تورک دونیا سی ادبیاتی / م. کریمی

اؤن سؤز

    ادبيات دونياسي­، ياشايیشين بوتون ساحه­لرينده تاثير بوراخيب و انسانلارين حياتينا ايشيق و انرژي بخش ائدير. عؤمروموزو چولقايان اكونومودان توتوب استئتيك عالميميزي ادبياتلا بزه­مك مومكوندور. بوگون ايدئولوژي، يا ساده دئسك اينام و عقيده، اينسانلارين دنيا گؤروشو، اونون بوتون فيكر، عمل و گله­ جه­ يينه كؤلگه سالير. انسانلارين گئديشاتي، رفتارلاري، مختلف عنعنه­ لري بو بولاقدان سو ايچير. منجه اقتصادين تاثيريني اونودماق مومكون دئييل، آنجاق اينام و عقيده همين اجتماعي صنف­دن بوي آتيب ديرچلسه ده،  اينسانين تامام حركت­لريني اؤز سيطره­ سينه آلاراق، اونو دولانديرير.

   دنيا ملت­لري بير- بيريله علاقه­ ده اولمالاري بوگون ضرورتلريندن دوغولور و خالقلار بير- بيرينه باغلي اولماق ۲۱ جي يوز ايلين احتياجلاريندان ساييلير. شوبهه يوخدور كي بو باغلي­ليق و علاقه­لر، تفاهم، بيرگه دوشونمه و فيكير بيرليگيندن اولوشمالي اولور. بو گونكو دونيادا، دين دوشونجه­ سي ايله بؤلوشمه­لر واردير، آنجاق بو عالمده ده گؤزه­ل دوشونجه­لر و علمي يوللار واردير و انسانلارين بيرليگينه گئده­ن يولاري ديني يوللاردا آچماق اولار.

   آنجاق ادبياتچیلار ديني رهبرلر يوخ، امما ادبياتدان و ديلدن دوزگون يارارلانما یوللارینی تانييب و رهبرلره گؤسترمه­ ده باجاريقلي­ديرلار. اسلام دونياسي بوگون ميليارددان آرتيق انسانلارين بيرگه دوشونجه عالمي­دير و بو ملت­لر مختلف ديللردن و ادبياتلاردان يارارلانيرلار. بورادا عرب ديلي، دين ديلي كیمي ۱۴۰۰ايل اؤز ممتاز يئريني ساخلاميش و بوتون مسلمانلار اونا حؤرمتله توخونوب و اونو مقدس سايميشلار، چونكي اسلام كتابي اولان “قرآن” بو ديلده يازيلميش و پيغمبر(ص) عربلردن اولموشدور. آنجاق مسلمانلار ايچينده باشقا ديللر ده واردير و بورادا چوخلوغو ساخلايان تورك ديلي اؤن سيرالاردا دايانير و جمعيت چوخلوغوندا، تورك ديللي مسلمانلار اولموشلار. شوبهه يوخ ۱۴۰۰ ايل سوره­ سينده، تورك ملت­لري بوتون علمي – ادبي ياراديجيليقلاريني اؤز ديللرينده دوام ائده ­رك اسلام ديلي اولان عربجه­ ني ده قوللانميش و بو ايكي ديل آراسيندا انسيت­لر ياراتميشلار.

   بوگون تورك ديللي ملت­لر، اسلام دونياسيندا چوخلوق الده ائده­رك، ادبياتلاري دا بوساحه­ده زنگين­له­ شيب و يارديمچي اولوبدور.

   بيز بورادا توركلر اكثريتي­نين مسلمان اولدوغونو اساس توتاراق، تورك ديلي نين ۱۸اؤلكه ده رسمي بير ديل كيمي استفاده اولونماسيني گؤروب، مسلمانلار آراسيندا بؤيوك رول ايفا ائتمه­ سيني آنلاييب، چاغداش دونياميزدا بو ادبياتين ياييلماسيني گؤروب اوندان استفاده ائتمك يوخ ، بلكه هله اونو تانيماغي اؤز ايشيميزه سئچيريك. اوندان استفاده ائده­نلر بلكه بو تانيشليغا داياناراق، عالمانه سچمه­ لري دوزگون بيرايش اولابيلر.

بيز بورادا تورك چاغداش ادبياتيني يوزه دوخسان مسلمان اولان تورك ملت­لري آراسيندا آراشديرماق، تانيتديرماق و تانيماق ايسته­ييريك و بو ده­يرلي ادبيات و دوشونجه عالميني منيمسه­ مك گؤزه ­لليگي­ني آچيقلاماغي اؤزوموزه بورج بيليريك. اولسون كي باشقالاري­نين آيري ساحه ­لرده ايشلرينه گلديگي اوچون بو كتابدان بير فايدا آلا بيلسينلر.

اسلام دونياسي و تورك ديلي

  اسلام ديني ۱۴۰۰ايل بوندان اؤنجه دونيايا صولح – باريش، برابرليك، قارداشليق، دوستلوق گتيرمكله، زجر چكميش انسانلارين اومودلاريني بارلانديرميش و آرزيلاريني چيچك­لنديرميشدير و بئله ­ليكله بوتون ملت­لر چئشيدلي­لیک­لريله اسلاما قووشوب مسلمان اولموشلار. آز بير زماندا اسلام هر يانا يايیليب، آفريقادان آسيانين دوغو اؤلكه­ لرينه قده­ر گئنيشلنميشدير. بو آرادا توركلر كؤنوللو اولاراق اسلام گتيرميشلر. اونون كؤنوللو اولدوغو نه دنيني آراشديران دا بو مسئله­ يه توخونوروق كي اسلامدان اؤنجه، توركلر گؤگ تانرييا اينانيرميشلار و گؤگ­تانري، گؤيلردن بوتون كائناتا ناظر اولاراق، بوتون بنده­لري­نين ياخشي – پيس عمل­لريني گؤروب اونو مكافاتلانديريب يا جزالانديريردي. آنجاق اسلام دينينده، گؤگ تانري داها مكمل بير صورتده تانيتديريلير. بورادا معاد و يا آخرته ايمان گتيرمك، مكافاتلار و يا جزالار جوابسيز قالماديغي، شهادت و اونون ده­ يري، گؤگ تانرييه ايمان گتيره­نلري داها اؤزونه چكير. توركلر بير دين ايله اوز- اوزه گليرلركي اؤز دين­لريندن داها مكمل­دير. بئله اولاراق اونا لبيك دئييب و كؤنوللو اولاراق ايمان گتيريب، بوتون وارليقلاريني اونون يولوندا خرجله­مه­يه جان آتيرلار. توركلر بهادر و دؤيوشچو اولدوقلاري اوچون، اسلامين يايماسيندا بؤيوك باجاريقلار گؤستريب و بويولدا جانلاريندان اسيرگه­مه­ميشلر.

   اونا گؤره ده اسلام اوردوسونون اؤن سيرالاريندا اؤزلرينه يئر آچاراق، آسيادان آفريقايا دك اسلام بايراغيني چيگين­لرينده داشييرلار. دؤيوشچو اولدوقلاري اوچون تئزليكله اميرليك وباشچيليق يئرينه چاتيب، حوكومت­لر قورورلار. آز بير زاماندا ميصرده، شامدا، قفقازدا، اورتا آسيادا، توركلر اسلام بايراقچي سي اولاراق اؤزلريني گؤسته­ ريرلر. بو دوروم، بو گونه قده­ ر داوام ائتميش و بو گون ده اسلام دونياسيندا توركلر چوخلوغو و ادبياتي اوزه­رينه دايانيرساق، بؤيوك بير غلبه­ليقلا اوز – اوزه گله­ ريك.

   تاريخ بويو، تورك خالقلاريندان باش قالديران یازیچیلار، مختلف علم­لر ساحه­سينده قلم اله آليب و عربجه، توركجه اثرلر يازيبلار. اسلامين ايلك يوزاللرينده بوتون تورك عاليم­لري يازديغي اثرلريني عربجه ياراتميشلار، بلكه بوتون مسلمانلار اونلاردان يارارلانسينلار و گئت- گئده ساييلاري آرتديقجا اؤز ديللرينه اوز چئوريب و آنا ديللرينده يازماغا باشلاميشلار. ۱۴ يوز ايلده مینلرجه فلسفي ، علمي ادبي ساحه­لرده اثرلر ياراديب و بشرينه هديه ائتميشلر. بونلارين مجموعه­سي بوگون اسلام – تورك كولتورونو اسلامدان آييرماق مومكون دئييل، هابئله اسلامي دا تورك كولتوروندان آييرماقلا، اسلام اؤز گوجونو و وارليغني الدن وئرميش ساييلار.

   اسلام دونياسي بوگون انسانلارين ساييسيني نظرده توتارساق،  بير ميليارد انسانين اينام و عقيده اولگوسودور. بو جمعيت ايچينده چوخلو ملتلر، خلق­لر و اؤلكه­لر واردير و بو نلار مختلف ديللرده دانيشيرلار. آنجاق اسلامين اصيل ديلي عربجه اولورسادا، مسلمان جمعيت چوخلوغونو تورك ديللي ملت‌لرتشكيل ائديرلر. دنيا ديللري ايچينده توركجه بئشينجي دورومدا دايانميش، آنجاق اؤزه­لليك­لري و گؤزه­لليك‌لري اساسيندا، دونيانين ان قايدالي ديلي ساييلير، جميعت نظريجه ۴۰۰ ميليون انسانين آناديلي دير و گؤزه­لليك بوراداديركي بو جمعيتين يوزه دوخساني مسلماندير. تورك ديلي بوگون ۱۸ اؤلكه­ده رسمي بير ديل ساييلير؛ مدرسه‌لرده، اداره‌لرده، بيليم يوردلاريندا، علم، تجارت مركزلرينده ايشله‌نيلير و چوخلوعاليم‌لرين، بيلگين‌لرين و سياست، تجارت، آليش – وئریش آداملاري‌نين رابطه وسيله‌سي­دير.

   باشقا يؤندن، تاريخ بويو گئنيش بير ادبيات، تورك ديلينده يارانيبديركي بشريت كولتورونون آغير بير يوكونو چيگنينده چكير. اسلام ادبياتي‌نين بؤيوك بير حيصه‌سي تورك ديلينده اولموش و مين ايلدن آرتيق بير سوره ‌ده انسانلارين دويغو ، دوشونجه‌لريني ايفاده ائتميشدير.

   اسلام دونياسيندا نئچه-نئچه ديللر واردير. بونلارين آراسيندا عربجه- ديني ديلي اولاراق بيرينجي يئرده و حتا مختلف ملت‌لردن و ديللردن اولان عاليم‌لر، دين حؤرمتي اوچون عربجه­يه حؤرمت بسله‌ميش، اونو اؤيره‌نميش و اثرلرينی عربجه يازماغا جان آتميشلار. دونيانين آدليم عاليم‌لری، ابن سينا، خطيبي، سهروردي، ابوريحان بيروني، خوارزمي، بهمنيار، محمودكاشغرلي، تورك اولدوقلاري حالدا مسلمان اولدوقلاري اوچون اثرلريني عربجه يازميشلار. آنجاق تورك اولدوقلاريني اونودماميش، حتا اونا فخر ده ائتميشلر. اما بوگون اؤز ديللرينده يازيب ياراديرلار و اسلام كولتورونو يايماغا چاليشيرلار. بوگون مسلمان و اسلام دونياسينا سؤزو اولان بو ديلدن يارارلانماقلا، سؤزونو چوخلو آداملارين قولاغينا يئتيره بيلیر . تورك ديلي­نين اؤنملي حيصه‌سي ائله بوراداديركي تاريخ بويو دا بئله اولموش و بوگون ده بئله­دير. بونا گؤره ده ديليميزين اؤنه­ ميني آنلاتماق اوچون، تورك ديلي و ادبياتي‌نين چاغداش حيصه­ سيني گؤسترمكله، گله­ جگه بير جیغير آچماق ايسته‌ييريك.

تورك دونياسي

 بوگون آسيانين دوغو سمت­لريندن توتدو تا آفريقانين باتي طرفلرينه قده‌ر، گؤزئي قطبوندان توتوب اوكيا نلارين گونئينه قده‌ر تورك ديللي ملت‌لرو خالقلاري ياييلميشلارو جمعيت يؤنوندن باخارساق انگیسجه­دن سونرا ان يايغين بير ديل ساييلير. هر حالدا بو اوچ ديل، چوخلو اؤلكه‌لرده و ملت‌لر آراسیندا حؤرمتله قارشيلانير. تاريخه دقتله باخاندا ديليميزين گئنيشليگی و زنگين­ليگي هر انصافلي بيرانساني اؤزونه چكير.

   عرب ديلي چوخلو اؤلكه‌لرده ياييلميشدير، آنجاق چوخلوق جهتيندن تورك ديلي‌نين ياریسي قده‌ر اولمور. فارسجا تكجه اوچ اؤلكه‌ده، ايران، افغانستان و تاجيكستاندا ايشلكدير. آمما تورك دونياسينا گلنده، چوخ گئنيش بير دونيا ايله اوز- اوزه گليريك. اسپانيولجادا  بئله‌دير. بو ديل اسپانيا اؤلكه‌سيندن علاوه، لاتين آمريكا اؤلكه‌لرينده خالقلارين و اؤلكه‌لرين بيرينجي دیلی­دیر و ۴۳۰ ميليون انسان بوديلده دانيشير. انگليسجه دونيانين بيرينجي مرتبه‌سينده دايانيب و بوتون ديللردن چوخ دانيشاني واردير. بئله‌ليكله تورك ديلي چين و هند ديللريني كناردا قويماقلا، تورك ديلي اوچونجو مرتبه‌ده دايانير. بوگون تورك ديلي ۱۸اؤلكه‌ده رسميت تاپاراق، ۴۰۰ ميليون انسانين انسيت ديلي­دير. بو ديل مختليف لهجه‌لر، شيوه‌لر و دئييشلره چئوريله­رك مختلف آدلارلا تانينير. اما بلكه تكجه تورك عنوانيله تانينیب‌دا، باشقا اؤلكه‌لرده ده تورك ديلي، آنجاق باشقا آدلارلا ايشله‌نيلير. اوزبك، توركمن، قيرقيز، قزاق، تاتار، قازاق، چاووش، قاقاووز، باشقيرد و آذري توركجه‌سي آدلانيرسالاردا هاميسي بير كؤكدن اولوب و بير- بيرلريني دوشونورلر.

بوگون دونيا تورك ديللي‌لري، دونيا اؤلكه ­لرينده آشاغيدا گؤسترديگيميز صورتده ياييلميشلار:

توركيه                             ۷۰ ميليون

ايران                               ۳۰ ميليون

آذربايجان جمهورروسو          ۱۰ميليون

اوزبكستان                         ۳۰ ميليون

قيرقيزستان و شرقي توركستان ۱۰ميليون

توركمنستان                       ۵ ميليون

تارتارستان                         ۱۰ ميليون

قزاقستان                           ۱۵ميليون

مغولستان                          ۱۵ميليون

چين (اويغورلار)                  ۶۰ ميليون

افغانستان و پاكستان             ۵ ميليون

روسيه و داغستان                 ۵ ميليون

قافقاز اؤلكه‌لرينده باشقوردلار، كیريمه، نوغاي، قاراچاي، كرموك، آلتاي، خاكاس، تووا، قاراقالپاق،                          ۳۰ ميليون

 اوروپا اؤلكه‌لري – بلغارستان، يونان، روماني، يوگسلاوي، مولداوي، روسيه، قبرس و …                    ۳۵    ميليون

 و باشقا اؤلكه‌لرده ده تورك‌لرين آنا ديلي ايشله‌نيلير و بواؤلكه‌لرين چوخوندا رسمي بير ديل ساييلير. آرتيرمالي يام كي ايراندا آذري­لردن باشقا توركمن‌لر، قاشقايي‌لار و خوراسان، اصفهان، فارس تورك‌لري ده واردير .

   عراقدا ياشايان تورك­لرين ۳ ميليوندان آرتيق تورك ديللي ملت‌لر ياشاماقداديرلار.

ارسال دیدگاه