آرزی گوز شاعیرلریمیزدن اولان بختیار شاعیر ! / رضا همراز

 شاعیرم نظم ائدرم شعریمی نفع بشره

وئرمه رم طبعیمین آثارینی هرگز هده ره

من او شاعیر دئییلم جاه ایله جانانی سئوم

یا کی مداح اولام هر صاحب میلیانی سئوم

یا فقط تک اوزومه خوش اولا دورانی سئوم

عاشیقم سوق ائله یم خلقیمی علم و هنره

وئرمه رم طبعیمین آثارینی هرگز هده ره

آرزی گوز یا خود نیسگیللی شاعیرلریمیز سیرالاریندا دورانلارین بیریسی ده تبریزلی محمد حسین هوشی کی شعرلرینده بختیار امضاسی ایله یازاردی آدین چکمک اولار . بو شاعیر گونش ایلی ۱۳۰۰ ینجی ایل ائله آدی تاریخ لر بزه کی اولان تبریزده آنادان اولوب ؛ اوشاق ایکن چتین لیک لرله اوز اوزه دایاناراق بو آغیر یولدا جانین نئجه دئییرلر یاغلامیشدیر . شاعیر اوزو بیر یئرده دوغولدوغو تبریزی بئله تمثیل ائدیر :

گوزل تبریز آی تاریخلی وطنیم

سن سن منیم باغیم باغچام چمنیم

سنین هر بیر تاریخیوه واراغی

وئریر منه مین قهرمان سوراغی

نشان وئریر گئچمیشلری اوزاغی

هر زامانکی تاریخیوی آچارام

فرحیمدن بیر قوش کیمی اوچارام

او دوورو لرده بیر سیرا عائله لره حاکیم اولان اگرنج سلیقه نتیجه سینده ؛ لازیمی قدر تحصیل آلا بیلمه سه ده ؛ آنجاق الین الینین اوستونه قویماییب اوزو شخصی مطالعه یه گیریشیب ؛ گاهدان اوز آنا دیلینده شعر یازماغا باشلاییر . رحمتلی محمد حسین هوشی « بختیار » اوز یاشادیغی جامعه ده کی اولایلاری گوروب ؛ اونلارا نسبت شعر قوشوب جامعه سینه تقدیم ائدیر . ائله اونا گوره اونون شعرلرینین اساس موضوع لارین برابرسیزلیک ؛ فرهنگ سیزسیزلیک ؛ ساوادسیزسیزلیق و… احتواء ائدیرلر .

سویله دیم رماله باخ گور خلقیمیز آنلار یا یوخ؟

صبح صادق ده خروس بو اولکه ده بانلار یا یوخ؟

باخدی رمله سویله دی وار بوردا بیر جادوی سخت

نئچه مین ایللردی غافل دیر بو خلق تیره بخت

اونلارین عومرو گونو اولموش فدای تاج و تخت

بو بساطی پوزماغا سئل تک آخار قانلار یا یوخ؟

بو ایشه لازیم دی چوخ ایمانلی انسانلار یا یوخ ؟…

شاعیریمیز اوز کیم لیک لرین دانانلاری انتقاد آتشینه توتوب دانلاییر . او ؛ بو دانلاقلاری سوزده یوخ بلکه شعر قالیبیندا دئییب جماعت ایچره یاییر . بیر یئرده شاعیر بختیار بئله بیر شعر قوشموشدور :

خائن اوز وحدت ملییتینه فارس دانیشیر

بو خیال ایله بویوک فند ائله ییب خاص دانیشیر

دانیب اوز اصلینی بیگانه دالینجا آتیلیر

آناسیز بیر گئچی تک هر سوری گلسه قاتیلیر

دئییل اوز ملیتینه صاحب او دورکی ساتیلیر

اونو بیلمیر کی اولوب عامل خناس دانیشیر

سعی قیل تورک بالاسی اولماق ، اولسون دییرین

ندی اوز میللی حقوقون نییه یوخدور خبرین

بللی دور نه دوشونوبسن نده وار دور نظرون

سوسن قیرجانیری کیمسه وورور لاس دانیشیر …

همین شعرین آردیجا دا باشقا بیر شعری وار کی نظره گلین اوست سطیرلرده پارچالاری تقدیم اولان شعرین تکمیلی سانیلا بیلر . بیر نئچه بیت ده همین شعری بیرگه اوخوماغی نیسگیل ائدیرم :

آی منیم دیلیمه خوار باخان آلچاق

بو اورک سوزوم دور سنده بیل آنجاق

کیم یادان چیخارتسا منیم ائلیمی

کیم حاق سیز تانیسا شیرین دیلیمی

من اونو اوزومه بیر دوست بیلمیرم

اونا محبت له باخیب گولمورم

قارداشیم دئییرم من او قوچاغا

میللی حق یولوندا دورموش آیاغا

حاقیمیز قرنلر بویو تالانیب

هر گون غم اوستونه غملر قالانیب …

شاعیریمیز بختیارین  الیمیزده اولان شعر دفترین واراقلایاندا بو کیمی دییرلی شعرلره چوخ راستلاشیریق کی اونلاری آچیقلاماغی باشقا بیر ماجالا ساخلاییریق . بو شاعیرین بو گونه کیمی ایکی شعر دفتری نشر اولا بیلمیشدی . بیرینجی دفتری « مشعل اجتماع »            عنوانیندا کی نشر اولاندان سونرا ساواکین غضبینه گلیب ؛ نهایت اونو بازاردان یغیشدیرمیشدیر . انقلابین اول ایلینده ده اونون « انقلاب یولوندا» باشلیقلی بیر باشقا دفتری کی تام تورکجه لرین احتواء ائدیردی گون ایشیغینا چیخادیریلمیشدیر . آنجاق اونون باشقا نشراولونمامیش دفترلری ده واردیر کی بیری یئرده قالان شعرلری ایکینجی سی ایسه آتالارسوزون  نظمه چکمیش بیر دفتر کی اونوندا طالعیندن خبرسیز ایک . اوموروق بیر گون شاعیرین یار- یولداشینین یا خود عائله لرینین همتی ایله بو دفترلر نشره بوراخیلسین لار . البته بونو علاوه ائدک کی ، اونون آتالار سوزونون نظمه چکدیی شعرلردن بیر نئچه پارچاسی  انقلاب چاغی تبریزده نشر اولونموش دده قورقود درگی سینده ماراقلا باسیلمیش ؛ سونرا تکرار اولاراق « انقلاب یولوندا » کی باشلیقلی کیتابیندا یئر وئریلمیشدیر . یازیقلار اولسون کی بو  نیسگیللی شاعیریمیز  ۶۰ ایل آجیلی شیرینلی عومور سوردوکده کی اونون چوخو آجیلیق داشیمیشدیر ؛ یاشام یوکون یئره بوراخیب ؛ حاققا قووشموشدور . اونون تبریزین وادی رحمت قبرستانلیغیندا کی مهجور مزارینین اوستونده بو سوزلری گوردوم :

محمد حسین هوشی

شاعر بختیار

فرزند محمد

تولد ۱۳۰۰

فوت ۱۳/۴/۶۰

بلوک ۷

ردیف ۲۹

شماره ۳۲

سون اولاراق شاعیر بختیاردان بیر شعر تقدیم ائتمک له ؛ ماراقلانانلاردان ایسته نیلیر کی بو شاعیریمیزین پوئزیاسینین بیر یئره توپلانماغی و اونون آراشدیرماغینا گوره اللریندن گله نی اسیرگه مه سین لر . روحو شاد ؛ تانری نین قورتولماز رحمتینده اولسون .

                          غزل

گورنده نازلی جانانی غم دیلدن اثر قالماز

آچار دیل طوطی طبعیم ثنایه غم گئدر قالماز

مزین قیلسا گر بو خانه ی درویشی  اول زیبا

اونا جانلار فدا وررم کی لطفی بی ثمر قالماز

منی بو عشقده ناصح مذمت ائتمه بیهوده

اومود سوز آرزوسوز  دونیا اوزره بیر بشر قالماز

منیم آغ توکلو باشیمدا هزار عشق جوانی وار

مگر قار یاغسا داغ آلتینداکی ثروت گئدر قالماز؟

بو کوی عشقده صرف ائتمیشم بیر عومر پر قیمت

جهاندا بی تفاوت رسمدور صاحب نظر قالماز

منیم آرزوم ؛ اومیدیم خلق ایرانه سعادت دور

اگر وحدت اولا اجرا وطنده فتنه شر قالماز

جفالر چکمیشم من « بختیار » اوز زادگاهیمدا

اگر داغلار چکه داش توپراغیندان بیر اثر قالماز .

 

ارسال دیدگاه