تئاتر ایله ادبیات / آیدین سرداری نیا 

            هر بیر دیلده ادبیّاتین هر بیر ژانرینین تمل داشینی دوغرو دۆزگون قوْیماق اۆچون کئچمیش­لردن باشلاییب دۆنیا سطحینده اوْ ژانرین زمان­ لا نئجه آددیملاماسینی معیار توتوب ائله­ جه ده فرقلی دؤنم­لرین شاخص و اؤنملی اثرلری اوْ دیله چئوریلمه­ لیدیر، تا کی چاغداش ادبیّاتین پایاسی اوْ ژانردا گۆجلو قورولا بیلسین. درام ادبیّاتی دا باشقا ژانرلاردان مستثنی دئییل دئسک سؤزو تام یئرینه یئتیرمه ­میشیک، نییه کی بو ژانر اوْ بیری­لره گؤره داها چتین و دقّته محتاج بیر ژانردیر.

            تئاترا، اؤزللیکله ده درام ادبیّاتینا آکادئمیک باخیلسا سؤزونو دانیشدیغیمیز تمل داش، میلاددان اؤنجه­ ۵ و ۴-نجو عصره عاید اسکی یونان تئاتریندان باشلایاراق قوْیولمالیدیر و زمان­لا آددیملایاراق گلیب انگلستان­ین ۱۵ و ۱۶-نجی عصرینده­ کی ائلیزابئت دورانی، و بو دؤنمین اؤلمز پارلایان اولدوزو شئکسپیئره چاتمالیدیر. نییه کی سوفوکل، اوْریپید، آریستوفان و بیر چوْخ باشقا کلاسیک درام یازیچی­لارینین اثرلرینی اوْخومامیش اوْلساق شئکسپیئرین هانسی تمل­لر اساسیندا و نئجه ظهور ائتمه­ سینی آنلاماییب و بئله­ لیکله فایدالانماغیمیز ساده­جه اثردن آلدیغیمیز لذّته خلاصه اوْلوناجاقدیر. آنجاق بو کتابدان اؤنجه شئکسپیئرین ان گؤرکملی اثری اوْلان هاملئت – آذربایجان­ین دَیَرلی شاعری طلعت ایّوب­ون چئویرمه ­سی ایله – یاشماق ادبی قورولوشو الی ایله چاپا حاضیرلانیب یایینلانماسی، هابئله اوْخوجولارین – اؤزللیکله ده تئاترچی­لارین – استقبالینا گؤره، شئکسپیئردن ایکینجی اثر اوْلاراق اوْتئللونو سئچرکن اوْنون تایسیز-عوضسیز ترجمه ­سینی اله آلیب چاپا حاضیرلادیم. بوگۆنکو گۆنوموزده فرهنگ ساحه ­سینده سؤز وئرمک ایمکانسیزا یاخین قدر چتین بیر ایشدیر، اوْنا گؤره ده درام ادبیّاتیندا سؤزونو دانیشدیغیم آتلانمیش تمل اثرلرین تئزلیک­له قوللوغونوزا چاتدیریلماسینا سؤز وئره بیلمه ­سم ده مطلق بیر گۆن بو ایشی گؤره ­جه­ ییمی آرزیلایا بیله­ رم.

            ایران جغرافیاسیندا یاشاییب انگلیس دیلی بیلمه­ ین تئاتر ایله ادبیّات­ سئورلر شئکسپیئری فارسجا ترجمه ­لری ایله تانیییبلار. بوگۆن آذربایجان­ین شئکسپیئرشناس مترجمی صابر مصطفی­ نی تانیماق بیزه بیر سعادت ساییلا بیلر نییه کی اوْنون ویلیام شئکسپیئردن اوْلان ترجمه­ لری؛ باشدا ایسه اوْتئللو اثرینین محتشم، طنطنه­ لی، زنگین منظوم چئویرمه ­سی ادبیّاتیمیزدا بیر زیروه ساییلاراق، تئاتریمیزین صحنه ­لرینی بارلاندیراراق، یئنی آیاق توتماقدا اوْلان چئویری بیلیم (ترجمه مطالعاتی) ساحه­ میزده ده گؤرکملی بیر اؤرنک کیمی هر زمان پارلاماقدا اوْلما قابلیّتینی داشیماقدادیر. بو گؤرکملی شئکسپیئرشناس چئویرمنی تانیتدیرماق اۆچون گله­ جکده درگی­لریمیزدن بیریسینده بیر و یا نئچه یازی حاضیرلاییب یایینلاماغا چالیشاجاغام.

ارسال دیدگاه