفّظون گؤسترمك ايچون املاسين دگيشمك اولار آنجاق (صحبت) كيمي بير كلمه ‏نين بير تلفّظو واردير و اونون املاسين دگيشمك يئرسيز اولاراق كلمه‏ني اوزاتماقدان ساواي بير حاصلي يوخدور. (Sehr) و  (səhər) سؤزلرينين املاسين آييرماق ايچون اونلاري (سئحر) و (سحر) يازماق اولار آمّا (اينسان، ايمام، ايسلام) يازماق يئرسيزدير بو آرادا بير پارا لغت‏لر ده واردير كي دخيل اولماقلارينا رغماً تماميله ديليميزده اري‏ييب بيزيمكي ‏لشيبلر بيز بونلاري اؤز املاميز ايله يازا بيلريك (دونيا، قايدا، موغايات و بو كيمي سؤزلر).

ايندي گليريك لاتين و روسدان ديليميزه داخل اولان سؤزلره، بونلار دا ايكي چئشيت‏دير: بير پاراسي مستقيم حالدا همين ديل‏لردن ديليميزه داخل اولوب، بيز بئله بير كلمه ‏لري اؤز املا قايدالاريميز ايله يازمالي ‏ييق (كولتور، سيقنال، هيندوشقا و بو كيمي سؤزلر) لاتين و روس سؤزلرينين بير تعدادي فارس ديلي واسطه‏ سي‏ ايله ديليميزه گليبلر. بيز بو سؤزلري فارس املاسي‏ ايله يازماغيميز يئرلي‏ دير. (ايكي املادان اوزاقلاشماق علّتينه گؤره) بو كلمه ‏لردن (گاز، كامپيوتر، دلار، تلفن، كد، تلفكس و…) سؤزلرين مثال وئرمك اولار.

 بو آرادا بير تعداد دا ديليميزدن فارس و عرب ديل‏لرينه داخل اولان سؤزلر وار. بيز بونلاري اؤز املاميز ايله يازاجاغيق (اومود، آري، قاتار، اوتاق، ساوالان، آشيق و…) سؤزلري (اميد، عاري، قطار، اطاق، سبلان، عاشيق) يئرينه.

 يازيلاريميزدا گؤرونن اصلي ايرادلاردان بيري ده كلمه ‏نين ياپيشيق و آيري يازيلماقلاريندادير (يازي‏ لار – يازيلار) كلمه ‏لرينه دقّت ائديلسه بيرينجي املادا مصلحت آيري يازيلماسي‏دير و (لار) اؤزونو بير جمع علامتي كيمي بروزا وئرير (يازي‏لار=نوشته ‏ها) ايكينجي املادا ايسه (لار) ياپيشيق يازيليبدير و بيز بو كلمه‏ ني بير نَفَسه اوخويورق و او بير فعل كيمي نظره گلير (يازيلار=نوشته مي‏ شود) هابئله ‏دير (قازي‏ لار و قازيلار) سؤزو. بونونلا دا جمع علامتي اولان (لار) لازم اولان يئرلرده آيري و باشقالارين ياپيشيق يازماغيميز داها يئرلي‏دير. و بو لازم‏ اولان يئر (لار) سؤزو ياپيشيق يازيلاندا فعل معناسي دا وئرديگي يئرلردير.

 بو ايكي جمله‏ يه دقّت ائده‏ ك:

 ۱- ايندي كي سؤز بئله گلدي من سيزه اينانميرام.

 ۲- اينديكي موقعيتدن نهايت فايدالانمالي‏ ييق.

 مثال‏لاردا گؤروندوگو كيمي بيرينجي جمله‏ ده (ايندي) سؤزونو تلفّظ ائدركن (ن) حرفينين اوستونده فشار واردير آنجاق ايكينجي جمله‏ ده (اينديكي) بير قئيد كيمي ايشلنيبدير و اوچ هجادان تشكيل تاپان بو كلمه‏ نين هر اوچ هجاسي بير شدت ‏ايله دئييلير. نتيجه ‏ده همين فشاري گؤسترمك ايچون بيرينجي كلمه ‏ني آيري يازماغيميز مصلحت‏دير. آشاغيداكي مثال‏لار، دئديك‏لريمي آرتيق آچيقلايير:

 ۱- سنده وار منده وار جيراندا وار مارالدا يوخ.

 ۲- سن ده بيلدين، من ده بيلديم، جيران دا بيلدي مارال بيلمه‏ دي.

 گاهدان ياپيشيق و آيري املالار مختلف معنالار دا وئره بيليرلر. مثال اوچون (آج ايدي) و (آجيدي) و (آجي ايدي) اوچ مختلف معنا وئرير. بيرينجي‏سي بير شخصين آج اولدوغون، ايكينجي‏سي بير شخصين آجيماغين و آجيقلي اولدوغون و اوچونجوسو بير غذانين آجي اولماغين گؤسترير. هابئله ‏دير (يوخ ايدي) و (يوخو ايدي) املالاري (نبود و نداشت) معنالاريندا.

 سؤزلريمي نئچه كلمه ‏ده يئكونلاشديريرام:

 – آلينما سؤزلري عموميتده اؤز املالاري ايله يازيريق. آلينما كلمه ‏لر آيري بير تلفّظ داشيسالار املالارين دگيشه بيلريك و نهايت قيسا يازماغا دوشونه‏ جگيك. واحد بير املا ايكي معنا وئرسه اونو ايكي املا ايله يازماغيميز مصلحت‏دير و كلمه ‏لرين اصلينه وفادار قالمالي ‏ييق. املالاريميزي كلمه ‏نين اصلي و كؤكو پوزولماماق و كلمه‏ نين اصلي املادا گؤرونمك شرطي ­ايله يازاجاغيق.

ارسال دیدگاه